《香港傭兵》: [Day 24－三合成立] PART 30
成個空間靜晒...好似等緊我數一二三...
『嗱咁我數喇...三...二...一...』當我數到一之後...
兩把紅光刀刃同一把綠光刀刃都係咁光咁亮...
「做咩唔收吖？」
「你哋夠唔收咯...」
「我就係知你唔收所以我先唔收！」
「我夠係知你哋唔收所以我先唔收...」
「你唔收我哋又點會收吖？」
「你哋唔收我又點會收？」
「你唔收我哋點收吖？」
「你哋唔收我又點收？」
「你收我哋咪收囉！」
「你哋唔收我唔收...」
「你唔收我哋點收？」
『好喇好喇好喇...大家都唔好收喇...』我就真係冇佢哋咁好氣...坐喺餐檯前嘅木凳上...
唔收咪拎嚟做電筒囉...
「唉～」梓翹都冇咁好氣，行去...斟水。
『究竟發生咗咩事...』我回頭望一望羅羅同日倫，『點解你哋會上咗嚟？』
羅羅拎住把精神刀Fing兩Fing：「講起上嚟就真係...多得嗰個杜王土！」
『Owner？』又關Owner事？
羅羅谷住塊面豬登點點頭：「咪係佢囉！佢話有另一個地方要我哋兩個去...就係嚟小欖！」
『佢叫你哋嚟呢度？嚟呢度做咩？』Owner叫我哋去科學園...破壞咗SPIRIT同國安局嘅關係...
咁叫羅羅同日倫過嚟小欖...
羅羅擰擰頭：「佢冇講吖...淨係叫我哋過咗嚟就知...話晒佢曾經都係預行者...咁我哋咪聽佢講走過嚟囉...點知一過到嚟就見到佢哋兩個！就俾佢哋夾咗上嚟喇！」
梓翹斟咗幾杯水，放到餐檯上：「又唔好講到夾～我哋係請你哋上嚟姐～」
「請...」羅羅谷起塊面豬登望住梓翹，「你哋精神化喎...」
梓翹一面無辜：「係你哋精神化先咋喎...」
日倫立即回答：「見到你哋兩個...就梗係精神化咗先啦...」
梓翹帶住微笑摸摸頭：「你哋太敏感喇～」
日倫繼續提高戒備：「一早就知你哋兩個唔簡單...又點可以唔敏感...」
一早就知...係指...上次帶日倫去Today Coffee...
而家諗返...唔怪之得...當時佢哋嘅對話好似怪怪地咁...
羅羅一直谷起塊面豬登...凝視住梓翹...
梓翹尷尷尬尬咁：「你哋唔好咁望住我啦...飲水先～飲水先～」
我就拎起杯水...
日倫搭一搭我膊頭...
『冇事嘅...』我擰一擰頭...飲啖水...
仁慈都拎起杯水：「唉～搞咗咁耐真係攰死～都係飲啖水先～」
綽姿都坐喺我身邊...拎起杯水嚟飲...
子茵都冇咁好氣...收返埋把精神刀...拎杯水飲...
羅羅同日倫見子茵收刀...亦都收返埋把精神刀...拎起杯水...望一望...
『係呢...』我飲啖水望住羅羅，『你哋支精神液...都係Owner俾你哋？』
「嗯...」羅羅點一點頭...
『果然...』我就感覺到...羅羅同日倫嘅氣息強咗好多...
「係唔知...」日倫喺我耳邊細細聲講，「可以維持幾耐...」
『維持幾耐...』我諗一諗，『我到而家都仲未進入深層睡眠...』
「咁耐？」日倫打量住我，「冇補過？」
『冇...』我擰一擰頭，『一直都只係靠Owner俾我嗰支Keep到而家...』
羅羅打量住仁慈...喺我耳邊細細聲問：「點解你哋會同逆行者一齊出現？你哋發生咗咩事？」
『我哋吖？』我望一望仁慈，『呃...點講好呢...佢係仁慈...喺之前我哋就合作過...嗰時佢仲係SPIRIT嘅行者...』
「Hi～」仁慈帶住微笑向羅羅揮揮手～
「Hi...」羅羅向仁慈點點頭後，再喺我耳邊細細聲問，「咁點解佢而家會係逆行者？係叛變？」
『呃...』點講好呢...
仁慈飲住水指指梓翹：「多謝佢放過我囉～」
梓翹又尷尷尬尬摸摸頭：「又唔好咁講～係命運嘅安排姐～」
羅羅又凝視住梓翹...
日倫接住問：「咁你哋頭先發生過咩事？」
『講起嚟就一匹布咁長...』我諗一諗，『簡單啲嚟講我哋俾Owner利用咗去破壞SPIRIT同國安局嘅關係...然後仁慈救咗我哋...』
「逆行者...」日倫打量住仁慈，「救咗你哋...」
仁慈帶住微笑點點頭～
「究竟...」日倫疑惑咁諗，「而家係咩情況...」
講到而家係咩情況...我真係唔知...
但我有樣嘢...又好想知...
我打量住梓翹：『究竟...你係幾時發現...我係SPIRIT嘅行者？』
「我吖？」梓翹諗一諗，「好早之前...早喺第一次遇見你之前...早喺你仲未成為SPIRIT嘅行者之前～」
早喺...我未成為SPIRIT嘅行者之前...
梓翹帶住微笑點點頭：「所有嘢...看似偶然...其實係必然～」
『所謂嘅...偶然之必然...』
梓翹同日倫都點點頭...
日倫開口問：「究竟你哋仲知道啲咩？將會發生咩事？而家屯門入面...已經聚集咗好多行者...」
梓翹帶住微笑擰擰頭：「你一次過問咁多...我點答呢？你係調查型...應該知問嘢係一步步...唔係一輪嘴...睇嚟你好心急喎～」
日倫冇出聲...飲咗啖水...
梓翹都飲啖水繼續講：「其實我都唔係好清楚...我都係跟指示做～」
跟...指示？
梓翹帶住微笑點點頭：「我哋而家逆行者...其實都係同SPIRIT時候一樣...都係只需要知道自己需要知道嘅事就足夠～」
日倫接住問：「咁係邊個指使你哋？」
梓翹帶住微笑打量住日倫：「宋本木～」
宋...伯伯...係喎！
『宋本木佢而家喺邊？』既然宋伯伯知咁多嘢...不如直接問佢！
就喺呢個時候...
「你搵我吖？」宋伯伯把聲由背後出聲...
我...綽姿...羅羅同日倫一齊擰轉頭...望住門口...
門口就正正...企咗一個身影...
喺背光之下...呢個身影就好似聖光一樣...發出光芒...
發光一樣嘅身影行前兩步...就可以清楚見到身影主人就係...
『宋本木...』我望住著住白色長袍...白色頭髮Undercut髮型...帶住慈祥微笑望住我嘅宋伯伯...
「我哋又見面喇～少年...」宋伯伯再行近多兩步...
羅羅同日倫立即提高戒備...
「唔使咁緊張～」宋伯伯攤開雙手，「唔使咁緊張～都上得嚟咯～仲需要緊張啲咩呢？」
日倫打量住宋伯伯：「宋本木...天門...唔止...仲有係逆行者嘅最高決策人...我哋又點可以唔緊張？」
「唔係唔係...」宋伯伯帶住慈祥嘅微笑擰擰頭，「我諗你搞錯咗啲嘢...我所指嘅都上得嚟...係指你哋都肉隨砧板上～仲要緊張啲乜呢？」
肉隨...砧板上...
即係話...死到臨頭...緊張嚟都冇用...
「不過話分兩頭...」宋伯伯都行埋嚟餐檯，拎起杯水飲一啖，「亦即係話上得嚟都冇對你哋點...咪即係唔會點囉～」
又話上得嚟都冇對我哋點...又講到咁玄...咁即係點？
宋伯伯冷眼望住我：「做乜咁望住我姐？唔順吖？」
『唔係...』點敢唔順吖...肉隨砧板上吖嘛...
「咁好喇～」宋伯伯飲完杯水後，放返低隻杯，「人齊就行得～」
行...行得？
宋伯伯轉身行返出門口...
梓翹同子茵都跟住行出門口...
仁慈都起身，拉一拉我：「行喇行喇～」
『行...行去邊吖？』我就俾仁慈半推半就咁...
仁慈再拉起埋綽姿：「咪就係要去嘅地方囉～」
要...要去嘅地方？
羅羅同日倫對望一眼之後...都跟住我哋一齊行出門口...
我哋所有人都跟住宋伯伯身後...向住右邊遠少少...座舊嘅建築物行...
肉隨砧板上...宋伯伯唔講...我都唔覺...
不知不覺又好似身陷險境...
真係冇問題？就咁跟住佢哋行...
有冇問題都已經唔到我哋去考慮...肉隨砧板上吖嘛...
之但係...而家嘅我...應該都唔算係一塊普通嘅肉...
一直向住舊嘅建築物行過去...
羅羅一直都好似...好在意梓翹...
一直留意住...羅羅一直凝視住梓翹...
梓翹就好似平日咁...從容不迫咁...跟住宋伯伯身後行...
至於子茵...就久唔久眼尾望一望日倫...好似對日倫好提防咁...
定係其實子茵對個個都係咁提防？
我都唔知...我都唔係好了解子茵...唔係...
應該話佢哋冇一個我係了解...
佢哋四個逆行者又好...日倫...羅羅...甚至綽姿...甚至我自己...
仁慈一直跟喺我哋身後行...行到入舊建築物...
真係好似夾住嚟行...
而入到嚟舊建築物...裡面殘殘舊舊...一大個空間...有一碌碌舊柱...勁多瓦礫碎石散到一地都係...
而樓底都好高...直頭見到成座舊建築物嘅天花...
唔係...再睇真...係成座舊建築物打通晒...
中間每一層...全部打通...
我仲見到柱...同牆身...仲有生晒銹嘅鐵支撐出...
係日久失修自己塌落嚟？
咁個頂又會唔會塌埋落嚟...
而喺成個室內空間...冇任何嘅照明系統...
就連搵盞燈睇睇都冇...
完全係靠室外嘅陽光...透過爛晒嘅窗照入嚟...
而宋伯伯就帶住我哋行...一直向住最中間...一大個鐵籠嘅位置行過去...
呢個大鐵籠...係咩玩法？
當行到嚟大鐵籠面前...
“咔！咔咔咔！”宋伯伯拉開大鐵籠嘅鐵閘...
宋伯伯扭扭自己隻手，擰擰頭：「唉...年紀大咗...拉開個閘都手痛...」
我哋就跟住宋伯伯行入大鐵籠...
當我哋都行晒入大鐵籠之後，宋伯伯指指個鐵閘：「幫我拉返埋佢啦～少年...」
『我？』我指一指住自己個鼻...點解係我？
宋伯伯再扭扭自己隻手腕：「我手痛吖～幫幫手啦～」
『哦...』我就只好幫宋伯伯拉返埋個鐵閘...
“咔！咔咔咔！啪！”
宋伯伯再指指個“向下”嘅掣：「撳埋啦～」
『哦...』我又撳撳個掣...
“咔！吱...”地板隨即向下降...
係...原來係升降機？
我哋一直向下...向下...慢慢向下降...
越嚟越黑...越嚟越黑...
我都...提升視力...但實際上冇乜嘢望...就只係四面殘舊嘅牆身...
『我哋而家究竟去緊邊？』一直向下降...慢慢咁向下降...
「去緊邊...」宋伯伯諗一諗，「咁心急嘅你～不如聽個故仔先啦～」
聽...聽故仔...
宋伯伯點點頭：「好耐好耐好耐之前...有一個人...推測呢個世上有三種原核...佢深信只要搵齊呢三種原核...呢個世界就會有所改變～」
三...三原核嘅故事？
宋伯伯繼續講：「佢決心創立一個組織...去搵呢三原核...但嗰陣時係古代...普遍嘅人只係會視作為聖物...或者係邪物...所以佢就將呢個組織...定為地下嘅宗教組織...避開當時主流嘅宗教耳目～」
地下嘅宗教組織...避開宗教耳目...
宋伯伯繼續講：「呢個地下宗教組織...就係SPIRIT～」
係SPIRIT嘅...起源...