風水佬講鬼: 樹精

或者有時，眷戀係一件好恐怖既事...

人有眷戀，就會產生一份執念，就算死咗，有啲嘢會留喺度好耐...

話說朋友個老爺，生前好鍾意種盆栽，大大小小種咗幾十盆。甚至將尐盆栽擺入房，食飯訓教都陪住。

兩個月前，佢老爺打算出門，買新既盆栽，但好唔好彩，去到中途就心臟病發死咗。

有一晚，隻狗對住間房吠，吠得好勁。





朋友就入房睇咩事，點知發現盆栽既泥同葉上面有水珠，就好似岩岩有人淋水咁，但間屋明明得佢一個。

佢有尐驚，就出咗房門，但同一時間，房入面就有鉸剪聲，好似修剪緊尐盆栽。

嗤...嗤...嗤...

...

一朝早就同阿花搭車入東涌，再轉巴士入水口村，搭咗成兩個鐘頭車，去到嗰陣，太陽都曬到頭殼頂。





驟眼望過去，後面有波浪形既山，周圍既樹生得好茂盛，間唔中有一兩隻黃牛行過，如果唔係成地牛屎，我都想搬入去住。

「你要唔要執一兩舊旁身？牛屎可以僻邪！」阿花笑微微望住我，指住地下舊牛屎。

「唔洗啦！你塞一兩舊落個口，可以僻口臭！」我。

「嗱！我提咗你嫁，你唔好好似之前撞鬼咁，叫到鬼殺咁嘈。」阿花。

「...」





朋友屋企喺山腰，行上去個陣好多蚊。不過去到附近，尐蚊就消失晒，連蟲聲都冇。

我拎住羅庚一睇，方位向正南，左邊樹木比右邊高，仲要背山面海。喺風水角度黎講，呢塊地非常唔錯。

再望埋間屋，有三層高，外邊有圍牆，大門左右有兩隻開咗光既石獅子，眼神好有光澤。

「塊地陽氣重，風水又好，大門又有神獸，點會有鬼？」我。

「我暫時都見唔到有鬼。」阿花。

「可能要入去睇先知！」我。

汪汪汪汪汪...

當我想㩒門鐘，一隻啡黃色既大狼狗就撲埋鐵閘，依起棚牙，起勢咁吠。





聽到狗吠聲，朋友好快就出黎接我哋。但一睇佢個相，就知佢近排運情麻麻，眼袋好深，鼻中間節位有條深色線，應該訓得唔好就黎病。

我同阿花跟住朋友上二樓，打開房門，就聞到一陣清香味。

房中間有個古董青花瓷，左邊有個大木櫃，右邊有張中式書枱，大大小小既盆栽佈滿成間房，如果唔係左右兩邊窗對開，風水上就完美。

「我完全見唔到有鬼！」阿花皺一皺眉。

「會唔會係日光日白，鬼唔會出黎？」朋友好緊張咁問。

「唔會，尐鬼喺任何時間都可以出黎。」阿花。

「會唔會匿咗喺其他房？要唔要去睇下？」朋友。





「你哋去啦！我想留喺度，研究下間房既風水。」我。

佢哋出咗房門，我就圍住間房行咗圈，望咗個木櫃一陣，上面好多木紋，已經花晒，我試下拉開櫃門，發現鎖住咗。

櫃上面好多蟲蛀既窿，我用手指度下，有幾個大到可以塞入手指公。

但點解尐盆栽冇畀蟲蛀既？

我行近一棵盆栽，想摸上面既葉，隻手就定住咗！

攝！

後面有嘢行過！？

我擰住身！乜都冇？但有幾棵盆栽既葉微微咁震！





但當我耷低頭，就見到隻狗趴起地下，用條脷舔自己個鼻，又舔下隻手。

「呼...畀你嚇死！」

話口未完，隻狗企起身，背脊尐毛直晒，對耳豎起，個頭望向櫃個邊。

唧唧唧唧唧...

隱約聽到個櫃入面有尐聲，我趴喺上面，拍隻耳仔埋去聽，個聲音好似有人食緊嘢。

我單起隻眼，喺個窿望入去，入面有尐黑，好似有個人影縮埋一舊。我打開電話，用電筒照住個窿。

唰！





入面既人定咗格，就好似時間停頓咁，郁都唔郁！

個人冇頭髮同眼眉毛，好似一個七八歲既𡃁仔，個口咬住一隻草蜢。

隻草蜢未死，兩隻後腿仲係咁蹬，想跳返出黎，但跳到一半，個人就用力一咬，隻草蜢即時斷開兩截。

架勒！

個人側個頭望住我笑！個嘴笑到好似畀人扯住咁！嘴邊仲黐住一條草蜢腳！

我全身起曬雞皮！驚到退後幾步！

隔咗陣，入面乜反應都冇。

「唔通我眼花！？」我決定望多次。

入面乜都冇，只係得一個空櫃，頭先嗰個人都唔見咗，就好似從來冇出現過咁。

突然，個窿隊咗條蟲出黎！

「你係咪都想食？」有把陰聲細氣既聲喺個櫃傳出黎。

鏗... 

我嚇到成個人跌低，拍咗個盆落地...隻狗嗚咗兩吓就走咗。

「啊！早知頭先執牛屎啦！」

可能聽到打爛嘢，佢哋好快就返黎。見我坐咗落地，個樣好驚青，就問我咩事。

我開頭連嘢都講唔到，只係指住個櫃，係咁嗯嗯嗯。

朋友就用鎖鑰打開個櫃，只係見到幾隻草蜢腳。

「頭先...我見到...櫃入面有隻鬼...喺度食草蜢...仲要隊條蟲埋黎...問我食唔食...」我飲咗啖水，慢慢抖大氣。

「吓！阿花！你唔係話冇鬼既咩？」朋友。

「呢隻唔係鬼黎！你唔想再有類似既事，就快尐送晒尐盆栽出去啦。」阿花淡定咁講。

「咁係乜黎？」我同朋友同一時間問。

「樹精囉！唔係個個有緣睇到嫁！」阿花。

...

事後，朋友真係冇再聽到鉸剪聲。

至於關於樹精既故仔，阿花就話所有植物，如果長時間有人眷戀，就有機會成精。

佢哋唔會害人，會食害蟲，幫人照顧花草。

接受樹精禮物既人，仲會行好運添。

但一諗起條蟲，我就完全唔敢認同...