【屋村7-11驚魂】落樓下7仔食個叮叮飯，竟然咁可怕...: 2
果個強國男人身型幾高大下，年齡我估四十零歲，個頭係典型「陸軍裝」，佢老婆就著得後生少少，長頭髮，不過佢化果個妝已經出賣左佢既強國味，仲拎住個唔知堅定流既LV。
揀左陣，佢地拎住幾支啤酒同埋幾包薯片去收銀機果邊俾錢。
零食架果邊，仲有個著住套運動裝加對拖鞋既師奶仔係度揀緊野，佢果樣OK後生，三十零左右，係依個鐘數仲落黎買野食，我段估佢係買番屋企黎一邊食一邊煲師奶劇啦。
對強國夫婦俾完錢就離開左，我就繼續一邊食一邊玩手機。
過左無耐，見到有條梳all-back頭既西裝友走入黎買野，佢個樣有d吋，一身打扮十足十金融財俊咁款。
除左條西裝友，原來仲多左個女仔入左黎買野，頭先掛住食野都唔為意。個女仔長頭髮，清清純純咁，雖然唔算係女神級，但都叫嗒得杯落。
而頭先企係零食架果度既師奶原來仲未走。
「話時話阿四眼仔，點解今晚得你一個既？平時拍住你果個阿嬸呢？」地中海阿叔問。
「佢頭先入左倉入面個廁所呀，話時話好似入左去好耐下。」
「哈，十成十係蛇王啦！」
個地中海阿叔講完之後，就拎左個電話出黎打。
依個時候，我望出門口，見到頭先果對強國夫婦又經過7仔門口，佢地表神頭岳岳咁，好似周圍搵路咁，我諗佢地唔係住係附近。
與此同時，7仔出面既景色開始變得有d矇矓，不過都唔係咩特別事，基於依頭既地形，一到春天季節就會好重濕氣好大霧，所以我都無在意。
「呀屌你，部電話買唔撚夠半年就神神地，頭先打電話番去俾個衰婆，我聽到佢把聲但佢果邊就聽唔到我把聲，激撚死。」
依d中年阿叔都有個共通點，就係每次講野都當正自己演講咁款，好似要逼到每個人都聽佢講野咁，我當然完全無視佢，繼續食野玩電話。
「今晚又會咁大霧既。」四眼收銀哥仔突然彈左句出黎。
「嘩屌，真係好撚大霧wo，搞o麥撚呀...」
當我以係又係個煩膠阿叔吹大左之際，我抬頭一望，成個情景真係好妖異！
間７仔門口對出十米外，本應有支交通燈，但宜家係我依個位置，已經望唔到出面有燈光，咁大霧既情況，我住左咁耐都未見過。
依種要置身係海拔過幾千米先欣賞到既雲海景色，竟然係間屋村７仔度都欣賞到，咁既情形，正常黎講香港人應該要拎部手機出黎影張相，但我隱約感覺到有ｄ唔妥，而且好似唔只我一個，係間７仔入面既顧客都覺得有ｄ奇怪。
頭先入黎買野既西裝友，企左近門口位置既雜誌架睇雜誌；至於果個師奶，明明已經買完野俾埋錢，但就遲遲唔肯離開７仔；果個清純女仔都一樣，情形就好似出面落緊大雨而佢無帶遮咁，但明明出面只係大霧。
好明顯，大家都係度等緊。但究竟係度等緊咩呢，等出面ｄ霧散開？
你可能覺得，成班友唔敢離開間７仔，係為左想等ｄ霧散開係好誇張，但的確，出面大霧既情況係有ｄ匪夷所思，因為出面大霧到連街燈既燈光都睇唔到，漆黑一片，你試諗下夜晚要係條無晒街燈既地方行，真係有少少驚。
「嘩，拍緊戲咁款，我住係度咁撚耐都未見過咁壯觀，等我再打多次俾個衰婆，叫佢望出窗欣賞下先。」地中海阿叔再次打俾佢老婆。
「阿季嬸佢去廁所去咁耐既．．．」
四眼哥仔就望住７仔入面間倉既方向，口upup咁講，佢口中果個季嬸應該就係平時同佢一齊番夜更果個阿嬸。
「屌，搞咩呀，頭先起碼打得通，宜家直到打唔通既。」阿叔望住個手機咁講。
阿叔一講完，師奶就拎個手機出黎打：「我個電話收到wo．．．喂，老公呀，我宜家係７仔呀，你可唔可以．．．喂．．．喂，我聽到呀，你聽唔聽到呀？喂．．．搞咩呀，我聽到呀，喂？喂？」
聽完師奶同阿叔咁講，出於好奇心，我望下自己部手機，收到爆晒wo，上網都無問題，都唔知佢地用咩台會收得咁差。
望住依個咁幻海奇情既畫面，當大家都唔知應該點做之際，突然有把好淒厲既叫聲係一片白霧之中傳黎。
「呀！！！！呀！！！！！呀！！！！！！！！！！！」
依種咁恐怖既叫聲，嚇到企近門口既西裝友、師奶同埋長髮女仔都一齊向後遯，面對一堆睇唔透既白霧，突如其來既叫聲實在令人有無幻想像。
當大家都未知發生咩事既時候，叫聲再一次響起，而且可以聽得出，叫聲不斷向７仔靠近。
唔只頭先個三個顧客，今次連地中海阿叔都向後遯，至於四眼哥仔，由於佢企既位置走唔到，只能夠踎底個身，戒備係白霧之中既不速之客。
由於我企既位置係比較入，所以都無郁過，又或者，可能因為我自己都有Ｄ驚，驚到反應唔切。
終於，有兩個物體穿過白霧，衝左入黎７仔，然後「拍」一聲，扒左係地下。