【恐怖，懸疑】那天清晨: 第一四九話

突然左則出現一個「勾掌」？

而我又再鬼上身一樣低頭，上身逆時針轉動避過那一掌，左手亦順勢打出一記勾拳。

但Joe已經後退了數個身位，連一根汗毛也碰不到。

「拿，都話你有㗎啦。」

仆街！又試我。但今次試探更為柔和，動作已經在我能夠反應的範圍內，手下已非常之留情。





「我真係唔記得我有學過…」

大家怪怪地望着我，一定認為我像某些仆街般玩弄語言偽術，當他們白痴。

「我…失咗憶。」

軒：「你仲記得幾多？或者應該係你失咗幾多憶？」

「…所有野…我乜都唔記得晒。」





Suki：「咁你唔早講？做乜扼我地啊！」

Kelly：「會唔會係撞親個頭啊？咁可大可小㗎，死啦，哩度又冇醫生，點算呢。」

Joe：「就算失憶，但你學過既野都仲喺度，已經溶入你身體成為你既一部份。」

軒：「可能你既記憶有哩個世界關鍵。」

Joe：「我醒起喇，鬼偶捉到你既時候佢話『真係捉到你喇。』，佢係想捉你？」





「我唔知，我真係唔知。」

軒：「佢有講句咁既野？」

Suki：「你去自首啦，唔好累我地啊。」

Kelly：「咁即係送佢去死？唔得！唔可以咁㗎！」

軒：「唔得。我地唔肯定交佢出去可唔可以令隻鬼放棄追殺…但如果係咁就可以斷尾既話，都諗得過。」

Joe：「唔得，我唔會俾佢地傷害到任何人，要交人，首先要過我哩關！」

軒：「我話諗下啫，又冇話要做啲咩，冷靜啲先。」

埸面突然火爆起來，放人與保人分成兩邊，好在關鍵的Joe沒有因此要我去送死。





「好嘈啊！我訓緊教㗎！」

「砰！」

May姐大力地把房門關上。

軒：「佢係話『真係捉到你喇』而唔係話『終於捉到你喇』，前者係冇乜目的性，反而比較似係鬼偶之前捉過諾但失手，而今次就『真係捉到』，即係你好可能喺佢手上走甩過一次。」