(已更新至番外篇)《五年的約定》女同志師生戀題材文章: 後感

今次用全口語打出嚟，比較有親切感啲。
大家好，介紹多次自己先。我係葵。真係好好好好好感激你地每一位有click入嚟，支持我。呢篇作品係我今年dse完之後寫嘅人生第一篇中篇小說嚟。
我死都冇諗過自己會堅持到咁耐，明明自己dse得個lv1，垃圾到咁，係得個寫作有個lv3，算係見得吓人。我由18年7月18號，每晚坐喺張枱不停不停咁寫，就算有幾攰，有幾晏先返到屋企我都繼續寫，繼續完成我呢篇《五年的約定》。你可能會話你咁堅持寫落去為乜，中文又差，又有病句等等之類嘅説話。但係我由細到大都係鍾意作嘢，由小學要做英文writing book到到宜家真真正正寫一篇中篇小說，條路真係好漫長，但係我好享受，好享受人地寫畀我嘅feedback。
不過，我自己本身係一個好鍾意share自己嘅事畀大家知，正正就係呢樣嘢而搵到寫作嘅契機，踏上咗寫作呢條路，從中我搵到自己想要嘅嘢，去捉住自己呢樣想要嘅嘢而發大佢，希望以寫作為我嘅副業，或者係正業也好。其實我有質疑過自己嘅中文dse咁屎，點做到作家吖？但係「有志者事竟成」，NOTHING IS IMPOSSIBLE, JUST TRY YOUR BEST.
見到人地嘅comments寫住篇文好洋蔥，又留名追post，甚至前幾個星期上埋單日，仲有每週人氣排行榜，我真係真係諗都冇諗過。我見到上榜嘅人都係有出書，點擊次數有成20幾30萬，而我得嗰3000幾個，個心會覺得好慚愧，係覺得自己冇資格喺個榜入面。幸好，我有一班好好嘅朋友去支持我，令到我更加努力去寫好呢篇作品。
最後，多謝咁多位支持我嘅人。