[讓謊言與虛偽堆砌成我們的最後樂土]《終末後．新世界》: 20-避難所

「俾人追殺嗰個女仔……會唔會就係我地啱先見到嗰個人？」阿俊說。
「冇人知……」我回應。
「你地要小心啲。我地目前知道兇手可能係『新世界議會』嘅人……」電話裡阿欣說：「如果佢地要喺呢種時候殺人，好可能本身就同世界末日有關係……甚至可能連個網絡監控都係佢地搞嘅。」
「*唔*係喎……佢地都懷疑係一個暗網組織搞呢件事……」我想起印有「被提」一字的那個網頁，說。
「咁賊喊抓賊都有可能嘅。」阿欣又回應。
「你地要小心……有啲咩事情第一時間call我地。我地睇下可以點幫你地。」阿慈說。
我和阿俊呆滯地望著城門河。
「咁而家一定唔會返去屋企送死㗎啦……所以我地去邊過夜好？」阿俊率先開口問。
「我而家諗到一個好白痴嘅地方……」我回應。
一會之後，我們故意繞過新城市，為了安全起見走了更遠路程的冤枉路，來到Homesquare(新城市一旁的商場)。




Homesquare和新城市商場一樣都很寂靜，但是地下幾乎沒有多少屍體，可見Homesquare平時的人流其實比較少。
我和阿俊兩個站在地下層的廣場上。
「去頂樓IKEA。」我說。(註：「IKEA」，即「宜家家居」，通常佔商場幾層、專售家用品的大型店舖，裡面會有模擬的家居單位。)
「*……咁痴線嘅嘢都俾你諗到。你都真係幾痴線……」他說。
IKEA裡有模擬單位，可以充當臨時的居所，環境還挺舒適的，裡面還有賣餐點和包裝食物的地方，既提供住宿的地方同時也保證了食物供應。還有，議會的人就算想殺害我們，也不會想到我們竟然會來到這種地方，是很安全的庇護所。
「一流嘅避難所。」阿俊稱讚道。我們爬了幾層的扶手電梯，來到頂樓前一層，那裡是IKEA的入口。
「入去揀單位啦。」我說：「*……對於我呢啲一世都買唔到樓嘅窮*……世界末日反而俾咗機會我地周圍揀地方住。」
「香港啲樓真係好*貴，要末日先有自己樓住。」阿俊吐槽道。
走過一間懷舊風的單位，裡頭照明的燈泡被由紙條做的球籠遮去了一部份的光，那是為了襯托房間的氣氛而設計的。
「呢間？」我指著那個單位問。




「*是旦啦，就呢個。有得你住仲唔住？」阿俊答。
聽著他的回答，我不禁以做閱讀理解卷的方式，將他和香港人買樓的心態扯上關係。
「你上格床定我上格？」我又問。
「我下格啦。」阿俊答。
阿俊向單位走了過去。
我們各自將行裝放到床上，然後就躺了上去，各自玩起手機來。
「喂，我SMS同沙角嗰兩個人講聲我地喺邊。」阿俊說。
「好啊。」我回應。
「擺定把鋸出嚟……一陣間有咩事都可以同人打。」阿俊又說。
下格床傳來背囊被拉開還有東西被翻動的聲音。




我把手機放在一邊，放鬆地平躺在床上，閉上雙眼。
此刻的我正幻想著自己在家裡熟悉的床褥上躺著，今天所經歷的一切都只不過是過度疲憊的錯覺……