《香港傭兵》: [Day 24－三合成立] PART 08
同綽姿一齊沿住壞咗嘅扶手電梯上到嚟屯門西鐵站。
四周無人...一個人都冇...
一邊留意住四周...留意住遠處...行埋去入閘機...都係一個人都冇...
一個人都冇...就只得我同綽姿嘅屯門西鐵站...
又沿住壞咗嘅扶手電梯行到上嚟月台...
月台上正正就有一架埋咗站嘅列車...閘門全開...
我同綽姿就步入車廂...望望左...望望右...都係冇人...
全架西鐵車廂一個人都冇...又係只得我同綽姿...
當我哋都企定定...過咗一陣...
“吱...”閘門都關上...
“依...咔...”列車緩慢開動...
『好彩架車仲會行...』我仲喺度諗...會唔會已經停駛...
「嗯...」綽姿點點頭，「仲維持運作...」
『要停駛西鐵...就要天門同西貢獻命雙方同意...而家西貢獻命都死晒...就淨返天門...所以停唔到...繼續運行...』應該就係咁...
「只要唔切斷能源...」綽姿點點頭。
『你估天門會唔會切斷能源？』呢點我又有啲好奇...
「未必...」綽姿擰擰頭，「未必咁簡單...」
『嗯？你係指...要切斷能源？』我諗應該冇估錯...
「嗯...」綽姿點點頭，「話唔定要破壞先切斷到...」
要破壞...咁嚴重...
「不過唔緊要...都唔重要...只要順利過到去元朗就得喇。」綽姿望住破爛嘅車窗。
都係...而家最重要嘅...都係順利過到去元朗...
“颼！颼！”風由破碎嘅玻璃窗吹入車廂裡...
呢架列車...全部車卡嘅車窗都破爛...風都不停流通整個車廂...
講起上嚟...雖然風好猛...但就唔係太覺得凍...
點解㗎呢？
嚟咗未來咁耐...我唔係一直都覺得未來嘅冬天特別凍㗎咩？
係幾時...開始感覺唔到...凍...
“依...吱！”列車一路行駛...
聽住猛風“颼！颼！聲”...同列車行駛嘅“依...吱！”聲...過咗幾漫長嘅時光...
然後就駛到嚟兆康...
當列車停定後，打開車門，月台上一個人都冇...
連兆康都冇人...好正常...
兆康都係屯門範圍...我諗而家屯門冇人夠膽出街...
知道發生咩事又好...唔知道發生咩都好...留喺屋企就最好...
咁天門嘅人呢？佢哋知唔知呢邊發生咩事？
會唔會有人走過嚟...又會喺呢邊返翻入天水圍...元朗...
但而家都仲係一個人都冇...
“吱...依...咔...”閘門都關上後，列車再次緩慢開動...
冇人...全架列車仲係得我同綽姿兩個...企定定...
“咔咔...咔咔...”列車繼續以緩慢速度行駛...過咗一段時間...終於嚟到天水圍站...
列車停定後，打開車門，月台上就有幾個男男女女上車。
每個車廂都總有幾個男男女女企喺一邊...坐埋一邊...
而喺我哋身邊...都企咗三個少女圍埋一齊...
終於...終於都見到啲...比較正常嘅人...
身邊三個睇起上嚟都係廿歲左右嘅少女望一望我同綽姿...
我就有啲尷尬咁望返出月台...
“吱...咔咔...咔咔...”車門關上後，列車繼續以均速行駛，駛離月台...
「有冇發現吖？」三個少女之中，其中一個高高瘦瘦就開口問另外兩個。
「嗯？」另外兩個就一頭問號。
「差唔多又係吉車嚟...今次都好啲...有兩個人...」
吉車...兩個人...係指我同綽姿？
「係喎係喎...今朝過去天水圍見到呢邊月台架車都係吉㗎...」
我就繼續偷聽佢哋講乜...
「聽講好似有大事發生吖嘛～」
「有大事？咩大事吖？喺屯門嗰邊吖？」
「係吖係吖～好似好大件事...不過就唔知咩事喇～」
「車～我仲以為你有個住屯門嘅男朋友仔會知添～」
「我都係聽佢講咋～佢都話唔知發生咩事...淨係知...聽人講...好恐怖...唔好出街...」
“咔咔...咔咔...”列車繼續以均速行駛，駛進朗屏站...駛過月台...
「嘩...咁你男朋友仔有冇事吖？」
「佢就係冇出街所以冇事囉～」
「咁不如叫佢過埋嚟住喺你度避陣囉～」
「佢都冇通行證～點過姐～」
「睇你個含春樣～幾咁想～」
「想都冇用啦～不過講開又講...今朝過嚟都唔見有西貢獻命喎...」
「又係喎...元朗月台都唔見...唔通...同佢哋有關？」
真係...天門嘅人唔知西貢獻命班人已經死晒...
最起碼...平民一定唔知...
“咔咔...咔咔...”列車繼續行駛...
車廂裡嘅男男女女都有傾有講...閒話家常...
都係普通人...普通嘅平民百姓...
再過一陣...終於嚟到元朗...
我同綽姿就同一大班天門嘅男男女女一齊落車...
沿住佈滿子彈窿...刀痕嘅牆身...戰爭嘅痕跡一直行...由月台行落去下一層...
冇...再冇西貢獻命嘅人駐守...巡邏...
我同綽姿再行落啲...沿住破爛嘅樓梯行到落下一層...
西貢獻命...已經...死清光...
我同綽姿就繼續跟住頭先嗰三個靚女...行過去出閘機方向...
我就拎定張通行證出嚟...排住隊...
唔使幾耐...只係過咗一陣...就行到嚟兩個手持長槍嘅天門守衛面前...
我立即遞張通行證俾天門守衛...
天門守衛拎咗我張通行證，皺住眉咁望咗眼，再用電話掃掃張通行證後...
「係你哋吖...」天門守衛睜大對眼！
『嗯？』唔係有咩問題吖化...
Owner唔係真係陰鳩Me吖化？！
綽姿都提高戒備...
「呃...唔好意思...時間咁準...有啲驚訝...」天門守衛立即喺佢個防彈背心前袋拎咗啲嘢出嚟，「有人託我交俾你哋...」
『有...人...』我接過天門守衛條...車匙？
我望住...手中條車匙...上面隻...蠻牛...
呢條車匙係...
『係邊個託你交俾我哋？』呢條車匙...有蠻牛Logo嘅車匙...
天門守衛交返張通行證俾我：「佢話你上到車就知喇喎。」
我接過張通行證...
上到車...
「架車就泊咗喺嗰邊樓下。」天門守衛指一指遠處嘅出口。
『哦...好...唔該...』架車...就泊咗喺...
同天門守衛點一點頭，就同綽姿一齊行...行去天門守衛所指嘅出口...
我拎住條車匙一路行...一路諗...
唔會...唔會係...唔會掛...
當我哋行到出口...我立即八八卦卦望落樓下...
望一望...好易就俾我望到...碳纖色嘅車身...超誇張流線擾流設計嘅...林寶？！
又真係好難留意唔到...咁鬼死型嘅林寶...我最愛嘅林寶！
而呢架林寶...唔會就係...
我同綽姿一路望住樓下架林寶...一路行落去...
當我哋行到落地面...行到去路邊...行到去架林寶身邊...
面前呢架碳纖色車身...超誇張流線擾流設計...極貼地嘅林寶之唔係...之前喺青衣搶返嚟...然後賣咗俾東叔嗰架...林寶...
同色同款...一模一樣...根本就係同一架...
唔會係第二架...唔會係另一架...唔會...唔會...
我望住條車匙...又望住架林寶...皺晒眉...
點會...點會...而家...會喺元朗...天門嘅範圍...
我撳一撳條車匙...解鎖...揭開鍘刀式車門...
同綽姿一齊上車...被碳纖同黑色真皮包圍住...坐喺跑車座椅...司機位嘅我...就望到面前個好似F1咁嘅非圓形設計軚盤上...貼咗張Memo紙？！
我拎起張Memo紙一睇...睇裡面寫住...
“你手車就真係麻麻喇～上次條街冇車先總算平平安安咁架深愛嘅古董車冇凹冇花～今次去到咁遠就冇咁好彩㗎喇～都係幫你借架林寶返嚟俾你揸啦～少年～”
『係...宋伯伯...』我望住...“少年”兩隻字...
「係宋本木？」綽姿打量住我手上張Memo紙，「東叔呢個老鬼...真係唔老實。」
『架車係由宋本木...問東叔借？』點會...佢哋兩個...識？
「好明顯...」綽姿諗一諗，「宋本木...識得東叔...仲問到佢借車...」
『點都好啦...總之就有車俾我哋揸...其實頭先過嚟嘅時候...我都有諗過...點樣出去...』我都喺度諗...呢邊會唔會同屯門嗰邊一樣...有專門出入特殊區嘅紅Van...
「總係好似...」綽姿諗一諗，「一切都安排好...」
『嗯...好似...圈套一樣...』安排好嘅...圈套...
「話唔定...」綽姿又諗一諗，「呢個圈套喺好早好早之前...就已經安排好...」
『好早...好早？』我疑惑咁打量住綽姿...
「嗯...」綽姿點一點頭。
『明知係圈套...仲要一早就已經安排好...咁精心嘅安排...咁危險...我哋仲要跟？』仲要一步一步...跌入呢個圈套？
「我哋已經行到嚟呢一步...冇得揀...而且話唔定...好快就會知有乜喺我哋面前...等緊我哋。」綽姿閂返車門。
“啪”
綽姿扣好安全帶。
“啪”我都閂返車門...袋好張Memo紙...扣好安全帶...踩住個Break...
“吱！”撳落Engine Start...
電動引擎一著...擋風玻璃立即顯示出好似玩賽車Game咁嘅綠色箭嘴...貼住喺路面...
『連導航都Set好埋...』屌你真係好似請君入甕咁...
「宋本木...都唔知應唔應該話佢體貼好...」綽姿帶住一點點微笑擰擰頭...
我眼定定望住綽姿嘅微笑...
「做乜又咁樣望住我？」綽姿冷眼打量住我。
『冇...冇吖...』綽姿嘅微笑...總係帶住點點親切感...
「冇就開車啦。」綽姿望返上前。
『了解。』我就一俾油...
“依！吱～”架林寶就衝住去！
跟住路上嘅導航箭嘴行駛...
馬路上有車...但唔算多...總算叫暢順...
而燈位都剛好轉綠燈...又或者差唔多轉黃燈...總算俾我啱啱好趕到...
好順利...一開始都好順利...真係好似早就安排好嘅圈套咁順利...
過多兩個燈位...好快就轉咗過去...青山公路...元朗段...
係元朗嘅...舊路？
元朗呢邊...係靠青山公路元朗段出入？
唔知又會唔會有...紅Van？
一路跟住導航箭嘴行駛...一路望望四周...公路情況...
雖然話唔見有其他車輛...但條公路都好似冇受到破壞...堵塞...都係暢通冇阻...
睇嚟...真係靠呢條公路出入...
唔好理喇...而家唔係理呢啲嘢嘅時候...
而家趁住路面冇其他車...應該要踩行油...
“吱！吱～～～”我就踩行油！五六七八波！跟住路上嘅導航箭嘴飛馳！
好順暢...跟住路上長期綠色嘅導航箭嘴風馳電掣...
林寶就係林寶...喺公路上左擘右擘...極速飛馳...非常穩定...
雖然條公路唔係闊...仲有啲窄...
不過以我嘅技術同反應...再加上林寶嘅性能...真係好順手...
好正吖...好爽吖...人生真係至少要有一部林寶呀！！！
“吱！吱～～～”當我再踩盡啲...準備上十波之時...
“嗶！嗶！”擋風玻璃就出現咗啲紅光提示...
呢啲提示...呢啲圖案...有啲似...似係...路障？