給過去的自己: 《點解要憎英文？》

「Miss，我好憎英文！唔想做工作紙！唔想串字！」今日，我學生同我講佢既心底話。教左一個多月既英文班，每一次上堂我都好燥、好唔開心，好擔憂學生既英文程度。但係，我都係好享受教學既經過，好鍾意同學生傾計，好鍾意同佢地相處。有可能因為大家熟左，佢地都開門見山咁同我講自己既心底話。見到佢地既英文功課，我真係激死，完全唔知點改。尤其係D作文，竟然可以係空左成頁俾我改。每一次，我都係會單對單同學生問：「點解你要空左佢？」「因為我唔想作，我唔鐘意英文。」幾乎每一個學生，都係咁樣答我，仲要一副理所當然既樣。而每一次，我都係咁同D學生講：「英文好重要。英文讀唔好，就好難考上大學，甚至好難搵到一份好工。」其實，呢句係我既心聲。我都唔知幾時開始，我都變得咁理智？定係我真係唸野現實左？大學，好似對一個小五既小學生黎講，仲有D遙遠。但係，其實好快，時間飛逝，佢地就要升大學了嫁啦。想學好語文，係需要時間去沉浸。  自問我既英文都係比一般，叫做可以up得兩句，咁當然啦，小學既英文，我可以輕易咁ko左佢。我十分明白，佢地憎英文既心情，就好似我個時唔鐘意計數一樣。但係數還是要計，我考DSE時，花得最多時間就係Maths。我同我自己講：「只要過左DSE，入到你鐘意既科，你就唔洗再計數啦！」（雖然呢個唔係事實，我個時最想入既科係要計stat……）但係數學，始終唔同英文。就算俾你英文過到關，你入到大學啦，你面對既，就係全部要用英文寫既essay。就算你唔讀書，返工，做寫字樓，你都係要對著英文！呢個係事實！你根本就唔可以同英文講拜拜！Okay，你唔鍾意英文唔緊要，但你唔好憎英文啦唔該！你一憎一樣野，你就唔會有動力去做！我最唔鐘意就係D學生連試都未試過，就話英文好難，話聽唔明英文。你連試都未試過，你又點知佢好難先？你唔係未試過，就同我放棄英文呀？學生們，你係唔可以憎英文既！因為英文好重要。但到底點重要先？入大學英文要求，至少要DSE Lv.3。呢個考試制度係好現實嫁，就算你唔讀大學，讀High D，你英文點都要合格，姐係lv.2。但咪住！英文重要又點先？唔代表我唔可以憎佢嫁！學生同我講：「我對英文無興趣。」「唔緊要，興趣係可以培養既。」我笑笑口咁答。我知道要點做，可以活動教學！可以用有趣既方法學英文嫁！我唔介意準備多D，然後同成班學生玩英文遊戲。但係，淨係得我一係度講係無用，佢地係要參與D活動先得。就算投入左活動，又點先？原來學生要應付考試、測驗、預測、評估、默書……要溫書都唔夠時間啦！仲點有閒情唱英文歌、睇廸廸尼英文電影呢？我真係好同情呢班細佬，但係如果我係佢，我會點都迫自己對英文有返少少興趣先。因為要我對著D無興趣既書，我情願死左佢去算。你問我呢種咁積極既性格從何來？咁同我你講，一定唔係天生既，係呢個社會迫出黎既。咁當然有D人點迫都迫唔到啦。但係要係呢個社會生存，有D野，你都係要接受。咁既然都係要接受，咁點解唔樂顧D去接受呢？所以，我個時總是在迫自己鐘意數學，至少都有返少少興趣先啦。但個種對數學既愛，就好似火花咁，考完DSE，就熄曬lu~~~雖然呢班學生已經小五了，就黎程分試了，但我依然好想好想好想令到佢地鐘意英文。但同時，我又好想佢地做多D工作紙，然後俾我改wo…. 每個星期得三個鐘，我到底可以得邊樣？ 我知，呢個唸法真係好予盾，但係我真係想令佢地鐘意英文。唉，其實做老師既，都好無奈……講真，你問我鐘唔鐘意英文？坦白講，我呢個讀英文既，又唔可以話好愛好愛英文，但只少我喜歡英文。如果英文係一個男人，咁我雖然未至於愛佢愛到非君不嫁，但我只少會想同佢有發展既機會，甚至拍拖。我D英文點學返黎？真心，興趣同感情一樣，都係要培養。小女子既父親既英文其實真係唔錯，由細到大，都係佢教我英文，同我唱英文歌，睇西片，甚至行街學英文。我自己呢，真係都幾鐘意英文。但到中學既時候，佢就開始由我自由發揮。咁就出事啦！！！多謝無限量工作紙同測驗既包圍，令我對英文既興趣下滑得好嚴重。不過，有可能因為我習慣左睇外國既劇集既關係，再加上我鐘意聽英文歌，所以都叫做仲英文有少少依戀。起碼唔say no先。其實語言呢家野，本來就應該係要生活化，應該要融入生活中學習。但係香港既學生，尤其係接受正規教育個一班，根本就無得選擇。講得難聽D，讀英文真係為左考試，為左生活。咁樣學英文，到底學左D咩野英文？「Miss,我好憎英文！」我明白你既苦況，但係作為老師既我，都只能夠盡我所能，教得幾多就幾多。