「兩碟豆腐火腩飯~」伙記放低兩碟豆腐火腩飯,「咦...個肥佬走咗喇?」

日倫拎起林雪張單Fing兩Fing:「哦係吖~張單我會幫佢埋~」

「哦~」伙記點點頭,「有人埋就得啦~幾驚走數...實俾老闆屌到開花...」

「嗯~」日倫點點頭。

望住伙記轉身離去...越行越遠...



日倫拎起兩隻羹,用餐巾紙抹兩抹,遞一隻俾我:「睇嚟真係要盡快入返去特殊區...希望綽姿快啲醒。」

『嗯...』我接過日倫隻羹,『你都諗住入特殊區?』

「嗯。」日倫點點頭。

『其實你冇必要入去...』日倫都唔係住喺特殊區入面...

況且...對日倫嚟講...出面好似會方便啲...



萬一真係封鎖區域嘅話...對日倫嚟講...行動範圍就被局限...要調查嘅地方就少咗...

對調查型行者嚟講...唔會係好事...

除非...特殊區裡面有重要嘅線索...又或者有重要嘢喺入面...

「本來都真係嘅...但好衰唔衰...我放咗唔少精神液喺特殊區入面。」日倫擰擰頭,篤幾篤又撈幾撈碟豆腐火腩飯。

『係吖...』原來係重要嘢...仲要係精神液...



「睇嚟今次真係計錯數...所以冇辦法啦...一定要入去。」日倫就開始開餐。

『嗯...』計錯數...

條數有冇計錯就真係唔知...

不過日倫放啲精神液喺特殊區就一啲都唔出奇...

正所謂狡兔三窟...

日倫喺香港...又點止得三窟...

同日倫快快手手食碟豆腐火腩飯...

其實真係冇餓嘅感覺...亦都冇話飽嘅感覺...總之就係乜感覺都冇...



只係...隨便塞落肚...

食完碟豆腐火腩飯...再一啖啜晒杯凍啡後...日倫就拎住兩張單入去餐廳俾錢...

我就企起身...行兩步...望望四周...都仲係咁多人...

應該話...越嚟越多人...

比起頭先過嚟嘅時候...更多...

多咗唔少黑色衣著嘅男男女女...喺街上行行企企...等位食嘢...就連我哋頭先嗰張檯都立即有四個人坐低...

除咗黑色衣著嘅男男女女多...仲有少量嘅街坊裝...當然唔少得手持長槍...Full Gear嘅解放軍士兵...



一隊隊解放軍士兵巡嚟巡去...

仲要總係眼超超又眼睥睥咁...

呢種係唔係大戰前夕嘅氣氛?

或者真係...真係好有大戰前夕...兩軍相遇...

等到日倫俾完錢...由餐廳行返出嚟...我感覺到...電話震震...

我拎部電話出嚟一睇...係羅羅:『喂?』

羅羅勁大聲咁:「你個梁綽姿醒咗喇!」

『哦...好...』使唔使咁大聲...仲要用“你個”...



羅羅繼續酸溜溜咁:「快啲返嚟喇...唔好要人哋等喇...」

『嗯...好...而家返...』唉...女仔都係醋埕...

收完線之後...

「綽姿醒咗喇?」日倫問一問。

『嗯...』我撳返開個Call車App...

「咁我哋盡快返去。」日倫都開始行。

『嗯...而家Call緊黃生...』我就邊跟住日倫身邊行...邊撳撳電話...Call返黃生...



向住大馬路嘅方向行...穿過橫街...

Set好埋地點...

『黃生話十分鐘內到...』十分鐘...

「嗯...行定過去等多陣。」日倫繼續行...又扮晒唔在意咁留意住四周。

『嗯...』我都袋返好部電話...偷偷留意四周...

解放軍...只係想喺度做好準備...

睇嚟應該係...

準備嘅時間要幾耐?

就呢兩日?

封鎖區域之後...就立即進攻...攻入特殊區?

真係會咁?

繼續跟住日倫身邊...眼尾望幾望四周...向住大馬路方向行...

同唔少黑色衣著嘅男男女女擦身而過...又俾唔少手持長槍...Full Gear嘅解放軍士兵眼超超...

“沙 沙 沙”然後就行到嚟大馬路...行多幾步...行返出深井...

“飃...飃...”抵住冷風咁等多陣...又等多陣...

“吱~”見到有一兩架Call車駛過嚟...有幾個黑色衣著嘅男男女女落車...行入深井...

咁多人...再遲啲嘅話...會唔會今晚都未返到入去?

希望過咗頭一批之後...到我哋嚟到就冇咁多人...

等多一陣...再等多一陣...

“吱~”我又聽到...電動引擎聲...

我望向狹窄嘅馬路上...遠遠嘅遠處...正正就有架...白色嘅七人車駛緊過嚟...

我望住架白色七人車向住我哋呢邊越駛越近...越駛越近...

當架白色七人車駛到嚟我哋面前...停喺我哋身邊...有著住黑色衣著嘅兩女一男落車...

我同日倫等到嗰兩女一男落完車就上車...

「喂~都幾快喎~」黃生由倒後鏡望一望我同日倫~閂返埋車門~

『係吖...喺呢邊食咗個飯之後...有個朋友叫我哋過去搵佢...』我就同日倫扣好安全帶...

「哦~係吖?喂呢邊真係幾好生意㗎喎~就係啱啱咋嘛~啱啱呢段時間,我都喺荃灣同青衣兜咗幾轉~單單都係過嚟深井~睇嚟好多人入特殊區喎~」黃生見我同日倫都扣好安全帶後...

『係吖...咁你都搵得唔少啦...』真係識得做生意...

「OK咁啦~仲多咗唔少行家過嚟搵食添~」就俾一俾油,轉個靚彎~

只係少少空檔...都要走幾轉...

“吱!吱~”坐喺黃生㗎七人車...沿住狹窄嘅馬路行駛...

「又有一架入去~」黃生又望一望倒後鏡中嘅我,「吖係啦!聽講好似真係打入去喎...仲咁多人走入去嘅...唔怕咩?」

『可能大家嘅屋企都喺入面...怕都要返去...』我又望出車窗外...已經冇頭先咁多車入荃灣...但有唔少車由九龍方向入深井...

「咁梁生你呢?」黃生留意返路面情況,「你會唔會趁呢個時候,喺入面搬返出嚟吖?」

『我?我就應該唔會...』其實我都冇諗過...

冇諗過要搬嚟搬去...

對我嚟講...其實邊度都係一樣...只要喺香港裡面...

更何況...

黃生又望一望倒後鏡中嘅我,再留意返路面情況:「你真係唔驚㗎?」

『驚?有咩好驚?你都唔驚...仲喺呢頭做生意...我又有乜好驚?』真係攻入嚟嘅話...我會殺晒班解放軍...

嚟一個...殺一個...

「哈哈~」黃生笑一笑,擰擰頭,「冇㗎~我都係諗住嚟呢頭走多幾轉...做埋你生意就帶埋一家大細,老婆仔囡閃過去港島嗰邊避避先㗎喇~起碼過去幾日...睇定啲先啦~」

『多謝你喎...』我望一望倒後鏡中嘅黃生,『我都祝你一家平安...』

「哈哈~」黃生留意住路面情況笑一笑,「大家咁話啦~」

平安...對我嚟講...呢度唔會有平安...

對我嚟講...就只有返翻去過去...

只有返翻去過去...同阿月一齊生活...先可以平平安安...

明明我就返翻過過去...同阿月再一齊生活...

但只有一日...就只有短短嘅一日...

“吱~”我哋架七人車駛到落天橋...差唔多去到葵涌入口...就已經見到有車龍...前少少嘅位置...就有解放軍嘅路障...

黃生都減慢車速...排住隊...慢慢駛過去...

當我哋架七人車差唔多駛到埋去解放軍路障前...當我以為又要俾解放軍士兵問長問短之時...

一個手持長槍...Full Gear嘅解放軍士兵望一望入嚟車廂...望一望黃生...就招招手示意黃生俾油過...

竟然...唔使查問?

黃生俾一俾油:「頭先兜咗幾轉葵芳深井~班老解都認得我~唔使查~真係方便~」

『嗯...』原來係咁...

又真係估唔到...估唔到黃生趁住空檔兜多幾轉...做多幾單生意...就方便咗我哋...

世事往往就係咁...環環相扣...

“吱~”黃生開得快啲...好快就嚟到日倫嘅屋企樓下...

『你唔怕再等多我哋一陣...做多我哋一程生意嘛?』我一邊解開安全帶...一邊問問黃生...

黃生回頭望過嚟:「唔怕~我再喺呢頭兜多幾轉囉~」

『嗯...可能冇咁快...我哋搞掂就Call你...』我就同日倫打開車門...

「OK吖~OK吖~我等你啦~」

同日倫落咗車之後...我哋都好快就上返樓...無謂節外生枝...

入到屋...跟住日倫行入房...

羅羅坐喺凳上,帶住微笑望住我同日倫:「返嚟喇?」

『嗯...』我同日倫都點點頭...再望住...坐喺床上嘅綽姿...

綽姿坐喺床上...發緊呆咁...

而我同日倫都...忍...忍唔住...

『唔...唔...哈哈~』笑起上嚟...

因為...因為我哋都見到...綽姿面上...有黑色嘅圓圈交叉刀疤仲有六條貓貓鬚...

綽姿發完呆...冷眼咁望住我同日倫:「笑咩?」

『唔...唔...你...你唔知㗎咩?你醒咗咁耐...唔...哈哈~』唔得唔得...真係忍唔住...

望住綽姿呢個冷艷樣...但畫到花面貓咁...真係好搞笑...

羅羅就古古惑惑咁陰陰嘴笑:「佢吖...一醒咗就坐咗喺度發呆喇...嘿嘿...」

綽姿望一望羅羅...諗咗一諗...就左望望...右望望...落床喺張檯上拎起塊鏡照一照...

綽姿一望到鏡中嘅自己變咗隻花面貓...眉頭一皺...一手放返塊鏡落檯面...就衝埋去羅羅面前...雙手捏住佢條頸:「肯定係你做㗎啦!啲咁無聊嘅事!除咗你仲會係邊個?!」

羅羅俾綽姿捏住條頸Chok前Chok後:「死...死喇...死喇...玩...玩吓...吖..吖...吖~」

綽姿就捏住羅羅條頸Dom落床:「玩玩玩...好好玩吖?!」

羅羅都不甘示弱...雙手捏返住綽姿條頸...一個轉身...反撳返綽姿落床:「鬼叫你深層睡眠得咁耐吖?」

綽姿俾羅羅捏住條頸撳喺床一陣...又反撳返羅羅落床:「深層睡眠得耐就要畫到我成面花晒㗎喇?!」

羅羅俾綽姿捏住條頸撳喺床一陣...又反撳返綽姿落床:「畫到咁可愛都唔多謝我!」

綽姿一腳踩住羅羅個肚...踩多兩踩...撐多兩撐:「吖...吖...可愛?邊忽可愛吖?!你試吓俾我畫吖!」

羅羅俾綽姿撐到雙腳Fing Fing:「你咁冇藝術感...邊可以同我比吖?!」

綽姿一腳撐開羅羅...再撳佢落床碌兩轉:「你又好好吖?亂咁畫!都唔知似乜!」

羅羅又雙腳翹住綽姿條小蠻腰...一個轉身撳返佢落床:「抽象派嘅嘢你識條鐵咩?!」

我同日倫就望住兩個小妹妹...喺床上你捏我又我捏你...你撳我又我撐你...碌左碌右...碌嚟碌去...

點吖...好似啲貓貓咁打交...使唔使咁得意可愛吖...