《香港傭兵》: [Day 24－三合成立] PART 45
..
...
當我再次有返...意識...
當我眼前...再次...模模糊糊...矇矇矓矓...開始...有影像...
藍...好似...好似有一層...藍...藍...
藍藍地...藍藍地...總係好似...藍藍地...
藍藍地色...藍藍...
我努力睜開雙眼...努力聚焦...影像開始...有輪廓...但仲係藍藍...薄薄一層...藍...
藍色...薄薄一層藍之間...我見到...我見到眼前係一條...路...
一條都幾闊...鋪滿咗碎沙石...佈滿裂紋嘅...馬路...
而喺我身處嘅馬路...左邊係山區野草...
野草好長...好密...生得又長又密嘅野草...綠綠...藍藍...
雖然眼前仲係薄薄一層藍...但野草本身應該就係綠色...
而前面...再遠啲...遠遠嘅係...山崖...山崖前仲有一張木製嘅圓形小餐檯...
應該係山崖...雖然我而家呢個距離睇唔清...睇唔到盡頭...但照而家呢個高度...應該喺山上面...
呢度...呢度好似...好似係...
而且而家...係日頭...
太陽...仲喺天上...
雖然唔算太曬...但我係感覺到...陽光...
除咗感覺到陽光...我仲感覺到身邊...有人...
我擰個頭望望身邊...身邊正正就有...三個身影...
我再睇清楚...有一個著住溶溶爛爛嘅黑色長袍...長長黑髮嘅...男人...
男人睇落都應該有...四十歲左右...
而喺男人嘅腰間...有把...日本刀...
然後...喺黑長髮男人身邊...有個同樣著住溶溶爛爛嘅黑色長袍...長黑髮...睇起上嚟幾靚女嘅...三十歲左右女人...
呢個三十歲左右嘅女人腰間亦都係有把日本刀...
而再過啲...企喺女人身邊...就企咗個...嬌小嘅身影...身上著有深色皮甲喺面嘅黑色長袍...
唔係...唔係...再睇清楚啲...唔止有皮甲喺面...仲有啲金屬板...裝甲...
由布...皮甲...同金屬裝甲縫製已成嘅裝備...腰間亦配有把日本刀...
再睇清楚...呢個著住由布...皮甲...同金屬裝甲縫製而成嘅裝備嘅嬌小身影係...綽姿？！
的確係綽姿...的確係一面冷漠...短髮，中間分界，前陰中間分開到下巴尖，兩邊鬢髮卻長到落微微凸起嘅胸前嘅綽姿...
點會...點會...綽姿點會著住...呢一身裝備？
綽姿呢身裝備...明顯就係同我哋SPIRIT唔同...好大分別...
但你以為...以為綽姿著上咁奇怪嘅裝備...企喺身邊就好驚奇？
未算...
更驚奇嘅係...喺我身後...啱啱行前幾步...行到嚟我身邊...
我好自然咁...擰個頭過去...望一望身邊...著住一身...輕皮甲裝嘅...阿月？
點解...會係...明明係...係阿月...而家企喺我身邊...喺正我面前...明明就係我最深愛嘅阿月...
點會...點會一身輕皮甲裝...腰間仲要配有日本刀...
唔止...唔止阿月...就連我...我嘅護手...護腕...護臂護腿護肩護胸護甲...全部都係以皮革製造...
而且...喺我嘅腰間...腰間亦都配有日本刀...
點解...點解我身上嘅裝備...會同...會同阿月一樣...
就好似...同一個組織...同一個部隊...
究竟發生咗咩事...我...同阿月...
再睇清楚...眼前嘅阿月...的確係...一直都唔老...一直都仲係好似十𡃁歲咁𡃁妹嘅阿月...
而當我想開聲...嗌阿月...
嗌唔出...嗌唔出聲...開唔到口...
唔止...唔止開唔到口...仲郁唔到...
全身上上下下...都郁唔到...成個人硬晒咁企定定...控制唔到...好似俾人點咗穴咁...
點會咁...點解會...我同阿月...仲有綽姿...
而喺我哋身邊嘅呢對男女...又係咩人？
突然...
「終於都嚟到～」右邊有把慈祥嘅伯伯聲...
我好自然...應該話好似唔受控制咁...自動波咁擰個頭向右邊...
我一擰個頭去到右邊...就望到...右邊有一間木建小屋...
呢度...呢度明明就...應該係...係小欖山頂...
雖然路面鋪滿咗碎沙石又佈滿裂紋...好似幾經風霜...成百年冇維修過咁...
而山區野草又長又密...好似成百年冇人踏足過咁...
就連間木建小屋都唔似係宋伯伯嗰間...比起宋伯伯嗰間再殘舊啲...再古式啲...
所有嘢都再荒涼啲...再殘舊啲...再飽經風霜啲...
但呢個環境...四周嘅環境...而家我身處嘅環境...明明就係...小欖山頂...
點會...我又點解會...
木建小屋嘅大門之間...走出一個著住白色長袍嘅身影...
再睇清楚啲...呢個著住白色長袍...濃密嘅白髮...All Back髮型...髮長到肩...面上長有白鬍鬚...仲有少量皺紋嘅伯伯...
幾多歲呢？七十？八十？我又分唔到...
總係覺得佢有七八十歲...但外型同面貌又好似再後生少少...
仲有...喺呢個伯伯身上...總係散發住光芒...
整體嚟講...佢成個人俾我嘅感覺係...好似...一個歷史人物...傳說中嘅...耶穌...
耶穌伯伯帶住慈祥嘅微笑...再行前兩步...行出幾步...喺佢身後...又有身影由木建小屋嘅大門之間步出...
唔止一個...後面又有一個...陸陸續續...由木建小屋嘅大門之間步出...
然後...而家喺木建小屋前...就企咗...六個身影...
耶穌伯伯企喺中間...左邊企咗一對男女...右邊企咗兩女一男...
就咁睇呢班男男女女...年齡都係介乎廿幾三十...三十幾四十...
而佢哋身上嘅衣著...都唔算話好一致...
左邊兩個年約三十多歲嘅男女...身上著上...黑色緊身衣...
黑色緊身衣...就只有黑色...緊身衣...
男嘅長有白短髮...而女嘅...就咁離遠睇...有啲似...阿月...
面形輪廓...氣質...都有啲似...成熟咗嘅阿月...
點...點會...
「媽咪～」身邊嘅阿月跑向黑色緊身衣女人面前...
媽...媽咪？
黑色緊身衣女人與阿月相擁...
點...點會...阿月點會叫呢個女人做...媽咪？
黑色緊身衣女人攬住阿月喺懷裡：「太好喇...平安返嚟喇...」
平...平安返嚟...
企喺佢哋身邊嘅短白髮男人搭住佢哋搭頭：「都話咗冇事㗎啦～你睇～阿囡都冇穿冇爛～」
阿囡...佢哋係...兩公婆...阿月係佢哋個囡？！
黑色緊身衣女人谷起塊面豬登，怒視住短白髮男人：「你仲好講？！叫你帶阿囡返嚟，你出咗去又空手而回！點做人爸爸㗎？！」
點解...佢哋三個...真係幾似樣...明顯就係一家人...
之但...點會...明明阿月嘅父母...我都見過...唔係咁嘅樣...肯定唔係佢哋兩個...
短白髮男人尷尷尬尬摸摸頭：「咁...阿囡話要幫公公手...搵舅父返嚟吖嘛...」
舅...舅父？
黑色緊身衣女人攬住阿月...怒視住耶穌伯伯...
耶穌伯伯又扮晒傻咁頕天望地...
究竟而家係...咩情況...啲人物關係好似...咁複雜...
然後...企喺耶穌伯伯右邊嘅兩女一男...都係著住黑色長袍...
呢種黑色長袍...同我身邊對男女身上嘅黑色長袍有啲似...但就冇穿冇爛唔溶溶爛爛唔殘舊...
仲睇落...有啲似...我哋平時著開...SPIRIT嘅行者長袍...
而喺佢哋三個當中...有一個女仔睇起上嚟比較年輕...大約廿幾歲...
另外一男一女...就年約四十歲左右...
佢哋兩個...一直都...一直都望住我...帶住慈愛嘅微笑...望實我...
然後...女嘅首先開聲：「終於都見到你喇...我哋嘅兒子...」
兒...子...叫我？
我...我點會係佢個...
喺我身邊嘅長黑髮男人行前一步：「話晒我都幫你照顧咗你哋個仔一段時間...你同你嘅青鳥諗住點報答我先？智海...」
智...海...
帶住慈愛嘅微笑望實我嘅男女對望一眼後...笑笑口點點頭...男人望住長黑髮男人：「最多我同老婆親自下廚～煮返餐好嘅俾你哋食啦～」
智海係...我老豆？
點會...我...我老豆...邊有咁型吖？
「就係咁就想打個和？」長黑髮男人望咗我“老豆”一眼後...再望住最年輕嘅少女，「我都未同你哋計...出賣我...綽瑩...」
最年輕嘅少女帶住微笑點點頭...
長黑髮男人打量住最年輕少女：「果然真係...當年喺雨中賣傘嘅學生妹...果然就係你...當時我就應該估到...」
最年輕嘅少女帶住微笑望住長黑髮男人：「又唔可以話我哋係出賣你～只係...我哋都係照計劃行事...而且...你同我細妹唔係生活得幾好咩？」
細...妹...
長黑髮男人帶住一點點尷尬：「照計劃...死海文書...出賣我都係死海文書嘅一部份...」
死海...文書...又係...死海文書...
長黑髮男人冷眼打量住耶穌伯伯：「阿霖...阿晴...尚冬...阿盈...阿燁...當年我命佢哋嚟監視你...而事實上...佢哋一直都係為你做事...聽從於你...如今...仲要喺深井大本營成為五人眾...主持大局...唔使問...幕後黑手又係你啦...」
耶穌伯伯帶住慈祥嘅微笑...擰擰頭：「又唔好咁講～講到我咁大陰謀咁...我都係將死海文書實現出嚟姐...你唔係都同我一樣...以畢生努力去實現死海文書咩？我嘅兒子...」
吓？長黑髮男人係耶穌伯伯個仔？
等等先...等等先...直到而家...啲關係好複雜喎...
不過...複唔複雜都唔好理住...理解得幾多就得幾多啦...
「哼...」長黑髮男人翹起雙手，「你係想講我只係理解到一少部份...我只係其中一隻棋子？呢點...都過咗咁多年...我好清楚...你唔使嚟挖苦我...」
過咗咁多年...即係幾多年...
耶穌伯伯帶住慈祥嘅微笑...擰擰頭：「我又邊係挖苦你呢？你又唔好成日都咁諗我先得㗎～話晒我哋都係坐埋同一條船～大家都係想實現死海文書姐～」
長黑髮男人唔出聲...
耶穌伯伯繼續帶住慈祥嘅微笑講：「我知你㗎～俾你知道死海文書嘅全部內容...你一定唔會照住去實現～就只有...要你一步一步...親身體驗...」
「哼...」長黑髮男人冷眼打量住耶穌伯伯，「你認為而家...親身體驗過嘅我...會照住死海文書去實現咩？」
耶穌帶住慈祥嘅微笑...點點頭：「如果唔係...你又點會上嚟？」
「我上嚟...」長黑髮男人摸摸腰間嘅日本刀，「係搵交打㗎...」
搵...搵交打？
要...開波吖？