十六歲但非處子身嘅女孩: 5.2 有了你，我的世界更加甜

「下一站中環，乘客可以轉乘港島線、東涌線或機場快線....」
車上面有多人都喺中環站湧落車，而我同Rick 亦都俾人潮沖散咗，我地手牽手嘅鎖鏈被迫俾人切斷，我順住人潮俾人推出車外，但係Rick 就俾衝上車嘅人擋住落唔到車
「請勿靠近車門....... 」人潮你推我唔讓，最終度門閂埋咗呀Rick 都出唔到黎，佢搭咗去下一個站，分開咗我地兩個

「喂 Anki，你留喺到等我，我陣間搭返對頭車返黎」Rick 即刻打俾我
「嗯，知道」我乖乖地留喺原地等Rick 返黎
我望往堅離地城嘅月台，見到好高嘅呀Rick 推開其他人走出黎

「你以後都要拖到我實一實，任何人都唔可以再分開我地，知道未？」Rick 捉實我雙手，雙眼好堅定咁講
「知道啦，聽曬你話」我將我把聲升高幾度，扮到好似好小鳥依人，扮曬可愛咁



搭到上地面我地去咗摩天輪嗰個出口，仍然周圍都係人，Rick 拖住我行去摩天輪到
「我地今站就係喺摩天輪到睇日落啦，係咪好浪漫呢」Rick 笑得好燦爛
冬天日短夜長，而家排得隊坐到上去就啱啱好可以睇到日落

企喺到等又吹住海邊嘅風真係好凍，由其是我貪靚著住條短嘅A 字裙，好彩我有戴頸巾咋，令外我仲有Rick 幫我保暖，佢用佢高大嘅身軀幫我擋住碼頭吹黎嘅海風，然後我雙手就插入佢件長外套嘅口袋裡面，成個人唔用力咁挨住佢，因為已經企到腳都軟

大概等咗大半個鐘，終於到我地上摩天輪，我地兩個佔一卡，喺屬於我地嘅二人世界

「個黃昏好靚呀」太陽將原本嘅藍天染成金黃色嘅彩霞，從中又夾集住粉粉紫紫嘅晚霞，形成漸變彩雲，加上金光閃閃嘅海互相映照


我雙手抱喺心口前面，欣賞住呢個美境，之後Rick 佢從我身後用手掩住我對眼
「嗯？」唔通今次又有驚喜？
我慢慢轉身「你繼續咪埋眼先，等我一陣」佢縮開對手，我乖乖地聽話唔偷望，我聽到佢伸手入褲袋攞野出黎

佢拖起我隻手，幫我帶咗隻有少少重量又似繩，又有個扣，類似係手繩嘅物體
「你可以開眼啦」
真係一條手繩，用粉紅同白色嘅粗繩扭埋，開合位係一個銀做嘅磁石扣
「Merry Christmas Anki」Rick錫我一啖，喺呢個時候摩天輪亦都升到最高，我攬住呀Rick 深情一吻

「多謝你呀，我好鐘意，我都有份聖誕禮物送俾你呀」我伸手入手袋左翻右翻，之後直接倒曬袋裡面所有野出黎，但係都搵唔到我買俾Rick 嘅銀包，冇理由㗎，我明明用雪梨紙包住，唔通我漏咗喺屋企？最衰都係哥哥，搞到我要急急腳咁走，漏咗喺屋企



「Sorry 呀Rick，原來我漏咗喺屋企呀，我遲d 送返俾你呀」
「唔緊要啦，下次先」Rick 攬住我條腰，我挨住佢心口，一齊睇住個日落
呀Rick 唔單止冇嬲仲笑住講唔緊要，好彩啫，有個咁好嘅男朋友，我真係三生有幸

落咗摩天輪之後，呀Rick 帶住我離開碼頭，行返入去內街嗰邊
「好啦，坐完摩天輪之後我地而家去下一站」Rick 帶我去到電車站，我地一齊等車
「我地去邊呀？我好耐冇搭過叮叮啦」我真係好興奮，因為自從大約6年前呀媽帶過我同哥哥體驗下搭叮叮之後，我就再冇搭過，就算平時出港島都係搭地鐵，快好多

天已黑，電車慢慢咁行駛，我地一齊坐，打開電車上層嘅窗，望住出面嘅街景，聽住「叮叮」聲，而我地就喺灣仔利東街落車

利東街上面掛住一串串燈飾，仲有一d 好似流星咁嘅燈，離遠又望見一棵好高好大嘅聖誕樹，好有聖誕氣氛
不過呢到實在太多人，個個都一窩蜂衝黎呢到打卡影相睇燈飾，人多都好似行維園咁 ，人貼人

好唔容易我同Rick 先可以殺出重圍，當然我地都唔例外，即刻搵個靚地方叫呀Rick 幫我揸機影相


「點呀？影成點呀？」我即刻要檢查d 相
不出我所料，全部都炒曬車，一係就後面嘅燈飾爆光，一係就out fo 影唔到我個人，仲要有幾張手震我又眨眼，我到最後都係放棄

「唔該...... 可唔可以幫我地影張合照？」有個高高地斯斯文文，長頭髮嘅女仔走過黎問我，喺佢後面個男仔應該係佢男朋友
「Errrr 好呀」我幫呢對情侶影咗幾張合照
「不如，我幫返你地影好冇？」個斯文女問我
「好呀，唔該曬」Rick 俾咗佢部手機個斯文女，佢又幫我地影返幾張，果然女仔嘅影相sense 係好少少，大家都係為咗打卡放閃 po IG 啫

過咗大概半個鐘，頭頂上有d 白色一點點飄落我個頭到，係人造飄雪，一粒粒飄雪喺利東街上面隨風飄揚，再加上聖誕樹同燈飾，好似拍戲咁，好夢幻

「鐘唔鐘意今日嘅安排？」Rick 特登彎低身，就返我嘅高度黎問我
「鐘意，我好鐘意」喺呢一刻，我真係覺得我係最幸福嘅女仔，如果以後嘅聖誕，以後嘅日子都可以同Rick一齊過，就好啦