這件事令我被老師帶到別的房間問話,其他同學也相繼先到指定的地方進行活動。

「……我無偷佢部電話……」

經過一晚沒有好睡,精神有點煥散,如今還涉嫌盜竊,我能夠平心靜氣地解釋已經是極限。但也許是因為面前的是一位外表不俗的女老師。她的語氣甚重,沒有直視著我,只是一直盯著窗外。被這個身材均等的美女冤枉及漠視我,開始有點難受。

「偷嘢,你知唔知係好大件事?」

「我尋晚好早就瞓咗喺床度,我仲早過佢哋瞓!點會有機會偷到佢部電話呀?」





「但部電話喺你個袋出現喎?」

「我都唔知咩事㗎!」

「即係話你俾人插贓嫁禍?係咪?」

「……我唔知……」

「咁你覺得有無咩人想害你?定係有同學想整蠱你?」





說到這裡,我只是聯想到那個借電話的同學,也許真的是他……但……

雖然很可疑,但我也不能這樣判定是他,更何況……沒有十足把握時,我不想跟大家結怨。

「……我都唔知……」

老師聽到我的回應感愕然,一下子表現得不懂反應。

「咁呀……我講多一次,偷嘢其實係刑事罪行,唔好以為自己未夠十八歲唔使留案底就可以亂嚟,後果一樣可以好嚴重!」





雖然老師刻意用更強更大聲的語氣來告誡我。在我而言,沒有就是沒有,我的回應都是一樣。

「我梗係知,但我真係無做過……」

我想了一會,又一次在胸前捉緊拳頭,心情漸漸平伏下來,想到同一句說話,再說多一百次也沒有意思,倒不如分析一下給老師知道我的想法:

「……反正宜家講咩都無用,不如妳報警喇。我一直都無掂過佢部電話,一定唔會有我指紋,而且喺營地呢度,要我將佢部電話無聲無色咁帶走,成功機會率係好低,我更加唔會蠢到放喺自己個袋度,仲要唔熄機添。所以我相信係有啲意外發生咗,令部電話唔小心咁跌咗喺我個袋度,而我又咩都唔知咁放晒啲嘢落去遮住咗,睇唔到……」

老師聽到後思考了一會,既認真、又感到滑稽問道:

「唔小心咁跌咗喺你個袋度?呢個講法都幾牽強喎?」

我實在無法再兜圈:

「比起話有同學插贓嫁禍玩到咁大,我覺得『跌咗喺我個袋度』呢個說法會容易接受得多囉。」





本是認真的她不小心笑了一下。幹什麼?我又不是在說笑,我是認真的!

突然,有人在外敲門,是那位不見了電話的同學及協助他的男生。

「……Miss貝……其實關於我部電話嘅事,我有啲嘢想講……」

不見電話的同學說著,有點難以啟齒。

「好,你講。」

「就係陸志輝佢囉,今朝我趕住去廁所,但係攞住部電話又唔知放邊好……於是就……」

這時,那位陸志輝搶著說:





「……於是就俾咗我!我咪放咗喺檯面……不過之後唔小心倒瀉水!嘩!嗰時真係好緊張,我一手推開咗部電話,唔知飛咗去邊,但又急住抹返啲水!咁……又無聽到跌落地嘅聲,自自然然咪唔記得咗……」

陸志輝輕輕推一推身邊的同學再說:

「……係囉!我都係啱啱諗返起,原來有件咁嘅事!哈哈哈……」

陸志輝笑得有點生硬,而我跟Miss貝同時無奈地看著他,他再說:

「咁應該唔使報警啦?」

犯人就像為自己的行為自圓其說,唉……

「即係話,你兩個插贓嫁禍?係咪?」

Miss貝淡淡地說出口,卻令二人十分震驚,同時回應:





「唔係!點會呀?」

聽到後,答案呼之欲出,我只好說道:

「我都覺得唔係插贓嫁禍,一場意外嚟啫……」

倏然三人也有點莫名其妙,事件也莫名其妙地平息了。

正當二人離開後,我也想回去繼續之後的活動,可是老師卻要我留下。

(待續)

香港區訂購實體本:
https://www.penana.com/product/43
已有 0 人追稿