十六歲但非處子身嘅女孩: 1.2 十六歲生日

離開party room 後，我自己一個搭地鐵由葵芳去荃灣站，一路戴住head phone 聽周杰倫嘅歌，一路搭車。周杰倫係我其中一個最鐘意嘅歌手，當然我最鐘意嘅都係佢嘅情歌
我將佢嘅歌擺曬入 play list 之後再隨機播放，咁啱第一首播到嘅歌就係《告白氣球》，呢首歌充滿住回憶，仲好記得Cyrus 都好鐘意聽周杰倫，我地舊時拍拖嘅時候係一定會一齊聽，佢果陣時就係唱告白氣球之後同我表白

唉，算啦，半年後，乜都唔同曬

到咗荃灣總站後我落車，行到上天橋之後，第一眼就見到Rick ，我開心到即刻衝埋去攬住佢

Rick 佢大我兩年，但因為佢留過級嘅關係，所以佢出年2018 先考DSE。我同Rick 唔同級亦都唔同年，但我地初初就因為大家一齊做社而識，之後佢邀請我一齊幫佢搞學生會所以就更加熟，後尾仲一齊咗
Rick 佢都算係學校中嘅風頭等，佢又高又大隻，又係籃球隊隊長，又係學生會成員，每次有社際籃球，佢都第一時間同班 fd 一齊衝去報名，有佢喺到，我地黃社一定會贏，而每次佢地籃球隊一練波就會有好多低form 嘅𡃁妹喺到𥄫仔，成班花痴，為咗保護我條仔，所以每次佢練波我都一定會坐喺籃球場隔離d 櫈到睇佢打波



我地兩個拖住手，一齊沿住條天橋行到去荃新天地

「你想食咩呀？今日你生日你話事啦好冇？」Rick 問我
「冇所謂啦，你揸主意啦」 循例每一個港女都會咁樣回答佢男朋友
「咁不如食日本野？今日你生日我請你啦」
「嗯，好呀，冇所謂呀」基本上我同Rick 出街食野都係會AA 制，今日就例外，而Rick 佢係一d 大男人主義嘅人黎，每次佢都好有主見，一定要我聽佢意見，有時我都會頂唔順佢咁控制我

食完飯之後我地仲去咗食糖水，食糖水唔係因為我地食得唔夠飽，而係我地想見多大家一陣，唔想咁快返屋企
佢叫咗個心太軟俾我，上面再加支蠟燭，我雙手合十許咗個願
「希望以後都可以同Rick 一齊過生日，永遠同呀Rick 一齊唔分開，所有我愛嘅人都生體健康，快快樂樂，讀書要加油，遲d 2019 年考DSE 都要加油，努力讀書」我好誠心咁喺心裡許願



「乜你咁貪心，許願許咁耐㗎，支蠟燭都就黎熔啦」
呼一聲，蠟燭熄咗，跟住我就錫咗呀Rick 一啖
「多謝你呀，我今日過得好開心，因為有你陪我慶祝生日，有你陪我一齊過嘅每一分每一秒我都覺得好幸福」
「傻豬黎嘅，你以後嘅生日我都會陪你一齊過，你頭先許咗咩願呀？許咁耐嘅？」Rick 佢meet咗我塊面一下
「呢個係袐密，講咗俾你聽就冇用㗎啦........ 其實我其中一個願望係關於你㗎，而我知道呢個願望係一定會實現」

我坐喺枱前面望住Rick ，望咗十分鐘完全冇轉移視線，呢個係我一個小動作，我好鐘意望住一個點之後發呆乜都唔諗，而呢個時刻，Rick 就係我唯一一個焦點

「 Anki，十點幾啦，我地要走啦，唔係嘅話就冇車㗎啦」


我地離開糖水鋪，兩個人繼續手拖手一齊行，佢送埋我返屋企
我屋企就喺荃灣嘅市中心裡面，每次出街食飯，落樓買野或者去搭車都好方便，去荃灣西又近，荃灣站又近，但係Rick 佢就著喺遠d 嘅地方，要搭多程小巴先返到去，所以我地都唔會太夜返屋企

大約十五分鐘之後，已經到咗我屋企樓下，又係最唔捨得嘅時候，就係要同呀Rick 講bye bye

「Anki，唔好走住」Rick 拉住我隻手唔肯放開「你咪埋眼先」
我咪埋雙眼，雙手依然牽住Rick
Rick 伸手入褲袋，攞起咗一個灰色上面有藍色蝴蝶結嘅盒仔，佢從盒仔中攞咗樣野出黎
佢將佢隻手放喺我條頸後面，幫我載上咗條頸鏈。係一條鎖匙頸鏈

「以後你就載住呢條鏈，條鏈嘅鎖匙就代表住我個心，你而家永遠就鎖住我個心，掛喺你心口前，我地以後就心連心」
呢份禮物對我黎講係好特別，絕對唔係普通一條頸鏈咁簡單，我份人真係好眼淺，就係因為一條鏈已經搞到我眼濕濕
「Rick..... 我都唔知講咩好..... 好多謝你對我咁好咁錫我.....」話口未完，Rick就已經將個頭哄埋黎，輕輕喺我唇上吻一下
佢用食指將我右邊嘅頭髮翹到耳後，喺昏暗嘅街燈映照下，我塊面紅曬



「好啦，夜啦，你都要搭小巴返去啦」就算係情人關係，但每次當Rick 佢含情蜜蜜咁望住我果陣，我都覺得會有幾分尷尬