「梁禮賢,第一次約你就遲到,搞錯啊。」阿蚊在地鐵站,雙手交叉帶著不耐煩的表情對著我說。

沒錯,我如願以償成功考入左港大,放榜當天,我高興得雙膝跪在地上,我合不攏嘴地傻笑著,覺得一切辛苦與犧牲都是值得。

仲記得當時老師知道這消息後,大家都議論紛紛,感嘆地說這是一個奇蹟,一個成績長期吊車尾的學生,竟然考到全班第一名,仲要入埋港大,個個都無不驚嘆著。

雖然成績未至於做到狀元,但還是成為學校的風雲人物,而阿傑他成績差了一點點,暫時考不到大學,他自己決定再準備一年時間再考過,不過身為死黨的他還是替我考到大學感到高興。

至於陳彩虹的事,自那件事發生後,我已經沒有跟她有聯絡了,不清楚她最近過得怎樣。 



之前阿蚊承諾我考到港大就會見返我,當公佈消息後,她主動whatsapp我主動邀約,話要同我慶祝一番,我當然馬上答應。

咁樣講雖然有D咸濕, 其實這次是我第一次不在屋企裡見阿蚊,現在在我眼前的阿蚊已經不再是我的補習老師了,現在的阿蚊更加真實,更加美麗。 

我地約左6點係地鐵站等,但由於太耐無見,搞到我有少少緊張,所以用左多了時間來set頭,搞到遲左十幾分鐘,而且我帶埋上次未送出去的DW手錶,這次一定要找個機會把它送出去。 

雖然與阿蚊很長時間沒見面,但是她仍舊美貌動人,她穿了件棗紅色緊身t-shirt,下身則是牛仔短褲,雖然簡單的裝扮,卻毫不吝嗇,把美好身材完美展現出來,而且看得出她化了點妝,令她五官更立體突出,灣灣的眼睛,像道月亮般,皎潔明亮,那雙長腿依舊纖細白晢。   

「Sorry呀蚊姐,講返個好消息你聽,等你順返條氣。」我馬上露出四萬咁口,嘗試一笑解千愁。
   



「係人都知你考到港大啦,你仲有咩好消息呀。」阿蚊仍然相當生氣。
   

「當然唔係呢個啦,你知唔知道我入港大呢個消息時,第一個想起既就係你,第一個通知既係你而唔係我呀媽,可見你係我心中既位置係幾咁最重要。」
   

「係咪真架?你好衰仔囉,唔好講比梁太知呀,有個咁既仔,唔係喊死佢呀。」阿蚊突然感到絲毫傷感。
   

真係讚你又唔得,罵你又唔得,你唔好比我聽到你問我,你同呀媽同時掉左落海,你會救邊個先呢D白痴問題,我到時實救阿媽先!
 
  
雖然我想說出心底話,但難得是件開心事,不想太串嘴掃興,所以我用理智壓抑住,不說出心底話。



「全靠阿蚊你教我既記憶法同埋你既筆記,我要認真多謝你。」

「唔洗多謝我啦,睇得出你今次真係好認真準備咁,先至有咁好成績,你睇下你黑眼圈幾深,今晚早d訓啦。」阿蚊笑著說。
 

「哈哈,係呢,你應該都餓架啦,不如我地食飯先啦。」我隨口地說了句話,嘗試著改變話題。   

我們雖然走得貼近,但我不敢伸手去拖她的手,我隻手同阿蚊隻手,雖然距離不到五厘米,但卻是最遙遠的距離。與阿蚊靠在身旁,能嗅到她身上的香味,不知是體香還是香水,淡淡的不會很濃,而且很好聞,令人忍不住不停聞著。


也許在別人眼中,我們看起來像對情侶,但我不知道我與她現在的關係是甚麼,我不太清楚,我害怕一開口告白,這樣的關係就會瞬間斷烈。 

愛情真的是相當複雜的東西,對於我這個沒經驗的人來說,可能用一生時間也無法精通的。 

我與阿蚊去到一間迴轉壽司店用餐,不用等很久就有座位了。

用餐時,我看著每一碟壽司,它們都有著不同的命運,熱門的三文魚壽司,總會有超過一個人去爭;冷門的蛋壽司,只能不停地在原地轉圈,等待著別人的拯救,而我就是那舊發冷的蛋壽司,無人問津,阿蚊則是搶手的三文魚壽司。  



「阿賢,你做咩喊呀,叫你唔好落咁多芥末架啦。」阿蚊拿起紙巾幫我擦眼淚。 

當時我好想當面講,我沒有因芥末而哭,我只會因你而哭,但還是仰在心底沒夠膽說出這麼肉麻的話。

 「係呢,你會唔會報O camp玩下咁啊。」 

O camp!係咪新聞上成日報導話會玩淫亂遊戲的地方!你話我唔想參加就假既。

「我都唔知啊,咁阿蚊你大一既時候有無報?」我很想知道阿蚊的過去,可能被新聞上誤解,我不想阿蚊參與過這麼淫亂的遊戲,快告訴我你沒有去過!

「無啊,呢家諗返起有少少後悔,不過我都係班上識左好多朋友。」

我瞬間放下心頭大石,心中壓力頓時釋放開來。



「咁你想唔想我去報名啊?」我作出試探性的問題,如果阿蚊著緊我,應該唔準我去O camp的!

「點解咁問我啊?你有時間可以去見識下啊,識多D新朋友都好啊。」

「我再諗諗啦...我都唔知阿。」我感到失望,雖然阿蚊意思可能唔係咁。

「阿賢,你已經係大學生啦,希望你會成熟d啦,唔好再睇咁多咸片啦,哈哈。」

「我無睇好耐啦,你係咪又諗返起哥次用我電腦,播左套地雷片?求下你唔好再提啦,放我一馬,唔該。」

「時間真係過得好快,好似眨下眼,你就已經大個仔咁。」阿蚊好似突然感觸,眼睛有點淚光。

「大個仔?你唔好成日當我小朋友啦,我大個仔啦,成十八歲人啦。」

「嗯…好啦,恭喜你入港大,成為我地既一份子,我以茶代酒,乾杯!」



我們兩人拿起茶杯,互相碰杯,一飲而盡。

 「時間都夜啦,埋單吧,今次我請你啦。」

「好,下次食飯到我請返你啊。」

阿蚊笑瞇瞇著,不知道想表達甚麼意思。

我猜不透阿蚊內心的想法,  她有時對我好,但有時候又好像變了另一個人似的,異常冷酷,可能係阿蚊心中,我只係像她的細佬,但我要嘗試話比佢知,我會有所改變,我係一個成熟穩重的男人,肩膀會隨時為你準備。