「我地係『新世界議會』,顧名思義,我地呢度嘅人就係用我地弱小嘅力量嘗試重建新世界。」
他想在已經崩解的世界創造一個新世界。阿源望向草地外的沙田夜景,看起來很有抱負地說著。
「你地會唔會加入我地?」阿源接著就問。
「我地就……」在我猶豫著要作出什麼回應的時候,阿俊搶先回應道:「唔啦……我地始終比較想返屋企打打機過日子。」
「係囉……我地唔太慣同咁多人一齊。」我也附和道。我原先其實是想說「同咁多陌生人一齊」。
「好快就慣㗎啦。」阿源似乎想挽留我們。
「唔啦。我地應該唔會想留喺度。」阿俊再拒絕。
「咁好啦……」阿源面上難掩失望的神色,這時又說:「你地住邊,可唔可以俾俾地址我?」
「你地……要我地地址嚟做咩嘢?」阿俊質問。
「之後有咩急事都可以搵到你地啊嘛。」阿源答。




阿俊沉默了,阿源則打開手機記事簿,繼續說:「留一留底個地址、同手機number喺度啊。」
剛才阿源說過阿陶是負責資源管理,就是說議會其實有一定程度的物資儲備,和他們留下聯繫方法、為自己留一條後路也是一件好事。議會看起來又不像是什麼懷有惡意的組織,就只不過是生還者的團體。區區地址就給他們吧。
「好。」阿俊果不然還是答應了。
「咁你地準備返去啦?」阿源問。阿俊和我點頭。
「你地要小心。」阿源又向我們說。
一會以後,草地的人們紛紛向我和阿俊兩個人互相道別,我們便經空寂的商場打算回去阿俊的家。
路上,阿俊突然說起:「我真係好唔慣應酬咁多陌生人。」
「我都係。」我附和道,但又說:「不過都係好事嘅……知道咗仲有咁多人未死。」
「都係嘅。」阿俊回應:「新世界……」
望著無人的商場室內,阿俊這時提議:「去7仔買買嘢飲?」




「好啊。」我同意。
「如果……」我說,然後欲言又止。
「咩?」
「冇嘢……我喺度諗,就算真係比佢地整到個『新世界』、整到個『新香港』出嚟,救到仍然仲生存緊嘅人,但係就對已經死咗啲人就束手無策……唔會好唔公平咩?」我毫無邏輯地亂說一遍:「成個沙田都冇哂活人……淨係得塊草地上面嘅人仲生拗拗……」
「阿和。呢個世界唔係本身就係咁咩……」阿俊回應:「始終『人死不能復生』。公平唔公平都好,我地冇辦法。」
來到7-11便利店,我和阿俊從冰箱中取過罐裝飲料,拉開扣環就暢飲起來。
突然,店舖旁邊有一位身穿很熟悉的校服的女生走過,我和阿俊望了過去。
看她的樣子好像很疲倦的、神情很呆滯,她似乎並沒有注意到我們兩個。
「佢同沙角商場個女仔一樣,都係沙官學生……但係睇樣就唔係同一個人。」阿俊說,拿出了手機,又說:「通知一下佢地兩個先。」
他在whatsapp打訊息,一會就把手機收起來。




「同佢地講咗?」我問。
「已經講咗但係佢地未仲讀message。」阿俊答。
「咁啊……」我回應。
女生向我們來這商場的時候的那邊入口走去,消失不見。
已有 0 人追稿