「Anki,你今日放學去邊呀?」Ceci 過黎問我同唔同佢一齊放學
「今日呀Rick 會黎接我放學,sorry 呀,我地聽日一齊放啦」我微笑回應返Ceci
「睇下人地有仔幾幸福,呀Rick 真係男朋友之中嘅好榜樣」Ivan 亂入一句
男人唔壞女人唔愛,我終於明點解,人人皆知你有個廿四孝男朋友,而你偏偏就揀個冇腳嘅雀仔,人總係犯賤
「咁你就要學下人地條仔啦,唔係嘅話,你成世都溝唔到女㗎啦!」Mika 特登寸Ivan,我地個個都成日笑佢A0 溝唔到女

「咁我走先啦,Rick 佢係下面等緊我」我同傍地揮一揮手,跟住就行樓梯落地下
一路行我一路望住學校門口,已經見到Rick 企係出面東張西望,等緊我出現
我都已經好似好耐冇見過Rick 咁,之前日日都一齊返學放學,而家隔咁耐先見一次,我好唔習慣
近排少見咗Rick,佢就好似喺我腦海裡面消失咗一段時間咁,滿腦子都淨係諗住Cyrus,但係當我而家見返呀Rick ,我就好肯定我仲係鐘意佢,我有一種好掛住佢,好想衝埋去攬住佢嘅感覺



離遠見到佢gel 咗個all back 頭,雙手插落牛仔褲袋,上身著住件白色t-shirt 
落到地下,見到Rick 我就第一時間衝埋去投入佢嘅懷抱
「我好掛住你呀,我地好耐冇見」我同Rick 相擁,雖然只係冇見一個禮拜多d , 但感覺已經好似成個月咁耐
我地就好似去咗打仗嘅老公終於返到屋企同老婆團聚嘅老夫老妻咁

「傻豬,我都好掛住你呀,下次再黎接你放學好冇?」我依靠喺Rick 嘅心口上面,而佢就輕輕摸下我個頭
「我會唔會阻住你㗎?等你考完DSE 先啦,你要俾心機呀」我抬高頭望住呀Rick
「放心啦,我一定會考好個試嘅,點會令你失望呢?」佢展露出招牌陽光微笑,我最鐘意就係見到Rick 笑



我地互相擁抱唔捨得放手,我抬頭偷望呀Rick
由於佢俾我高,見到佢英俊嘅面孔微微逆光,望住前面嘅學校大門,然後佢皺一皺眉
我回頭望下咩事令到Rick 皺曬眉頭,原來由學校門口行出黎嘅人係Cyrus

Cyrus 同Rick 互相對望,就算已經擦身已過都依然回頭雙望
我唔敢望住Cyrus,我好驚佢又會對我留露出之前嘅空洞又絕望嘅目神,見到佢咁嘅樣,我會好心痛
我拎轉面,只係繼續將我個頭埋入Rick 嘅懷抱裡面
都已經過咗咁耐,睇黎Rick 佢都仲係冇忘記之前Check 我電話睇到嘅內容同埋Cyrus 約我出黎見面嘅事

「我地行咯」見到Cyrus 嘅背影愈行愈遠之後,Rick 就拖住我隻手,送我返屋企


「你最近返學有冇發生d 咩特別事呀?順唔順利?」我地一路行,一路閒聊,Rick 佢首先問起我關於學校嘅野
「冇呀,咪又係咁」的確冇特別事發生,我都冇乜野好講,我只係諗緊頭先我同Rick 喺學校門口俾佢見到,佢會唔會嬲呢?佢會唔會唔肯彩我?
「係咩?但係我見你近排少覆咗我message,我仲以為你近排好忙添」Rick 追問我

因為琴日我去咗Cyrus 屋企又冇覆佢wts,再次令到佢懷疑,不過一個藉口又唔可以用兩次,上次佢仲直程上黎studio 話接我落堂添

「er...........咁我......」點算,我都諗唔到點回答好
「我近排俾咗個目標自己,我下年都考DSE 啦,咁我而家要限制下自己玩電話嘅時間,養成一個好習慣,所以咪覆少咗你囉,你唔會介意㗎,係咪?」
呢個藉口真係十分牽強,不過我咁樣反問佢轉頭,佢想say no ,或者再作出任何懷疑都難啦
「啱呀,而家開始努力都好,bb 你真係叻」就連Rick 都諗唔到點樣應對,睇黎近排要小心行事,唔可以俾佢再懷疑我

距離DSE 考完嘅時間仲有一個星期,過多呢個禮拜之後佢就會變得好得閒,到時我又要抽多d 時間陪佢,忽略咗Cyrus
呢種關係真係好痛苦,我都唔知我點樣先可以從中攞到平衡
已有 0 人追稿