【屋村7-11驚魂】落樓下7仔食個叮叮飯，竟然咁可怕...: 11
所有人都俾ｄ恐怖笑聲嚇到彈開，強國夫婦兩個遯後撞左去個藥架到，長髮女仔就背靠早餐麵包架用雙手遮住耳仔，師奶仲嚇到成個人撲埋去個雜誌架度，連人帶架訓底左，卷泥龍繩仲甩開左。
「快ｄ收線啦！！！」西裝友一邊打叫，一邊用手遮住耳仔，但果陣心寒既笑聲，好似可以穿透佢隻手直接傳入耳膜咁。
四眼哥仔同埋地中海阿叔兩個最近果部ｆａｘ機，事係佢地兩個係收銀櫃入面，嚇到想走都走唔切，淨係識得縮埋一舊，四眼哥仔聽到西裝友咩講，就伸手去禁收線制，但禁極都收唔到線。
「收唔到線既！？！？」
「妖！等我黎！！」地中海阿叔已經唔理咁多，直頭將成部ｆａｘ機拉出黎「ｄｕｍｐ」落地下。
恐怖笑聲終於停止左，但果種令人心寒既聲線，仲係好似留係大家心入面，久久不散。
所以人都好似做完一場劇烈運動咁，坐晒係地下抖大氣，無人敢出一句聲，因為實在太恐怖，亦都太難令人接收。
大家就係咁一直都只係你眼望我眼，足足過左十分鐘，恐怖既感覺總算慢慢消退。
「究．．．究竟發生．．．咩事？」四眼哥仔同阿叔依然縮低左係收銀櫃入面，所以其他人只係聽到佢把聲。
「十成十係撞鬼啦！！」阿叔爆左一句出黎。
無人可以諗到一個合理既解釋，似乎「撞鬼」已經係一個比較正常既推測。
「咁．．．咁點解會搵著我地黎搞既？？我地仲番唔番到出去架？？」師奶一貫地希望有人可以答到佢依ｄ根本無人知道答案既問題。
「撞鬼．．．我入黎買包煙咋ｗｏ，成日都黎架啦．．．無啦啦撞咩鬼呀．．．」
「咁．．．咁我地之後點算好呀．．．我地係咪要係度等死呀．．．嗚嗚．．．」長髮女仔講講下，又想喊。
一直都無出聲既強國夫婦，依個時候神色開始古怪，慢慢企起身。
強國夫婦企起身，向飲品櫃果邊慢慢行過去，正當大家諗緊佢地想做咩之際，強國男突然轉身向住大家，仲拎左把界刀出黎：「乃地唔好埋黎！！」
「做咩事呀佢？？無端端做咩拎住把界刀既？」由於大家仲有d驚魂未家，個腦都仲係一片空白，所以未意會到強國夫婦究竟想做咩。
「嚇到傻左呀佢？」聽到西裝友咁講，原本縮低左係收銀櫃既地中海阿叔都企起身，睇係發生咩事。
「依！？佢幾時拎左把界刀架？」四眼哥仔都起左身，佢認得把界刀，原本係放係收銀機下面。
強國男重申一次：「乃地唔好過黎！！如果唔係咪怪鵝唔客氣！！」
**視線轉番去主角身上**
望住左手「dump」係地既繩，我叫自己唔洗驚，其實我仲可以沿住繩行番轉頭，大不了先番去7仔然後再黎過，於是我就跟住條繩跑番去，跑左分零鐘就見到地下有舊野，原來係果卷泥龍繩。
點解成舊泥龍繩會飛左出黎架呢？我直覺志認為有d唔好既事係7仔入面發生左，於是拎番起卷繩就打算行番入去7仔。
但係，向前行左十幾步都未見到間7仔...舊泥龍繩無理由會飛到咁遠掛...
我馬上就知道大鑊，於是乎起勢咁跑，但果然無估錯，間7仔唔見左！就同西裝友既情況一模一樣，明明間7仔應該係附近，點知一離開左就搵唔番。
「有冇人呀！？！？有冇人聽到我講野呀！？！！！！」
除左大叫，我真係諗唔到d咩好方法，而聲音就好似俾一個黑洞吸住左咁，一粒聲回音都無，大叫完之後，四周圍又變得異常寂靜。
究竟頭先西裝友係點樣先至番到去７仔？而我今次又有冇佢咁好彩番到去？我諗自己就好似一個離開左穿梭機既太空人，條救生索都斷鬼左，而我就連唯一既依靠-7仔，都失散埋，獨家漂流太空等死咁。
依個時候我個腦真係一片空白，原本頭先出黎既時候我仲帶住一d怒氣，即使周圍漆黑一片我都膽粗粗跑出黎，但宜家面對住恐怖既氣氛，我再一次輸左，我明知無用，但驚到照樣拎部手機出黎當電筒。
平時你係好黑既環境開燈，身邊有其他物件反光，會令你知道自己係身處係咩地方，但宜家咩都無，四周圍都係得d霧，開唔開燈根本就無分別。
我極力叫自己冷靜d，如果依度真係d咩時空扭曲而成既世界，而且行黎行去都會行番去7仔既話，照計我都應該有機會搵得番7仔。
我就用依種唔知有冇科學根據既諗法，一邊叫自己唔好驚，一邊不斷向前跑，希望可以似西裝友咁好彩。
當時我一心以為，只要搵得番間７仔就仲有希望，但果陣時我並唔知道，成件事係超乎我想像，真正既大鑊野宜家先開始。
一分鐘、 兩分鐘．．．係我心入面既感到，好似已經唔止過左咁耐。
我不斷跑不斷跑，原本出面既氣溫有少少涼，但我已經跑到成身滾晒出晒汗。我依ｄ平時淨係困係屋企打機既毒男，少做運動，再加上對前路既迷茫，我根本連應唔應該繼續向前跑我都唔敢肯定，所以最後跑左唔夠十分鐘就已經累到停低左扒係地下度。
我唔想死，我真係唔想就咁死．．．我當初決定走出黎，係因為我唔甘心就咁玩完，我宜家想番入去７仔，係因為我只想繼續苛且偷生．．．
我慢慢企番起身，好似行屍走肉咁繼續向前行，我唔知自己繼續行仲有冇意思，但我已經無其他地方好去。
正當我諗住放棄之際，奇蹟終於出現！！係７仔！我終於番到黎７仔！！我對住依間頭先好想離開既７仔，竟然開心到差ｄ叫左出黎。
不過，當我行到入去７仔，我既笑容馬上收番起，我望住大家既表情，雖然仲未了解到係咩情況，但我知道一ｄ唔好既事發生左。
我第一樣見到既，係坐近門口既長髮女仔，佢坐左係地下度喊：「．．．唔好．．．我真係唔想死．．．」
再望遠少少，就見到師奶亦都坐係度，背脊貼實個早餐櫃前面，雙手抱住幾盒三文治，望住飲品櫃果邊，表情好似好驚咁。
至於收銀櫃後面就好似打完仗咁，ｄ野掃低晒，就連部ｆａｘ機都唔見左，而頭先一直企係收銀櫃既四眼哥仔，就企過左去隔離熟食檔果度，背住左我。
「我求下你地唔好搶啦！ｄ野唔係我架！你地咁樣我之後點算呀？？」四眼哥仔係度講野。
「乃你邊個埋黎就死邊個！！」我聽見強國男人把聲係飲品櫃果邊傳黎，唔知發生咩事，所以我無理會坐係地下既長髮女仔同埋師奶，直接走入去飲品櫃果邊。
當我經過師奶果陣，佢好似好驚我會搶佢手上果幾個三文治，係咁死抱住唔放。
行入少少，我就見到其他人，首先西裝友就企係零食架同埋熟食檔之間，而地中海阿叔就企係零食架既另一邊，佢地兩個都背住我，望住飲品櫃果邊。
而飲品櫃前面，就見到強國夫婦，強國男人仲拎住把唔知邊度黎既界刀，一邊護住身後既飲品櫃，一邊拎住把刀亂咁舞，似乎係防範西裝男同埋地中海阿叔。
「喂，你地係度做咩呀？？」
我一開口，竟然好似嚇親西裝友同埋阿叔，佢地一邊到我，就即刻好防範我，而西裝友甚至用背脊擋住佢身後既零食架，左手邊就好似防備強國男，右手邊就好似要防備我，而我見到佢地咁樣，都唔敢再行近。
「又黎多件，乃咪撚行埋黎呀！！乃行埋黎鵝就一野捅瓜乃！！」
「你地發咩神經呀！？大家諗下有咩方法離開仲好啦！你地係度搶咩呀！！」我好嬲咁同佢地講，但佢地根本唔聽入耳。
「突竟發生咩事姐！？！？」我望住稍為理智既四眼哥仔，佢一聽到我咁問，當堂面色一沉。
「我．．．我都唔知呀．．．頭先．．．」四眼哥仔吞吞吐吐，好似好唔願意講咁。
「講啦！！究竟發生咩事呀？？？」
「番出去？無架喇！！今次我地走唔甩架喇！！你自己話喇，你頭先出去有冇見到ｄ咩！？」地中海阿叔突然咁樣問我。
「佢地肯定想整屎（死）鵝地！！」強國男人既說話搞到我一頭霧水。
「邊個佢地？？你地仲見到有其他人咩？？」我真好想搞清楚係咩一回事。
「頭先．．．我地再．．．報警．．．」四眼哥仔越講就越驚。
我一聽到四眼哥仔話報警，自然反應咁望番去收銀櫃果邊，醒起頭先發現成部ｆａｘ機唔見左。
「咁呢？之後發生咩事呀？」
「呀！！！唔好呀！！！唔好呀！！！停呀！！！」長髮女仔失驚無神大叫，似係受驚過度咁。
「原本．．．聽電話既係一位．．．一位ｍａｄａｍ．．．但係，佢把聲好古怪．．．然後，突然係度怪笑．．．仲話．．．」四眼哥仔嘗試講落去。
「怪笑？之後呢？」
「佢話．．．佢突然話，如果我地再唔聽話，走出去．．．就會．．．就會殺晒我地！」
聽完四眼哥仔咁講，我個心即刻寒左一寒。
究竟係咩意思？講野既又係咩人？點解唔俾我地出去？
我唔係好信佢地所講，又或者係，我就算想信但都理解唔到，於是乎我走埋去收銀櫃果邊，我見到成部ｆａｘ機跌左落地下，所以試圖爬入去。
「你做咩呀！？」其他人好一致咁問我想做咩。
「我．．想試下打多次電話。」
「唔好呀！！！千其唔好呀！！！」師奶從後拉住我，就連長髮女仔都幫手捉住我。
「喂，做咩呀你地？？」由於佢地頭先報警果陣我唔係度，所以我根本理解唔到點解佢地會驚成咁。
「總之我求下你！！你唔好再打電話！！好得驚架！」長髮女仔苦苦哀求，所以我都唔忍心嚇親佢，打消左報警依個念頭。
「得喇得喇，我唔打啦，你地放開我先。」師奶同長髮女仔聽見我咁講，先至鬆番一口氣。
根據大家既反應，以及地中海阿叔佢地既說話，我估計頭先電話既另一邊，的確講左一ｄ好匪夷所思而且帶有恐嚇性既說話。
亦正因為咁，佢地意識到自己可能離開唔到依間７仔，於是乎就打算搶食物同埋水。
強國夫婦、西裝友同埋阿叔，佢地四個都曾經係出過７仔外面，都經歷過果種難以理解既不安感覺，好似隨時會永遠迷失係一片霧中咁。
其實依一點我係最清楚果一個，事關我出過去兩次，頭先當我以為搵唔番間７仔果陣，仲爭ｄ想過放棄。
點解咁驚搵唔番間７仔？因為佢係唯一依靠。
點解佢係唯一依靠？我心入面好清楚，如果無左依間７仔，應該係話，如果無左依間７仔入面既食物同埋水，我會死得仲快。
所以我好明白，經歷完果種恐怖，會變得好無安全感，好想霸住ｄ食物同水，依ｄ都係動物既求生本能，再加上，如果佢地講既係事實，報警中心果邊竟然講埋ｄ咁得人驚既說話，我諗根本無人可以完全保持到理智。
宜家唔單只走唔番出去，仲要同班三唔識七既人展開困獸鬥。
我同大家一樣，都唔想咁快死係度，所以我拿拿林係麵包架果度拎左幾個賣剩既麵包，再走去早餐櫃度拎左幾包朱古力奶。
師奶無阻止我，睇黎佢都仲未定神，只係想抱實佢手上既三文治，而果個長髮女仔，我諗佢真係驚到唔識反應，我見佢手上咩食物都無，我唔忍心見到佢咁，所以將手上既麵包同埋飲品分左ｄ俾佢。
「你拎住啦．．．可能你一陣會肚餓。」
「嗚嗚．．．嗚嗚．．．」
其他人亦都無阻止我拎ｄ食物，原因好簡單，因為我依邊ｄ食物同埋飲品，都會較為到期。
佢地應該都覺得，唔值得為左搶我手上果ｄ就黎到期既食物，而放棄佢地自己果邊既「領土」，更何況，更值得佢地打主意既，係飲品櫃入面ｄ水。
所以強國夫婦果一邊，大家都係度互相戒備，以防有人搶佢地ｄ野，而四眼哥仔，就淨係識得不斷叫大家唔好搶。
亦都係因為咁，我先至暫時唔洗加入佢地果邊既「飢餓遊戲」，令我有時間去整理一下係依度發生既奇怪事。