【內含HEHE】月下漫步東京同遊: 6.4

6.4

　　「唔怪得間嘢冇人幫襯啦，根本就係黑店！」我氣得臉頰發燙，「仲諗住最後午餐可以食餐好，點知去咗間黑店！」
　　「都仲有時間食個最後午餐嘅。」裕貴倒是平心靜氣，日本人是否從小就開始訓練情緒智商？
　　「唔夠時間啦，間間餐廳都要排隊。」我早就氣餒了，作好心理準備待會要靠飛機餐來充飢，或者一上飛機就請空姐給我來個杯麵。
　　啊，短途航程好像沒有杯麵派發，那就糟糕了。
　　「跟我嚟啦。」裕貴說。
　　裕貴帶我到了便利店，著我帶同他的行李站在店內的角落等待，那裡有張靠窗的餐桌供人立食時用。不到兩分鐘，裕貴便帶著兩個杯麵回來。
　　「最後午餐要食杯麵。」我苦笑。
　　「尋晚個最後宵夜都係杯麵，唔記得嗱？」裕貴把泡了熱水的杯麵放在我前面，用木筷子壓住蓋掩。


　　「記得。」我點點頭，「以後諗起日本，淨係會記得啲杯麵。」
　　「唔係啲拉麵咩？」他取笑我。
　　「哇，唔好啦，唔開心嘅嘢唔好記住。」我笑說，「你呢？以後東京會令你諗起拉麵定杯麵？」
　　「我去到任何地方，都會去食拉麵。」他望著杯麵出了神，「不過東京，就係杯麵。」
　　我莞爾。至少我知道了，裕貴眼中的東京，從此以後都會有莫希臣的身影。
　　「希臣返到香港，會唔會食杯麵？」裕貴問我。
　　「唔會啦，香港咁多嘢食。」
　　「嗯，係嘅。」裕貴點頭，眼裡閃現了一絲落寞。
　　「不過一落機，應該會去食碗牛丸河。」我故意說，「好耐冇食河粉，有埋牛丸一定好正。」
　　「係咩？牛丸真係好正咩？」他羞赧的笑著。


　　「正㗎，已經開始好掛住啲牛丸。」我語帶雙關。
　　「我去香港嘅時候，可唔可以搵希臣？」裕貴問我。
　　「當然可以啦，仲使問㗎咩，傻瓜。」
　　「到時希臣可以帶我去食牛丸河。」他說。
　　「一言為定。」
　　「同埋下次希臣再嚟日本，我哋可以去睇銀杏。」
　　「好啊。」我說，「下次轉個地方，可以去大阪，我哋可以喺大阪繼續食杯麵。」
　　「嗯！」裕貴用力點頭，「一言為定。」
　　「食埋個杯麵，就行喇。」我說。
　　我們打開杯麵的蓋掩，熱騰騰的蒸氣模糊了我們的視線。