聖嗜殺書院: 第二章：變態觀虐狂

禮堂啲氣氛，一下子由嘈吵變為安靜，仲要靜得異常恐怖，已經可以用死寂嚟形容。兩具屍體，有人因為失去最好嘅朋友而大哭，亦有人打算以觀看人地互相殘殺作為娛樂。禮堂內充滿一股血腥氣味，提醒著我地：唔好玩嘢。我諗緊：點解普普通通一個開學禮，會變左開殺禮？
 「各位同學你地唔洗驚，因為之後做呢啲嘢嘅，就係你地。」校長口中，出左一句狂言。
 咩話？要我地殺人？佢到底係咪痴左線？我開始懷疑呢學校到底變左幾多，明明放假仲好地地，放完假番嚟完全變晒樣。換左個痴線佬校長不在話下，仲要啲學生玩殺人遊戲？
 「你知唔知邊套叫飢餓遊戲？我就係要你地做套戲裏面啲人做嘅嘢。明未？」
 呢套戲，係講一班人被抽出嚟，被迫參與一個殺人遊戲，同日本嘅大逃殺差唔多，但點講都係電影，要係現實之中咁玩，一係死，一係比人拉。
 「佢係咪痴線㗎……」阿志響我耳邊同我講「志！我地退學啦！我唔想留係呢間唔三唔四嘅學校裏面呀！」Joyce 細細聲同阿志講，但校長唔知係正係聽到定有讀心術，好似已經知道我地諗啲咩。
 「你地算把啦，想退學嘅我完全歡迎，不過之後你會比人點樣，我就唔知啦。」Joyce 聽到之後，將頭埋係阿志懷中，發出好細聲嘅喊聲。
 呢個時候，剛才被阿志個七旋斬踢到暈底左嘅中三生，番左禮堂，佢一入禮堂就踏正係個中六生嘅屍體到，佢嚇到仆左係地下。
 「嘩！咩事呀？」佢感到非常錯愕同害怕「你地仲唔報警？仲坐係到？」係喎，點解死左兩個人，都可以無人提出過要報警？唔通我地對死亡已經麻木左？
 個中三生轉身打開門，諗住想走，「唔好走呀！」呢一句唔係恐嚇，而係提醒，因為無人想呢個禮堂又多左條屍體係到。但係最衰，個中三已經出左門口，rip




 「呀！唔好呀！！」「呀！！！！」
 一陣陣嘅慘叫聲，表示呢間學校又少左個人，多左條屍。一個著實驗室白袍，面上戴著一個有奇怪圖案嘅面具嘅男人，拖著個中三生嘅屍體入禮堂，將屍體好似摔角咁一嘢 摔係地下。佢嘅死狀比之前嘅兩個更加恐怖、噁心，阿志為免Joyce 受驚，立即用手摭著佢對眼，唔比佢睇。講番條屍，以我嘅推論，佢係先比人用開山刀係心口近心臟位置斬左一下，呢一下係故意避過心臟，故意唔攞佢命，之後再用強酸淋向佢。令佢死嘅方法係：先令佢出現大出血，再加上強酸接觸皮膚時嘅劇痛，令佢係雙重嘅痛苦之中死去。
 「嘩頂！」「好核突呀！」唔少見到嘅人都作出一個想噁嘅動作。
 「呢個就係報串嘅後果！」報串，真係咁值得令一個人咁樣死咩？
 「你地要玩一個死亡遊戲。」原來仲想諗佢係講笑，但見到啲人接二連三咁死，睇嚟真係唔講得笑。
 「吓！？」「校長你咪講笑啦」竟然仲有人覺得佢係講笑。
 「呯！」
 校長向天開左一槍，「你地邊個唔想玩嘅，行上嚟，我即刻你番歸！」無人出聲「你覺得我係講笑咩？我話比你地知，你地玩得好好睇睇呀，如果我覺得死得唔夠多人，死得唔夠慘，個遊戲唔刺激嘅，你地全部都要死！」
 佢到底係咪青山走犯，點解可以講啲唔係人講嘅？
 「場遊戲當然唔係今日開始啦，呢個星期係比你地準備，遊戲規則：可以合法殺人」




 咁樣，呢個就唔係遊戲。依家好似古羅馬咁，個痴線佬校長就係個皇帝，而我地，就只係競技場內嘅角鬥士，甚至係畜生。我地之間嘅殺戮，對佢嚟講只係一場比賽、遊戲。
 「你地可以走㗎喇」無人走，因為個中三生嘅例子提醒左我地。
 「叫你地走唔走？係咪想死呀！」
 啲人知佢今次係認真嘅，即刻衝番上課堂。終於可以上番堂，我都未試過咁想上堂。