[武俠甜故] 古裝武俠有味巨著 - 鐵血丹飛: 第十七章 - 身陷險境

 
呀婆倒地瓜柴之後, 疤痕廚房佬見到咁即時就伸手立刀, 而埋伏響廚房後面班奇珍異獸亦正火速蒲頭發難, 堅仔見到咁, 即時就順手掹番呀婆心口支棍跟住就危險速逃。
 
堅仔衝住出去大嗌住, 「喂起身走呀!」 眾人見堅仔身後成棚怪人追住出黎, 即時就唔使講野起身就閃, 同一時間, 屋頂上嘅人見到咁亦開始陸續跳住落黎。
 
追兵好猛, 眾人走緊嘅時候, 大力突然停步轉身張開雙手, 一個大有一夫當關, 萬夫莫敵氣勢嘅大力, 正擘大喉嚨向後大叫住, 「你地一直向前走呀, 呢度就由我黎擋住!」
 

 


追兵已至, 大力正左一拳, 右一掌咁不斷殺敵阻擋, 而好快, 首先見到疤痕廚房佬已經舉刀而至, 刀正快速手起斬落, 而大力亦已運住十二成功力咁, 正準備黎個空手入白刃接刀之際。
 
錚聲過後, 一把菜刀連手就已經飛跌到地下, 「大力, 我地黎幫你手!」 好在, 龍飛同丹娜已經及時趕到, 丹娜正不斷以劍殺敵, 而龍飛就係咁掌來掌去, 大力就係咁見一個揼一個, 剎時間, 戰場正一片立立咁亂之際。
 
一條皮鞭突然飛至將丹娜條頸索住, 但丹娜長劍一揮, 皮鞭就應聲而斷, 但緊接而來見一個戴住面具嘅男人, 正使勁地舞出無數嘅鞭影, 繼而快速密襲地咁攻擊住丹娜。
 

 
皮鞭夾雜住深厚內勁, 而且攻勢猛烈, 丹娜除左只能以劍擋鞭之際, 根本就無辦法可以埋身提劍殺敵。
 


隔離之處, 疤痕廚房佬斷手之後, 見佢另一隻手響背部掹左把大關刀出黎, 大關刀長約三米, 重喻百斤, 廚房佬正單手揸刀就開始向大力勁劈住, 大關刀既長且重, 但廚房佬居然可以單手揮耍自如地猛攻住大力。
 
大力亦執左地下兩把刀正邊擋邊攻住, 龍飛方面, 見佢正面對住一個雙眼似狼, 但身上皮膚就似起哂麟角咁嘅怪人。
 

 
麟角怪人一拳打埋龍飛度, 而龍飛就順勢用手臂格開住之際, 但怪人被格住嘅手突然就向後用力一拖, 跟住怪人手臂上嘅麟角, 就好似鋼絲刷咁將龍飛隻手臂刮至皮開肉裂, 「啊…..」
 
丹娜聽到愛郎慘叫聲後, 稍一分心, 皮鞭便應聲打在丹娜身上各處, 對方嘍囉愈戰愈多, 六拳難敵眾手, 大力見狀, 即時就當機立斷。
 


見佢烏低個身先將企得最近嘅兩個嘍囉腳部捉住, 跟住就再猛然將二人揪起再急速旋轉咁黎發住二人, 二人頓時變成車葉咁比大力當係武器咁用黎攻擊住眾人。
 
大力邊轉邊講, 「你地兩個快啲走, 呢度就由我黎頂住就得!」
 
二人見大力正成個摩打咁轉住黎殺敵勇不可當, 而龍飛就絕對明白大力嘅此番用意, 與其全軍覆沒, 倒不如就犧牲自己一個就仲更為撐算。
 
「丹娜, 我地都係快啲走先!」丹娜亦明白到眼前嘅狀況, 雖有不忍, 但亦唯有無奈收手而退, 二人已經轉身舉步就走。