《香港傭兵》: [Day 24－三合成立] PART 10
同綽姿沿住單車徑行...行到差唔多見到科學園...就見到...
『圍板...』一塊塊...大大塊嘅白色圍板圍住咗科學園...
我哋再行近啲...再行近多少少...
我同綽姿都留意住啲圍板...成個科學園都俾啲又高又大塊嘅白色圍板圍到實一實...完全睇唔到裡面...
而白色圍板上...仲印有...
『改善工程進行中...』我望住...大大隻藍色...綠色...紅色...橙色...五顏六色嘅精美字句...
綽姿繼續邊行邊留意啲圍板...留意上面啲精美字句...
『咁都得...圍啲板...話改善工程就過到骨？』真係講大話唔使諗㗎喎...
「反正就冇人在意...冇人理會...冇人深究...當局話乜就係乜。」綽姿望一眼踩單車經過嘅途人。
我都留意住經過嘅途人...冇一個在意科學園...一眼都冇望過...
『真係活喺平衡時空...』就喺咫尺之間發生奇怪嘅事...都可以置身事外...勁吖真係...
「唔使理佢哋咁多...或者咁樣對我哋更有利。」綽姿繼續望住圍板行。
『都係吖...就算而家突然再有異常生命體殺出，我哋立即精神化都冇人會在意㗎～』我敢肯定在場嘅人個個都扮睇唔到...又或者冷眼一望就繼續做自己嘅事～
「精神化...」綽姿諗一諗...
『嗯？』做咩？
「睇嚟...我哋都應該要...精神化後入去。」綽姿望住一塊塊白色圍板。
『嗯...要喇...封到實晒...出入口都搵唔到...』成個科學園都俾圍板封到實一實...
綽姿喺褸袋...拎支散發出鮮艷紅光嘅精神液出嚟...
『就...就咁喺度用？』而家呢度...都算係大街大巷...
「唔緊要...」綽姿眼定定咁望實支精神液...
真係...唔緊要？
話就話街上嘅人活喺平衡時空姐...
我都喺褸袋拎支散發出鮮艷紅光嘅精神液出嚟...
真係好鮮艷...好耀眼...
綽姿對眼...望住支精神液...越嚟越困惑咁...
『做...做咩？』又話冇問題？而家又拎住喺手...又唔捏...
「佢話過...」綽姿諗一諗，「製造方法...同其他嘅唔同...」
『嗯？嗯...Owner係有咁講過...』所以先咁鮮艷...咁耀眼？
「嗯...」綽姿點點頭...
『嗯...』我都點點頭後...
我同綽姿同時一捏...手中嘅精神液立即粉碎！分散成散發出刺眼紅光嘅紅色粒子！
無數散發住刺眼紅光嘅紅色粒子就喺我左手手掌中飄出！飄到去手背！
手背上出現...五角星！
一個倒轉咗嘅五角星！發出刺眼紅光！
接住就係有道...暖意由手背傳遍手掌...傳到手臂...全身！
暖...係暖意...
當道暖意游到上頭之時...
「做功課未吖～」
係...女仔聲...
「未吖未吖～抖多陣先啦～」
又...又係女仔聲...
「你睇你睇～呢個得唔得意吖？」
係輕鬆嘅...女仔聲...
「OK喎～等放假我哋過去睇～」
仲要係...女仔嘅...傾計聲...
「一件天使蛋糕吖唔該～」
仲有...女仔嘅...點嘢食...
「你有冇聽過吖？西貢獻命班人...好似周圍捉女仔...」
又有...另一把少女聲...
「有吖有吖！我聽我個妹講呢...佢有個同學成個禮拜都冇返學...失咗蹤...懷疑係俾西貢獻命捉走咗吖！」
又有另一把...少女嘅甜美聲...
「嗯嗯～真係好好味喔～你都試吓～」
呢把聲...呢把女仔聲...
「嗯～好乖乖～坐定定～」
係羅羅把嬌嗲聲？！
「呀呀嗯～好好味吖～我又餵你～」
係羅羅...我認得...我記得...
「尋日返屋企嘅時候見到！我買咗兩份～拎部手機出嚟，我幫你貼吖～」
又有另一把...另一把甜美嘅女仔聲...
「嗯～好吖～」
呢把聲...甜美嘅女仔聲...好熟...又有點陌生...
「跟住就到我嗰部...」
呢把又係...好熟...係...
「搞掂～咁我哋兩部電話都一樣喇～」
係茵婷...係茵婷把甜美聲！我認得...我記得！
「好靚吖～多謝你吖～」
係綽姿把聲...的確係綽姿把聲！
「多咩謝姐～我哋好姊妹嚟㗎嘛～」
係綽姿...同茵婷...
「嗯～好姊妹～」
係綽姿...同茵婷...好開心...好歡樂...好溫馨...
點會...點會聽到...
我望一望...身邊嘅綽姿...
綽姿已經除咗件黑色大褸...Dom喺石壆上...笠起頂帽...拉高衫領...
頭先...頭先聽到...聽到嘅對話...明明...明明...
綽姿陰暗嘅面容之中...兩點紅光望住我：「手腳快啲得唔得？趁住而家冇人。」
『哦...係係...』我望望街上...單車徑上...冇人冇單車...
我就快快手手咁除件黑色大褸Dom喺石壆上...笠起頂帽...拉高衫領...
我同綽姿再左右望多兩眼...確保遠遠都冇單車駛緊過嚟...就用力一跳...跳過高高嘅白色圍板...跳入科學園...
一跳入科學園...立即提高警覺...提高視力...橫視四周...
四周都冇人...亦感覺唔到有生命嘅氣息...
而周圍嘅環境...都係同嗰晚差唔多...嗰晚撤離嘅時候差唔多...
地上有爪痕...有刀痕...
牆上都有...亦有被爪斷嘅燈柱...被斬斷嘅路牌橫瞓喺地上...
戰爭過後嘅痕跡都未清除...仲留喺原位...
唯一唔同嘅...應該就只有...屍體...
之前散喺地上嘅人體殘骸...仲有血跡都消失晒...
係已經清理咗？
有人嚟清理過...淨係嚟清理屍體？
『所有屍骸都清理晒...』我行前兩步...望望四周...
「過咗咁多日...清理晒都好正常。」綽姿都行前幾步...觀察四周。
『周圍一個人都冇...』我就跟住喺綽姿身邊行...左望右望...
「應該全個地面以上...」綽姿抬頭望望建築物，「所有建築物都冇人...就算有...都唔多。」
『咁啲監控系統呢？』我望住燈柱之間嘅黑色半圓球體...
「唔知。」綽姿只係眼尾望一眼個黑色半圓球體...繼續向前行。
『唔知？咁俾人見到我哋潛咗入嚟咁點算？』咁咪俾人發現囉...
「如果係，自然會有人恭迎我哋。」綽姿一直行。
『咩人會恭迎我哋吖？守衛吖？』話晒我哋都係不速之客喎...
「咩人都好。」綽姿繼續行。
吓？真係咩人都好？好似唔係咁好吖化...
同綽姿沿路一直行...行返我哋嗰晚行過嘅路...
四周都冷冷清清...就只有大戰過後所遺留嘅痕跡...
爪痕...刀痕...真係佈滿四周...
繼續行...行到去差唔多到我哋嗰晚入過嘅建築物...離遠我就感覺到...有兩個...
離遠向前一望...就望到有兩個黑色嘅身影...企喺入口前...
有人...立即提高視力睇清楚...係兩個黑色Full Gear守衛...
真係...真係有守衛等緊我哋...
只見綽姿繼續行...冇打算停下腳步咁...向住守衛嘅方向繼續行...
真係冇問題？
再行過去...再行近過去...會被發現㗎喇喎...
雖然話綽姿都仲係Keep住步速行過去...但明顯提高咗戒備...
咁我...我都只好提高戒備...行過去...
再行多幾步...兩個守衛終於發現我哋正在近接...其中一個行前一步，同我哋揮揮手：「咦？你哋...嚟咗吖？」
咦？識㗎？
只見綽行到去兩個守衛面前停低...點點頭...
雖然守衛塊面都俾黑色口罩遮住，但就望到佢對眼帶住疑惑咁打量住綽姿：「呃...之但係...我哋收唔到通知...話你哋今日會嚟喎...」
收唔到通知...
綽姿冷冷一句：「我唔知你哋係咩情況...但我哋收到委託要嚟呢度。」
「呃...咁...」兩個守衛對望一眼，「你哋等等先...我再Call上去問問...」
然後一個守衛行埋一邊...另一個守衛就𥄫實我哋...
至於綽姿...繼續提高戒備...比起頭先提得更高...
我可以感覺到...綽姿身上嘅氣息...
就好似...好似蓄勢待發一樣...
係預備好...萬一佢哋唔俾我哋通過...有乜唔對路...就先下手為強？
應該係...我都要做好準備...準備好...有乜唔對路...立即拔刀一閃...
我提高戒備...留意住喺身邊...𥄫實我哋嘅守衛...留意住企埋一邊點緊頭嘅守衛...
過咗一陣...企埋一邊嘅守衛點住頭咁行返埋嚟：「嗯嗯...了解...你哋要去邊㗎？」
綽姿指一指地下...
守衛又口噏噏：「落去地下研究所...哦...哦...了解...你哋可以落去喇。不過...」
綽姿冇等到守衛講完，就行過佢哋身邊：「唔該。」
就咁...就可以...
我都跟住喺綽姿身邊行...
「真係有通知佢哋會嚟㗎？」
「唔知吖...上面都唔知...話唔好理佢哋喎...」
「吓？」
「總之上面話唔好理就唔好理啦...反正佢哋嘅事都唔到我哋理...」
「但係我哋...」
「唔好但係喇...佢哋唔係我哋理嘅範圍...理返我哋範圍嘅嘢啦...」
我同綽姿就行到嚟升降機前...
升降機門仲未整返好...仲係爛嘅...只係用立體投射柱投射兩條封鎖線...
『真係冇問題？』我穿過封鎖線...探頭望入𨋢槽...望落下層...牆身仲係有唔少爪痕...
升降機都仲未開始維修...咁下面...
「佢哋唔知咁多...就利用佢哋嘅無知。」綽姿都行過封鎖線，企喺破爛嘅𨋢門邊緣。
『都啱嘅...利用佢哋嘅無知...少啲麻煩...』假如淨係得佢哋兩個嘅話...
唔知仲有邊度有人...下面咩情況...
「快啲落咗去先...無謂夜長夢多。」綽姿踏前一步...跳落𨋢槽。
我都喺𨋢門邊踏前一步...一跳...
由𨋢槽急速向下跌...
一路向下直插...跟住綽姿...一路急速向下直插...
然後我就見到...𨋢槽牆身有條長長...長長嘅刀痕...一路向下直落...
係我上次...跳落嚟嘅時候...用精神刀插入牆身減速...
今次...我諗唔需要...
今次...我想好似綽姿咁...唔需要靠任何嘢減速...直接到底...到底...
我直望住下面...留意住綽姿...
當綽姿一跳落升降機殘骸之中...立即向破爛嘅𨋢門一跳...跳咗出去...
當我都跳落升降機殘骸之中之時...同綽姿一樣...立即向破爛嘅𨋢門一跳...跳到出升降機大堂...
成功...好成功...完美咁落地之餘...仲好型咁跳到出升降機大堂之中...對腳連少少痛嘅感覺都冇...真係完美滿分...
而喺升降機大堂裡...除咗我同綽姿之外...仲有...其他人...
有個托住條梯嘅...裝修師傅企定定望住我...
又有幾個抽住兩桶油嘅裝修師傅企定定望住綽姿...
仲有幾個踎喺地下唔知搞緊乜嘅裝修師傅呆晒咁望住我哋...
咁...咁多裝修師傅嘅？