《香港傭兵》: [Day 22－現在未來] PART 11
「唔好要我嘅隨行者服侍你得唔得？」
「唔抵得我哋恩愛吖？」
「不如叫綽姿過飛揚俾你啦。」
「其實我冇所謂。」
『唔...唔係咁好嘅...』
「點解吖？你唔鍾意同我一齊咩？」
『唔...唔係...唔係咁嘅意思...咁我弱吖嘛...無謂拖累你啦...』
「有我照顧你咪仲好～」
『唔係...唔係...日倫...你話喇...我跟邊個會好啲喇？』
「唔...照我睇都係跟綽姿會好啲。」
「咩意思呀？！」
「你啲隨行者跟你唔夠兩個禮拜就玩完...」
「冇得咁計㗎喎！梁綽姿之前都冇隨行者！比較唔到㗎喎！」
「起碼都過咗三個禮拜，飛揚仲係生勾勾～」
『托賴...哈哈...托賴...哈哈...』
「食飯啦...咁多嘢講。」
「你哋夾埋嚟蝦我...」
『唔係唔係...食條菜～我餵你～吖～』
「唔唔～都係飛揚哥哥最好～」
成餐飯都有傾有講～
又食又傾咁～真係好飽～
『好飽吖～真係好飽吖～』我摸住個肚...好似有咗三個月咁...
食到咁飽...一陣執行委託會唔會有問題㗎？
日倫都點點頭：「食晒我啲存貨...好似最後晚餐咁...」
羅羅谷起塊面豬登：「又話我哋食晒你啲嘢...小氣鬼...」
綽姿都點點頭。
日倫笑笑口，擰擰頭：「唔係唔係～食得好滿足姐。」
『啱吖啱吖～真係好滿足吖～』我都執好晒啲碗碗碟碟同筷子～拎入廚房～
羅羅跟住我身後：「等我洗得啦～」
『唔使唔使～有洗碗機㗎嘛～』我就將所有碗碗碟碟同筷子都放晒入洗碗機～
「係喎係喎～」羅羅碌大對大眼仔望住部洗碗機～
日倫都拎埋袋垃圾入嚟掉落垃圾筒：「你唔係真係留意唔到吖化？」
羅羅立即谷起塊面豬登：「又想話我觀察能力低吖？我只係覺得冇必要先唔去觀察姐～」
『嗯...咁都好正常～喺一個認為安全嘅地方，放低戒心，有助放鬆神經緊張～到去到要提高警覺嘅環境，感覺都會靈敏啲～觸覺都會敏銳啲～』我將啲碗碗碟碟同筷子都放晒入洗碗機後，就洗洗手～
羅羅同日倫都冇出聲...淨係眼定定咁打量住我...
做...做咩？
日倫向住出面大嗌：「喂綽姿！你個隨行者真係好唔妥喎！」
『喂...又有咩唔妥吖？』講到我好似痴咗線咁...
羅羅都一邊跑跑跳跳咁走出去，一邊嗌：「喂喂！飛揚哥哥真係好奇怪吖～」
日倫都跟住行出去！
喂喂...點吖？
我抹返乾隻手都行返出廳...
只見黐實綽姿嚟坐嘅羅羅古古惑惑咁打量住我...
日倫就企喺旁邊打量住我...
綽姿就冇我咁好氣咁...
『喂...做咩姐？點吖？唔好咁樣望住我得唔得吖？』好似睇緊珍禽異獸咁...
日倫打量住我，點點頭：「你真係唔同咗...」
『吓？又有咩唔同吖？』咪又係咁...
羅羅都點點頭：「嗯嗯...醒咗好多...」
『喂...醒咗又唔得吖？況且我都唔覺得自己有醒過喎...』有咩？醒咗去邊？
綽姿都點點頭：「嗯。」
『唉都唔知你哋講乜...唔好嘥時間喇～傾返今次個強迫委託先啦。』
綽姿、羅羅同日倫都異口同聲：「嘩...仲話唔係醒咗？」
『點吖？你哋係唔係咁無聊吖？』
唉...真係唔知佢哋個腦載乜㗎...
講完一輪廢話之後，大家都拎部電話出嚟...
日倫撳兩撳部電話：「今次委託嘅行動計劃同路線圖我都已經Send咗俾你哋...」
羅羅都撳撳部電話...皺晒眉又谷起塊面豬登：「冇嘅冇嘅？」
日倫冷眼望住羅羅：「咪話咗囉...你今次都唔係委託成員...只係Backup咋嘛...邊會Send埋俾你吖？」
羅羅再谷得塊面紅啲：「吓...認真咩？咁點Backup吖？」
日倫冇羅羅咁好氣：「得㗎喇得㗎喇...你跟住我就得㗎喇...」
「唔...」羅羅谷住塊面豬登...悶悶不樂咁...
我就冇理咁多...睇清楚...幅地圖...
係神秘工廠嘅地圖...有好多唔同顏色嘅實線虛線...仲有好多唔同顏色嘅三角圓圈交叉正方菱形散佈喺地圖上...移動...
日倫繼續講解：「我已經Set好晒路線...」
『同上次潛入嗰次...差唔多...』我再留心睇清楚幅地圖...
同我哋上次潛入神秘工廠嘅路線...裡面巡邏嘅守衛同Drone...可以話完全一樣...
「當然...」日倫點點頭，「基本上係完全一樣...實際情況應該都唔會有太大出入...如果真係有...就要靠現場執生。」
『嗯...』現場執生並唔係問題...
雖然話日倫嘅計劃可以話天衣無縫...之但係到實際情況都會同計劃有出入...
每次都係㗎啦...總會遇上計劃之外嘅突發情況...
綽姿點一點頭...
日倫繼續講：「不過最大問題嘅都係...地下層...」
地下層？
係好似...科學園個地下研究所嘅地下層？
上次同綽姿跟住羅羅去交收...
日倫再繼續講：「雖然委託內容只係話需要破壞工廠達50%...但冇講過話包唔包括地下層...而喺你哋所掃視得嚟嘅地圖係有地下層...」
綽姿立即打斷：「係你喺飛揚手中呃返嚟嘅資料。」
「係係...」日倫尷尬咁點點頭，「有時又唔使咁仔細嘅...」
係囉係囉...搞到我好似咁柒咁...
日倫繼續講：「地下層嘅資料並唔多...冇辦法去分析同計劃路線...」
咁即係...使唔使破壞？
唔好話使唔使破壞地下層...喺我嘅委託任務當中，就連要破壞50%都冇寫到...
好明顯...呢點就只有喺日倫嘅委託任務中先有列明...
咁綽姿呢？
同我一樣冇都唔出奇...
因為我哋兩個都只需要跟住日倫嘅計劃行動就足夠。
而事實上，日倫都冇必要同我哋講明要破壞50%...
問題係在於...日倫喺我嘅資料得知有地下層...唔清楚包唔包括在內...想問我哋意見...
『我會認為...唔需要諗咁多...』我望住地下層嘅地圖...
只係掃得好少...只係得我行過嘅地方...仲有唔少位置都掃唔到...
日倫、綽姿同羅羅都望實我...
『只需要完全破壞地圖上所顯示到嘅設備、物資、裝備及武器...順利嘅話先再落埋地下層...』唔順利嘅話...根本就唔使諗...
綽姿點一點頭...
日倫都點點頭：「都啱嘅...首先要完全破壞地面...其實都唔簡單...今次嘅強迫委託...就只有我哋三個...行動嘅仲只得你哋兩個...」
我同綽姿都對望一眼...
『問題唔大嘅...假如對手就只有解放軍...』解放軍嘅裝備再厲害...只要唔可以好似我哋咁...精神化嘅話...都只不過係血肉之軀...普通人一個...
日倫打量住我：「真係咁有信心？」
『呃...嗯...』我點點頭，望住綽姿...
綽姿都點點頭，望住日倫...
「嗯...」日倫都點點頭，「正如頭先所講，行動就只得你哋兩個...我喺呢邊有架流動戰術車...出發嘅時候就用佢...去到工廠附近，我就會留喺車上支援你哋...羅羅都留喺車上做Backup。」
羅羅點點頭：「雖然想做多啲...但冇辦法啦～」
『希望唔使你做咁多啦...』我諗一諗，『要你做多...即係話我哋會出事...』
佢哋三個又靜咗咁望住我...
『好喇...要講埋點樣破壞法...唔會淨係用精神刀鳩砍掛？』雖然唔係話唔得...不過效果唔係咁好囉...
「你真係...」日倫打量住我，輕輕一笑，「喺地圖上，見到有紅色嘅正方形？」
我同綽姿都望返部電話，點點頭。
日倫繼續講：「嗰啲紅色正方就係設置炸彈嘅位置。」
係用...炸彈...
都好正常...要破壞咁大地方...用炸彈就最方便...
之但係...炸彈嘅威力有幾大呢？
大唔大得過...頭先羅羅“善後”所用嘅炸彈呢？
日倫行去個櫃...拎咗一大盒黑色盒出嚟，放喺茶几上：「至於威力方面...大家可以放心。」
日倫一打開盒黑色盒...裡面就放咗...一舊舊...黑色嘅...扁扁地身嘅...長方體...
呢啲一舊舊黑色長方體有啲似...Nokia 8210嗰啲叉電...
究竟係咩嚟㗎？
羅羅拎起一舊...手震震咁...睜到對大眼仔大一大：「係...SB1？！」
咩...咩係SB1吖？
綽姿搶走羅羅手上舊“SB1”：「你冇份㗎。」
羅羅又喺個黑色盒裡面拎起舊SB1：「連SB1都用埋...使唔使咁Dom本吖？今次個報酬好多㗎？」
講起報酬...我又冇留意到...
不過留唔留意都冇所謂啦～反正都係會俾綽姿扣起～
日倫擰擰頭：「都唔係報酬多少嘅問題...最重要都係完成委託。」
綽姿又搶走羅羅手上舊SB1：「你唔係咁都諗唔到吖嘛？」
羅羅又喺個黑色盒裡面拎起舊SB1擰擰頭：「唔係唔係～只係覺得有啲誇張姐...以日倫嘅分析應該可以更精準...唔使用到最具毀滅性嘅SB1姐...」
『最具毀滅性？有幾毀滅性？』趁住有機會，就問得清楚啲。
羅羅拋吓拋吓舊SB1：「點講好呢...相比起晏晝善後用嗰粒大多...一百倍左右啦...喂...」
綽姿一手就搶走羅羅拋起嗰粒SB1。
『一百倍...一帶嘅唐樓都夷平...』我諗都差唔多...
日倫接住講：「差唔多...不過工廠裡面嘅建築物...睇嚟唔簡單...所以都係用輕量設置型中...最勁嘅SB1會穩陣啲。」
『都啱嘅...』我都拎起舊SB1睇睇...
真係好似舊叉電...
望住綽姿將一舊又一舊SB1由黑色盒拎起...放喺腰間...
SB1就好似有磁力咁...貼住喺綽姿條腰帶上！
綽姿再放舊SB1喺腰間上舊SB1上面...又好似有磁力咁貼住！
一路圍住嚟貼...綽姿將一舊又一舊SB1圍住自己條小蠻腰嚟貼...
我都跟住綽姿...將一舊又一舊SB1由黑色盒拎起...放喺腰間...
貼好晒之後，而家我同綽姿嘅腰間...加加埋埋大大話話都有成六十幾舊SB1...
六十幾舊SB1...爆起上嚟會唔會成個葵芳都唔見咗？
日倫收返好盒黑色盒：「引爆掣就交返俾你哋。」
交返俾我哋？
綽姿撳一撳部電話：「你怕會誤炸死我哋？」
日倫半帶恥笑咁打量住綽姿：「我怕你唔信我咋～」
綽姿冷眼打量住日倫：「我幾時有唔信你？」
「哈哈～」日倫笑一笑，「點都好啦～份量我就預多咗...你哋覺得順利嘅話...可以落埋去地下層Set...點Set法就交由你哋自己判斷。」
預多咗...俾我哋落埋去地下層Set？
睇嚟日倫都係一早預咗順利破壞地面先再破壞地下層...
呢個日倫...真係唔老實...