《小松奇妙物語！》: １９
峰迴路轉下，以他們三人同檯吃飯，作為是夜的落幕。
旺角街頭即便是深夜，選擇仍然多得很。
有些較有名氣的食店，外頭依然大排長龍，就算是冷清的小巷旁，附近都總會有一、兩檔小販作賣。
「呢間？」莫妍手指頭頂的廣告招牌。
「打邊爐？」小松打開銀包，表情有些勉強：「應該都得嘅。」
期間，我留意到生芥草沒搭過任何話，全程都是莫妍主動跟小松聊東聊西，他活像個守護靈一般，默默跟在身後。
火鍋店位於一條汽車繁多的街道內，屬於樓上鋪類型。如要上去，只需走入大廈，使用那密窄窄的升降機，搭上三樓即可。
「第一次俾朋友請食飯～感覺會幾有趣。」莫妍淺淺而笑。
「哈，真係第一次？」小松半信半疑。
「嗯。」莫妍輕描淡寫地點頭稱是：「多謝你，小松。」
「好閒啫。」小松撥撥手。
升降機門一開，小松就向店內侍應舉起三隻手指，示意有三人和一隻貓來吃東西。
應該‧‧‧
有算我一份吧。
侍應大嬸引領我們坐到窗口位置，那裡可以望到街道上的車輛及行人，能居高臨下這鬧市景況，氣氛不俗。
「好啦‧‧‧」莫妍率先拿起餐牌：「要藍妹定嘉士伯？‧‧‧‧‧‧生啤？」
「我唔飲得酒嫁喎。」小松泛笑。
「雖然你唔飲酒，但你臉上嘅酒窩，都幾得意。」莫妍目光柔如秋波，對小松說些莫名其妙的話。
「吓？哈，咁都俾你留意到。」小松摸摸泛起酒窩的那邊臉蛋。
「好啦各位，我有時都會自己嚟打邊爐，等我幫你哋叫嘢。」說畢，莫妍就彈響手指，呼叫侍應過來。
「肥牛、響鈴、生蠔、油麥菜、冬菇、鮮蝦、石斑、金菇，全部嚟少少唔該，仲有兩枝藍妹，一罐可樂。」莫妍快而直接。
「好多謝啊。」侍應大嬸寫單、離開。
「咦！！？？唔洗講埋份量架？」小松怔怔一問。
「唔洗～」莫妍完全靠在軟墊長椅上，凝視小松。
「咁呢到有冇得用EPS‧‧‧‧‧‧」小松開始擔心付錢的問題。
「唔洗擔心呢個問題，我喺到。」莫妍說話不似假，又讓人摸不著頭腦。
「你喺呢頭，應該有啲地位？」一直不說什麼的生芥草，終於打破沉默。
「噢～小松，我仲以為你朋友係啞。」莫妍說話方式一秒即變。
「連嗰班保安都要俾面你，代表你係有啲料。」生芥草繼續推敲：「不過就算有，都應該係你屋企人有。」
「點啊？低級記者，執番身彩，洗唔洗幫你叫杯定驚茶先。」莫妍嘲諷一問。
「呃‧‧‧呃‧‧‧‧‧‧芥草，部相機仲整唔整得番？」小松拍拍膊，問。
她臉色有些尷尬，看來是聽懂兩人說話帶骨。
「整唔番，不過靈魂仲喺到就得。」生芥草把記憶卡拿出，特意展示給莫妍觀看。
「噢～喔。」莫妍點點頭：「記憶卡好平啫，都係踩爆你部相機開心啲。」
「我係指入面嘅資料。」生芥草續說：「你唔驚我公開？你同佢哋應該有啲關係。」
「公開又點，你知我係邊個？」莫妍反問。
「睇你個樣‧‧‧‧‧‧」生芥草推測：「應該係呢區唔知邊個大佬條女。」
「啱一半。」莫妍揚起微笑：「唔係佢條女，係佢個女。」
「即係話‧‧‧‧‧‧」小松手郁郁，抬頭思考著：「啱啱嘅保安‧‧‧‧‧‧」
「都係我老豆啲手下，油尖旺區都係佢管，信不信由你～。」莫妍點起一根煙，望向窗外人來人往的街道：「但如果小松你因為我身份而我驚，我都明白。」
「‧‧‧‧‧‧」小松凝望莫妍那張有些倔強的側臉，忽然哈哈大笑：「我細個有睇過古惑仔同熱血高校喎，個世界超正！」
莫妍原本有些淡漠的臉孔，不禁變為一聲失笑：「其實冇你想像中咁正，就只係俾一班冇腦嘅男人聚埋一齊圍威喂。」
生芥草了解過後，幫莫妍倒了杯酒：「點都好，多謝你啱啱救咗我。」
「你上一秒仲對我抱住敵意。」莫妍願意喝下他倒的酒。
「哈，職業病發作唔好介意，我都只係想知道你係邊個。」生芥草亦為自己倒一杯。
「不過，你哋闖入嗰種地方係咩事？」莫妍也想了解我們。
「我哋想搵一條片，去證實啲嘢。」
「片？」
「嗯，「高斯死亡樂團」最後一日表演嗰日，嘅閉路電視片段。」生芥草說。
「要搵到唔成問題，我直接叫佢哋俾你都得。」
「我哋搵咗，發現已經俾人刪除。」
「刪除‧‧‧？」莫妍細想一番：「咁其實，你哋想用條片，證實乜嘢？」
「阿妍，可能講咗你都唔會信‧‧‧‧‧‧」小松尷尬一笑。
「唔緊要，我信你。」莫妍一對小松，就溫柔地抿嘴。
「我想證實‧‧‧‧‧‧」小松合眼，內心有些波動：「食人魔嘅存在。」
「食‧‧‧‧‧‧人‧‧‧人魔？！！」莫妍果然一臉驚奇。
「果然‧‧‧‧‧‧」小松望見莫妍的表情後，有些失落。
「我‧‧‧我當然相信喇！」莫妍說得很生硬：「不‧‧‧不過‧‧‧‧‧‧點解會有食人魔出現喺表演會場入面？」
「咁我唔怕講埋啦，「高斯死亡樂團」成員，正正係食人魔兄弟。」小松聲若蚊蠅。
「佢哋？我只係知，佢哋係我老豆旗下好賺錢嘅樂團組合，乜佢哋食人魔嚟嫁！？」
「係啊‧‧‧不過，真係搵唔到任何證據，明明嗰日仲有幾個保安受咗重傷，但係新聞一啲報導都冇‧‧‧‧‧‧」這使得小松也開始懷疑自己，經歷的到底是否真實。
「咁又真係‧‧‧‧‧‧」莫妍把說話含在嘴巴良久：「奇妙咗小小。」
「其實我覺得，自己可以當無發生過呢件事，不過我總係好似想‧‧‧‧‧‧揭穿個真相咁。」小松道出所想。
還有，當天的保安，如今全都換成新。
整件事，就像一片空白，不曾發生過。
「幾好，我會支持你。」莫妍執起雙筷：「不過我諗，不如食啲嘢先。」
鍋子盛載鮮味湯底，鍋子中間有塊直直的鐵片，來分隔辣與不辣。辣的那一邊，莫妍和芥草放了大量的肉，多了份麻香。
不辣那邊，則以蘿蔔、栗米作清湯配料，只有小松默默地夾住素菌下去，然後吃下一點都不飽肚的蔬菜。
鮮蝦熟透後，莫妍將它撈起，雙手拆殼。
花這麼多功夫，沒想到她竟然是拆給小松吃的。
只是，小松微微搖頭，便拒絕她的好意了。
「小松你唔要‧‧‧‧‧‧？」
「我唔食肉。」小松抿嘴一笑。
「你唔鐘意？」莫妍周到地問：「可以叫其他喎‧‧‧‧‧‧」
「我諗小松嘅意思係，所有肉類食物都唔會掂？」生芥草將筷上的肥牛蘸蘸醬油，再爽快吃下。
「‧‧‧‧‧‧難怪你咁瘦。」莫妍說。
「菜都幾食啊，幾香滑。」小松像隻羊，正愉快地嘴嚼油麥菜。
「你哋好似忘記咗我存在。」我脫離溫暖的書包，把上身伸向檯面。
「隻貓想偷嘢食！？」莫妍將筷子伸到我面前，虛勢作夾。
「唔係啊，佢係話好餓。」小松將生菜摘成一小塊，放到我嘴邊：「小葵，開口～！」
「唔要。」我厭惡、無視那生菜。
「佢好似望實條魚咁。」正好，生芥草夾起了一塊魚肉。
「俾我！」我盯緊那件腍魚肉。
「噓，貓貓，唔好喵得咁大聲嘈到人。」生芥草學了小松，用那幼稚聲線說。
「你條友咁多嘢講‧‧‧‧‧‧」我有些不耐煩。
「小葵！唔可以食魚，你食咗咁人哋食咩。」小松像老媽說教一樣。
「咁點解菜我又可以食‧‧‧‧‧‧」
「因為冇人食囉。」小松甜美一笑。
不能吃魚的我，失魂落魄地坐望窗景。
假若我是人類，那就能撈起湯底的魚肉，大口大口地吞下。
貓，其實不怎麼好當的。
「去廁所先。」喝了整罐可樂的小松，暫時離座。
莫妍輕吹口哨，一邊用筷子在鍋底拌來拌去：「你見唔見到～？」
「見到？」生芥草望住她。
「小松，同隻貓講嘢。」
「哦‧‧‧我一早知。」
「你唔奇怪咩？」莫妍提出，並用疑惑的目光向我。
「覺，仲成日帶佢出街。佢叫小葵，咁嘅名，應該係女仔嚟？」生芥草輕輕撫摸我：「不過正正因為咁，我先覺得小松有種與眾不同。」
「其實‧‧‧‧‧‧」莫妍有口難言似的：「你唔會係小松男朋友呱？」
生芥草差點吐出食物：「咳‧‧‧咳咳！緊係唔係。」
「咁你係佢邊個，同埋我都未問你咩名。」
「生芥草，如你所見，記者一個。」生芥草簡略帶過。
「咁你同小松係咩關係呢？」莫妍擺出疑惑的神情。
「一般朋友‧‧‧‧‧‧」
「真係一般？」莫妍再問。
「緊係喇！」生芥草稍為激動：「好似我啲咁嘅人！邊有資格‧‧‧‧‧‧」
「噢，原來你係暗戀佢，哈哈哈，真係冇睇錯。」莫妍笑起來，有些醉薰薰的跡象。
「你條友，講嘢洗唔洗咁坦直‧‧‧‧‧‧」
「喂～貓貓，食啦。」突然，莫妍夾了數塊魚肉給我。
「？？？」我愣視那碗子。
「趁小松返嚟之前，食多啲～但咬到魚骨唔關我事嫁。」莫妍笑了數聲，就睡在座椅上。
我望著碗裡的魚肉，還有正淺睡的莫妍，不想太多就把魚肉吃下去。
「呢條友真係好似醉咗‧‧‧‧‧‧又會突然餵隻貓食嘢。」生芥草說。
是晚，十二點半結束。
我們正想結帳之際，店東主動出來，說這一餐不需要錢。從客氣、奉承的眼神來看，估計是給面子莫妍。
步出大樓，三人都累成狗一樣，呵欠不斷。
莫妍跟小松交換了電話，便搖搖晃晃地離去。
至於生芥草，則將小松送到小巴站才徑自離開。
「今日都係冇收獲～」小巴站，我跟小松獨處著。
她以正面背起書包，就如同保姆一樣。
「要證實有非人生物存在，我諗係好困難。」我說。
「點解？」小松問。
「到目前為止，世上仲未有一個政府官方組織係承應，有超自然生物嘅存在，如果你一個細路女就證實到，咁都幾厲害。」
「親生經歷呢種事都係第一次‧‧‧‧‧‧」小松累得快合上眼皮：「搞到我都唔知，自己係真傻定假懵。」
「‧‧‧‧‧‧」
「例如我識同你講嘢咁啊，其實好多人覺得好怪‧‧‧‧‧‧」但小松眼中，現在只有我：「不過後嚟，我接受咗。」
「接受咗‧‧‧？」
「細個媽咪就同我講，呢種係上天賜俾我嘅禮物，唔應該因為外人嘅目光，而去逃避，我就係我。」小松捏捏我臉頰，說：「所以我依家先可以咁開懷同你講嘢咋～～小葵。」
「你對嗰個空間嘅印象，仲有幾多？」我問。
「好少‧‧‧‧‧‧唔知係咪我刻意去忘記呢。」小松有些苦惱：「我對嗰陣嘅畫面，好似越嚟越模糊咁。」
「可以上車！」小巴司機呼喊。
「上車囉。」小松敲敲我的小腦袋。
對於小松的困惑，大概就像青春期的煩惱。
以為自己是半個大人，卻是個什麼都不懂的小鬼。
「唉～好多人都話我幼稚，好似長唔大咁。」小松凝望窗外的景色：「我都想長大，但我又好想相信媽咪講嘅嘢‧‧‧‧‧‧」
「你得呢次遇到食人魔嘅靈異經驗？」我又問。
「嚴格上嚟講‧‧‧‧‧‧係。」小松急切地拍拍大腿：「如果真係證實到食人魔存在！！咁周圍嘅人肯定冇聲出，特別係死人老豆‧‧‧‧‧‧」
似乎我這種平凡的貓兒，確實難以理解小松的煩惱。
小巴一直駛到柴灣，那裡小松需要轉車才入到石澳。
她一天到底要花多少時間在乘車上？
「呵欠～」微風快意令我們睡意加劇，一起打呵欠。
除了路過的行人，整個小巴站幾乎沒有生息，燈滅車停。
「最後一班車miss咗啦‧‧‧‧‧‧」小松抬頭，望那掛得高高的車牌。
「咁唯有流浪街頭一晚，早抖～」說畢，我就沉倦地睡在書包裡。
「喂‧‧‧喂！小葵，你唔可以咁嫁，拋低我一個，自己舒舒服服喺入面訓覺。」小松試圖將我叫醒。
「‧‧‧‧‧‧」我眼皮合成一線，迷濛地盯她漂亮的下鄂。
「點算好呢、點算好呢。」小松邊走邊望。
轉眼間，小松已在附近繞繞徊徊好幾個圈。
「點解連的士都冇咁悲劇‧‧‧‧‧‧」小松灰心地哀哭幾聲，又重拾正常：「算，我唔信喺小巴站等，會成晚一嫁的士都冇。」
一會兒後。
「你就好啦小葵，訓得咁冧‧‧‧‧‧‧真係有小松的貓兒像個寶啊。」小松低頭，凝望書包熟睡的我。
小松拿起手機，望著上面的黑屏：「手機又冇電，周圍啲鋪頭又收得七七八八，又有啲凍，今日真係搵自己笨啊。」
在無止盡的等待，小松不斷自我抱怨，越說越覺她可憐。
突然，一輛小巴的引擎聲駛至‧‧‧‧‧‧
如同專為小松出現，停在她面前。
「嘟噠」車門打開。
「咦‧‧‧？」小松呆住。
「上車‧‧‧‧‧‧」司機說。
「乜‧‧‧乜一點三十三分，仲有小巴咩？」小松瞧瞧手錶，問。
「凌晨專線‧‧‧‧‧‧」司機答。
「原來有架？咁貼心嘅。」小松掏出銀包袋、上車。
上車瞬間，車門立即關上。
「幾錢啊司機？經唔經石澳？」小松續問。
「坐低‧‧‧‧‧‧」
「哦‧‧‧‧‧‧」小松怔住，坐到右排單人座。
一坐下，小巴就馬上開動。
「‧‧‧‧‧‧唔洗錢？」小松再問司機。
可惜司機，不知作聾還是故意，沒有回答到她的問題。
「咁奇怪嘅。」小松把銀包袋收起。
小巴駛過幾個街口，轉過幾個小彎，就進入接近野外的林路。突然，小巴的收音機播起，一些吵雜的訊號。
「唔係咁邪啊‧‧‧‧‧‧」小松有些少畏怯，表現到面上。
「唔～？」我也被吵雜聲吵醒。
「司機叔叔，你揸緊去石澳架可‧‧‧‧‧‧？」小松越問越細聲。
司機依然不作回答。
奇怪的他，加上窗外幢幢樹影，使得車上出現莫名其妙的不安。
=medium「我等著你回來‧‧‧‧‧‧」
忽然，收音機的吵鬧聲停止，播出了一首旋律詭異的歌曲。
「吓啊！」小松咬住手，吃了很大的驚。
「做咩啊你？一見到我訓醒，就咁大反應。」我張開明亮的貓眼，說。
「呢首歌，係小巴禁忌嚟嫁！」
「小巴禁忌？」歌曲依然在播。
唱歌的女人，聲音彷彿帶著某種哀怨。
「媽咪講過呢‧‧‧‧‧‧」小松盯著司機的背：「夜晚坐小巴，播呢首歌都唔會有好事發生‧‧‧‧‧‧」
「‧‧‧‧‧‧唔好嚇自己。」我的答覆。
「真架！我日日聽怪談，點會唔知！」小松說。
「聽怪談？原來你係每晚怪談都會笑嘅人。」我印象中，小松一到晚上就會上盤腳而坐，躲在被子看些笑聲不斷的節目。
「呃，我係指初中日日都聽怪談。」小松糾正。
「所以，你唔可以換個角度，好好欣賞呢首歌，直到返到去屋企？」我教曉她，做人的道理。
「問題係，怪談講過‧‧‧‧‧‧」小松刻意說得陰森細氣：「歌一完，你就會去到陰間。」
「陰間？？？」
「呃‧‧‧！！」小松試著解釋給我知：「你當係一種，人死咗先會去嘅地方。」
「簡單嚟講，落唔到車就死。」我望住小松：「Right？」
「Yes ar！」小松心急如焚地捉住書包。
「首歌仲有幾耐。」
「我諗‧‧‧‧‧‧仲有一分鐘啦‧‧‧‧‧‧」小松答。
「宜家開始，聽好我指揮。」我說。
「小葵指揮官‧‧‧‧‧‧唔係玩嘅時候啊‧‧‧‧‧‧」小松捉緊前面的座椅。
「行到司機面前，叫停佢。」我下令。
「司機叔叔！！停車吖唔該！」小松離開座位，走到前頭。
司機不但沒有理會小松，油門速度更越來越快。
那司機不止是聾，穿著和帽子更是一身藍，臉色則憔悴、眼窩極深，就像個十日沒睡的人。
=medium「我等著你回來‧‧‧‧‧‧」
我也感覺到，歌曲快要去到尾聲。
正當小松處於憂懼之際，一把幽幽的聲音從後方傳來。
「車開咗，都幾難停。」
我們立即望望倒後鏡，發現不知何時，小巴尾列坐了個男人。
說話的男人，髮型有些厚重、微微的捲、瀏海幾乎蓋住眼睛，卻為他帶來不知名的神秘感。他那瘦高長挑的骨感，讓我記起他是誰。
是我之前在公園，自稱為「假道學仙人」的人。
「哇！！你係邊個、幾時上車嫁‧‧‧‧‧‧」小松又嚇了跳。
「想落車？仲有二十秒。」他一副不在乎的樣子。
「要啊要啊！」
他把頭托高了一點，眼光跟我們觸及了一秒。
忽地，正在直駛的小巴，彷似失去動力般停駛下來。
不‧‧‧
不是停駛，而是停頓‧‧‧‧‧‧
車速顯示器，將數字維持在雙位數，所以停的不是車子，是時間。
他將目光移到別處：「唔好再上錯車。」
「咩情況‧‧‧‧‧‧」小松望望周圍，最後定格在那男人身上：「我想問你係‧‧‧‧‧‧？」
「嘟噠」小巴的門，自動打開。
彷彿，是對方的回覆。
小松見他沒應，便小步小步地走落小巴，下車後不忘回望那傢伙數眼。
繼而，時間就回復正常，小巴亦以那速度繼續前進，在一個轉彎位消失在我們面前。
「我見過佢。」我說。
「頭先‧‧‧‧‧‧」小松問：「嗰個男人？」
「喺你學校附近，佢好似叫自己做「假道學仙人」？上次見佢明明都冇咁冷酷。」
「唔知點解‧‧‧‧‧‧」小松側側頭，思索：「有種，好奇怪嘅感覺。」
「你呢星期，已經遇到唔少怪人怪事。」我說。
「係啊，好似接住而嚟咁！」小松十分難受：「明明之前我都仲係個快樂健康好女孩嚟‧‧‧‧‧‧」
小松又望住我，問：「點解呢？」
「我都唔知。」
「唉～」小松垂頭喪氣，步行回家：「要行返屋企喇‧‧‧‧‧‧」
「呢到邊到嚟？」
「樹林區域囉，跟住馬路就點都行到返去石澳。」小松說。
走了不知多久，終於走到可見建築物的地方──石澳村。
疲勞的小松一回家，開門見到的不是金毛，而是杞仁。
「老豆‧‧‧？」小松脫下鞋子。
「點解你咁夜返屋企？咁樣有啲過份。」杞仁問。
「你等緊我啊‧‧‧？我都唔想，咁係冇車。」小松把書包裡的我抱出，放到地上。
「手機？打咗俾你幾次。」
「冇電。」小松預知他會這樣問。
「杞小松，一個女仔咁夜喺出面，係可以好危險。」可看出杞仁有些生氣，但都盡量抑壓住。
「我知～」踏上樓梯不到數步的小松，停下嘆氣。
「今日開始，你要禁夜。」杞仁說。
「唉，你鐘意。」小松不管那麼多，返回房間去。
一入房，她就躺在床上伸展筋骨。
「你對你父親語氣，比我仲差。」我說。
「我返到嚟又攰，又唔想同佢解釋咁多，我啱啱發生咩事，因為佢點講都唔會信～」小松郁動四肢，感受床單綿綿質感：「如果係媽咪呢，就一定信嘅。」
「你對父親嘅怨氣，已經唔係第一日。」我估算。
「小葵咁都睇得出，叻叻。」小松再也不動，看著天花板：「因為，佢唔係一個，稱職嘅老豆。」
「或者，我遲吓會感受到？」
幽黑房間中，小松沒再回話。
然後，她身上傳來些呼吸起伏聲，似乎用驚人的速度睡去。
今天背住我周圍走，辛苦了。
這晚以後，小松得到的懲罰不單單是禁夜，杞仁更將她的零用錢減至一星期三百元。
這消息，是甜睡一夜的小松，在手機看到短訊得悉。
「可惡嘅杞仁！玩到減我零用錢‧‧‧‧‧‧」在床上，小松氣鼓鼓地望著手機：「呢個年代三百蚊點捱到一星期啊。」
被小松吵醒的我，跳到她床上一同觀看手機內容。
=medium杞仁(父親)：「除了禁夜，每天八時前要回家，你的零用錢亦會減至一星期三百元。我想‧‧‧‧‧‧這是限制你活動繁多的方法之一。小松，要遵守。爺爺外公會幫我檢查。」
「八點前返屋企，冇難道。」我說。
「冇啦冇啦‧‧‧‧‧‧」小松雙手敲著腦袋，苦惱地喊：「對我嚟講根本就無可能做到一放學就返屋企。」
「其實唔難。」
「我日日咁辛苦搭車到調景嶺返學，咁早返屋企我唔甘心啊！」
「隨你便，反正唔太關我事。」
「點會唔關，你估你啲糧同罐頭咁好味，知唔知要貴幾多。」小松捉住我尾巴。
「由今日開始，你唔好再買午餐吧，你唔食，班寵物都要食。」
小松眼神無奈，用拳頭壓住我頭頂：「我哋應該要同甘共苦。」
小松嘆氣，說：「我諗，係時候要計吓收入支出。」
如常地，她以玉米片配牛奶作早上的開端。
左手一匙一匙地吃著脆脆玉米片，右手則在小簿上開始記錄一切。
「今個禮拜嘅零用三百，再加埋銀包宜家有嘅五百蚊，即係暫時有八百蚊。」小松如實記錄。
「好有計劃咁。」我說。
「原本想買褲嫁，唉。」小松托住下鄂，思索：「點賺錢呢‧‧‧‧‧‧賣咗小葵你好冇？你都應該值一、兩個臭錢。」
「好，你賣完我，我再半夜偷偷跑返嚟。」
「！！」小松睜大眼睛，好像這計劃真的行得通一樣：「好正咁喎‧‧‧‧‧‧」
她轉念一想，又嘆：「唉，不過算啦～我唔做違反道德嘅事情。」
「咁要唔要幫爺爺手呢？」忽然，爺爺從外面進來。
「咦，早晨，以為你仲未醒添。」小松打招呼。
跟爺爺說話，反而沒有父親那種隔膜。
「冇整個早餐俾你，唔好意思啊！」爺爺笑道。
「唔緊要啊，我都食緊。」
「杞仁又係嘅！扣你零用錢都有。」爺爺不屑地說。
「咪係囉，原來爺爺都睇到呢，我仲以為個whatapps group得我同老豆會講嘢。」
「哈哈哈，爺爺當然睇到。」
「咁你好應該幫助吓孫女喎。」小松說。
「雖然我好愛小孫女你，不過白白俾錢你都唔太好，咁吧！小松，以後去我鋪頭幫忙！計番人工俾你，好唔好？」爺爺提出個方案。
「嗰間松記糖水鋪？」小松有些印象。
「係啊，上年暑假你都去幫過手，唔記得咩？」爺爺抱手，說：「係以前你嫲嫲為你而開嫁。」
「哈哈哈記得記得～」看樣子，小松回想起來：「不過嗰陣都係貪好玩啫，嘻。」
「計你六十蚊一個鐘人工，要唔要再去做吓？」爺爺和善地問。
「六十蚊即係‧‧‧‧‧‧」小松算著手指：「我平均四點半放學，每日都做到三個鐘左右，一百八十蚊，好啊！」
「冇錯冇錯！小松果然係數學天才！！」爺爺稱讚。
「六十乘三啫～小事小事～」小松似謙不遜：「不過如果你請埋小葵就好啦‧‧‧‧‧‧」
「嗰隻貓？」爺爺望住我。
「係啊！佢超醒目，幾得意，又可愛，實吸引死人。」小松說得如此流俐，是真心話？
「請貓‧‧‧‧‧‧哈哈哈哈，會唔會有啲奇怪？」爺爺嘴巴上笑著，但明顯地，他對這提議感到匪夷所思。
「唔會唔會！」小松笑答。
「咁‧‧‧」爺爺點點頭，想出了什麼點子：「如果佢識得回應我兩條問題，就俾佢成為松記一份子。」
「好！」小松代我答：「小葵加油，有冇得賺多份人工睇你。」
「五嘅羅馬數字係？」爺爺望住我：「哈哈哈，睇嚟佢聽唔明我講咩呢，小松。」
「‧‧‧‧‧‧」我腦海，突然浮現一些畫面。
「唔公平啊爺爺，你問中學生都未必識喇。」小松不憤。
「哈哈，但正常有玩過GTA５都應該知喎，怪就怪小葵冇玩過。」爺爺呵呵大笑。
我把玉米片弄倒，散滿在桌上。
然後，將一顆顆玉米片拼成「V」字形狀。
「厲害‧‧‧‧‧‧」小松愣然：「小葵點解你識嘅？」
「唔知點解。」我搖搖頭，想把腦中畫面揮去：「我就係記得起，腦入面有呢個知識‧‧‧‧‧‧」
「果然係天才小葵！」小松舉起姆指，開心得伸直腰部、跪在椅上：「爺爺再問下一條。」
「呃‧‧‧」爺爺可能也被我的智慧嚇到，有些愕然：「七乘二係幾多？」
我再拼了「１４」這數字出來，對我來說簡單的算術題而已。
「贏咗，唔知小葵幾多人工呢？」小松問。
「呃‧‧‧‧‧‧係真唔係啊。」爺爺驚呆了，抱起我檢查：「呢隻妖貓嚟！？」
「唔准反口啊，話咗佢好聰明嫁喇～」小松像個揚眉吐氣的母親。
「好喇，小葵今後嘅工資就係十四蚊！」
「十四蚊！？一碗楊枝甘露都飲唔到喎！」小松替我爭取工資。
「呃啊‧‧‧咁要幾多啊‧‧‧？」爺爺怕了孫女似的，面帶怯懦。
「至少，五十啦，同我一樣。」小松插腰。
「第一次見咁野蠻嘅僱員‧‧‧‧‧‧」爺爺小聲道。
「我哋啲打工仔呢，就係俾你哋蛤得多。」小松嘆氣。
兩爺孫的協議達成，且即日生效。
現在小松要上學外，放學還要到寶琳兼職店員，而我？跟她一樣，成為了「松記糖水店」一員。
爺爺這間糖水店位於寶琳地鐵站對出的一條街道，那裡算是區內人流旺盛的地帶，工作應該會好煩忙。
店內坐到三十多檯人左右，可能尚未入夜，店舖都頗為冷清，店員大嬸們可以相互聊天，不顧店鋪。
放學後，小松立即將我帶到那裡，正式第一天上班。
自動玻璃門打開，店員大嬸就返回工作模式，以禮貌宜人的語氣叫客人隨便坐下。
「哈佬，三嬸！」小松相熟地打招呼。
「太子女？！」三嬸先是愕然，隨即笑問：「嚟食嘢啊？隨便坐。」
「都話咗唔洗叫我太子女～小松得喇。」
「你對上一次嚟，好似已經係你準備上中五嘅暑假？哈哈哈，讀書讀成點？」
「都係咁啦，不過不失。」小松捉住兩邊書包帶，語帶含蓄地說：「其實呢，今日呢，我係嚟返工嫁。」
「咁突然？」
「係呀，都係今朝先同爺爺傾好，咁我依家‧‧‧‧‧‧係咪要換衫啊？」
「你上年嚟幫過手，嗰件員工衫仲喺到！」三嬸轉身，要去翻找什麼：「我依家去拎俾你，坐住先啊。」
「好！唔該你。」小松踏前一步，橫視店內情況。
「得三、四個人食緊嘢，比我想像中輕鬆。」我偷偷打開書包拉鏈，偷瞧外面情況。
「到夜晚就好多人架啦。」小松坐在旁邊的椅子。
「搵到啦，不過唔知你有冇二度發育，唔知仲啱唔啱你著。」三嬸把員工服拿出。
「我都想再發育高啲呀哈哈哈。」小松接過衣服，走入員工室：「小葵，喺出面等我。」
「噢，居然帶埋隻貓出嚟‧‧‧‧‧‧」三嬸偷望書包裡頭的我。
我報以「嘶嘶～」的警告向她，她馬上轉移視線，瞧別處去，不作打擾。
轉眼間，小松經已換好松記店員服裝。
淺藍上衣、長黑圍裙，另搭一件小松自己帶來的淺色牛仔褲，盡顯樸素簡約。
「哇，見多次都係咁靚女。」身為女人的三嬸，亦不禁讚美：「好有閨女氣息。」
「我好多嘢講嫁，你同我相處多陣就會覺得煩。」小松笑道。
「哈哈哈，你返兼職最多對你半日，應該對一世都唔會覺得煩。」三嬸轉移話題：「係呢，你書包嗰隻係咪貓嚟‧‧‧‧‧‧定我眼花？」
「係貓嚟，佢亦都係松記員工之一。」小松立即將我抱出來。
「係唔係真啊？」三嬸半信半疑地笑問。
「佢叫小葵，請多多指教。」小松把我抱到三嬸面前。
「佢可以幫到啲咩？」三嬸笑不停，應該以為小松在說笑。
「小葵，你自己表演吓。」小松把我放到一張桌子上。
一落地，我就懶洋洋地躺坐在上面，望著她倆。
「佢識‧‧‧‧‧‧」三嬸試圖找出答案：「‧‧‧訓？」
「唔係，佢係識吸引客人！」小松握住雙手，像推薦員：「今朝出門前，我同爺爺講，小葵可以好似貓貓咖啡店嘅貓咁，吸引客源。」
「貓貓咖啡店？」對三嬸來說，應該是很不明白的概念。
因為從她師奶式的髮型來看，就知道她不是個緊貼潮流的人。
現在以貓主導的店鋪，才是王道！
報攤、咖啡店、寵物店等等，都有我們的蹤影出現，貓也能夠融入社會，這通通都是今早乘車回校時，小松跟我說的。