會計師陳煒獨個走落二樓,我和模型店老闆陳煒在樓梯轉角處靜靜觀察,會計師陳煒故作鎮定、若無其事般在二樓走廊遊走,依據我提供的notebook位置行去,很快他便走出我們的視線範圍,我們只好把呼吸聲減至最低,好讓我們能對未知的微小動靜作出反應。

「嗨!原來你係度呀!CW話你好努力解緊任務,我都想幫吓手。我係樓上揾到部notebook,但憑我一個解唔到,所以我收埋咗,想揾吓有無人幫到手,點知就撞到你喇。不如你同我去一齊解。」遠處傳來會計師陳煒的聲音,看來鬼並非和女星陳煒一起,這也不錯,可以逐一擊破。

「但我係度已經揾到第二部notebook,正想解任務喎。」女星陳煒回答,沉默又再次降臨。我可以想像得到她正指著房內的notebook,現在正是要會計師陳煒表現他身價的時,究竟他會怎樣做呢?在遠處埋伏的我倆只好乾著急。

「嘭!」一重物跌在地上的聲音把令人著急的數分鐘沉寂打破了,是會計師陳煒幹的好事?還是他已經被幹掉了?真的令人很著急。

「而家點算?」模型店老闆陳煒用唇語問我。





我想了一想,同樣以唇語回答他:「你去望下,我黃咗唔去得,如果照計劃行事嘅就咳一聲,有變數嘅就咳兩聲。」

「咁即係推我去送死啫,你個仆街!」最後「仆街」兩隻字他發了少少聲,看得出是由心而發的罵我。

我把食指放在嘴上做出安靜的動作,再用唇語向他解釋:「我都唔想你去冒險,但係都無法,我去嘅話成件事一定失敗,大家攬住一齊死,畢竟佢被我當面撞破咗;你去嘅話都仲有機會完成到,咁到時我哋就可以生存。咁你想攬炒定生存?」我把波拋回給他,雖然他心不甘情不願,但都只好硬著頭皮走下去。

不消數分鐘,一陣急促的腳步聲由遠至近傳來,腳步聲的主人正正是模型店老闆陳煒,他上氣不接下氣的說:「人……人唔見……唔見咗!」

「人唔見咗?」我在腦內整理這句說話,然後身體自然反應動身走上三樓,小心翼翼向陷阱房行去,而模型店老闆陳煒則緊隨我身後。





「部notebook我收埋咗係嗰度。」果然在陷阱房傳來會計師陳煒的聲音,看來他即將成功,我和模型店老闆陳煒藏身在紙箱碉堡後靜待佳音。

然而,數分鐘又悄悄的過去,但依然沒有絲毫動靜,究竟發生了什麼事?

又再過了數分鐘,模型店老闆陳煒終於按捺不住,動身往陷阱房一窺究竟。

「你老母!」他大叫後奔足狂奔,然而不到三秒後跑步聲變成跌在地上的巨響,想必他一定被絆倒了。

「救命呀!我唔想死住,我仲有老婆仔女要養!」他聲嘶力竭的叫喊,然而只有冷冷的女聲回應他:「我哋都一樣,無人想死,但你唔死我哋點生存?你呢啲螻蟻嘅小小犧牲就可以造就我哋,都算係死得有價值,我會係心入面記住你嘅貢獻,遲啲會燒返啲嘢畀你係下面慢慢歎。」





「我哋?係指會計師陳煒定係隻鬼?」我充滿疑惑,但這疑惑很快便消失,因為下一秒會計師陳煒便開口:「你安息喇,哈哈哈!」

「咚!」又是一重物跌在地上的聲音,但這次明顯聲音較低沉,比較重身和實心,是頭!模型店老闆陳煒被斬首了!然後又聽到另一個沉重物體和紙箱碰撞的聲音,紙箱倒地把另一沉重物體──身體淹沒了。

我雖然看不到,但可以想像得到此時的情景,我的心揪了一下,但秒速回復平靜。

「終於又死一件,信任同背叛係呢啲關頭老是常出現,究竟人係咪真係可信?你哋嘅表現實在太精彩喇,我哋嘅觀眾好鍾意,收視率爆升,得返四個人,畀個hint你哋,只有自己先係最可信,哈哈哈!」看來CW也是敝了很久,一出聲便令遊戲變數再加大,我要完成任務更困難。

「我知道另一個女仔陳煒係邊,我哋會一直合作贏咗個game㗎可?」看來會計師陳煒也開始慌了,他們的聯手合作看來很易動搖。

「當然喇,我哋一早講好嘅嘛,你快啲帶我去解決埋嗰條妹先,之後我哋再慢慢搞掂埋個宅男毒撚,之後一齊走,去我屋企煮隻麵畀你食,再試下我幾十年嘅珍藏,無咩人有機會試~到~㗎~」女星陳煒聲線很温柔,還帶幾分妖媚,難怪會計師陳煒會變節。

但時間無多,我從紙箱碉堡的縫隙偷看他們,再乘他們不為意便逃上四樓廠長室,一定要比他們更早找到酒店炒散陳煒。

來到廠長室,發覺房門虛掩,我記得我們離開時一定有把門關好,難道她已經清醒了?我推開房門,找遍整間房可藏匿的位置也遍尋不獲,果然已經人去樓空,如果她被另外兩個陳煒先找到便大事不妙,我嘗試逐間房查看,然而時間並不容許我這麼做,因為兩位陳煒和鬼已經到了四樓,雖然大家還未相遇,但都感覺到對方在這裡。





「而家嘅我毫無勝算,要用啲計仔。」我想了想,然後大喊:「我知道你哋都係度,我都預咗死,但死之前我想話畀你哋知,酒店炒散陳煒佢唔係度,我已經將佢收埋咗係安全嘅地方,係我先知嘅地方,所以我死咗嘅話你哋永遠都揾佢唔到,最後都係等夠鐘大家一齊死!」

「可惡啊!你個死毒撚,你快啲講收埋咗佢係邊?」會計師陳煒怒氣沖沖,這也與我預測相符。

「捉到我,畀個錢你買紅棗!」語畢我拔腿就跑,他也正如我所料立刻跟隨,我沿前梯跑落地下,看見他在後面,便跑到後樓梯再跑上去,中間故意等待他,眼看他就到便再跑,如是者到了三樓,他便再沒有跟上來,他在二樓上三樓的樓梯間毒發身亡了。

「Holy shit!估唔到咁快又到我出場報告現況,而家又死多一個陳煒,不過呢個唔係被人殺,而係自殺,所以無人要受罰,可喜可賀啊!哈哈,今場真係好精彩,究竟邊個可以笑到最後呢?」CW的聲音在整間工廠環迴著,坦白說,我一直覺得他的聲音很令人厭煩,我一定要把他弄死。