10)西悉尼流浪者剛聘用了前球隊隊長﹑澳洲傳奇球星戴利萊爾擔任新領隊。
 
戴利的球員生涯晚期傷患頻頻,遂於去季退役,踢而優則教,西悉尼流浪者及澳洲足總為他舉行紀念賽,邀請一眾昔日隊友到澳洲參加。

出席紀念賽名單星光煜煜,包括「九尾狐」比爾森﹑戴利在車路士的隊友「塞伯拉斯」﹑前英格蘭隊長辛達遜等……少不了的自然是當年一起高舉歐聯獎盃的我﹑「獵豹」阿祖安奴及球王傑高(飛兒)。


「KIKO! 」球王魅力沒法擋,傑高一出場,全場球迷瞬即起哄,將表演賽氣氛推向高峰。






……
……


充滿回憶的九十分鐘,「歐洲明星隊」與「袋鼠明星隊」打成6-6平手,皆大歡喜。


翌日,我約了戴利和他美麗的妻子-油王女尤珍妮微服出巡,架起墨鏡與到悉尼的邦帶海灘聚舊,那裡的沙還是一樣的雪白亮麗。






 
「呼…」
 
多年不見,戴利已染上煙癮,當年的「冰王子」,講起話來充滿著老屎忽調子。


「依家d『20後』好唔捱得……」他緩緩的道。
「加操又嗌辛苦﹑禁酒又話唔人道……想當年我……」他不住的道。
「話說,我依家都cater緊一個同『當年你』好似既『20後』小朋友。」我打斷他。
「個小朋友好似佢當年咁成碌木唔出聲?」戴利夫人笑問。




「冇錯,但只係其中一樣。」我道。
「佢同你當年一樣識得沉著處理壓力,而且天才橫溢!可惜……你已經變成一個廢老了。」我笑說。
「大家咁話。」戴利瞪著我。
「沉著﹑天才橫溢,咁大掟高帽唔係笠俾我,係俾你既眼光吧?」他又道。
「係俾我地香港既年輕人。」我道。
「當年你叫我加入澳洲隊,話香港一世都唔會入到世界盃。我依家就要證明你係錯,香港總有一日會踢出天地。」
「總有一日……你今年都三十三啦,到時你仲踢到嗎?」戴利問。
「由年輕一輩完成夢想,我係咪仲踢緊又有咩所謂?」我反問。
「有志氣。」尤珍妮讚。
「把握機會,距離下屆世界盃仲有兩年,你仲有機會架Gary。」


中年危機的戴利性格變得鬱悶,尤珍妮卻依然爽朗豪邁,跟她聊天舒服得多。

處理完澳洲的事,距離皇家畢迪斯的開操時間還有兩三周,我放棄回港探親,選擇回到東京替德仔打氣。





五日之後,橫濱水手迎戰新潟天鵝,他有機會處子上陣嗎?
 
 
 
星期二早上,我比德仔媽媽早兩小時到達成田機場,於接機大堂等侯她到來。

我從未見過德仔媽媽,本以為是一幅飽瀝滄桑的師奶模樣,哪知她看上去頗年輕,而且性情率直,難怪德仔與她關係如此親密。



「我答應過德仔,如果佢成功簽約,就請妳黎東京。」我道。
「多謝你照顧德仔。由細到大我都支持佢踢波,但我對於足球真係一無所知。」德仔媽媽道。
「為左德仔,妳要學識下。」我笑道。







與德仔媽媽開車來到橫濱水手練習場,等了約二十分鐘,便見德仔走出來。


「領隊臨時開會傾星期六場波,所以遲左完。」德仔道。
「唔緊要,去返上次間魚生飯店好嗎?」
「好。」母親來訪使德仔開朗不少,看上去精神爽俐。



隨後兩天,我知道兩母子數星期沒見面,或者希望多點相處時間,遂識趣地獨遊東京近郊:箱根﹑川崎﹑江之島等,終於可以好好享受假期。

橫濱水手領隊華盛頓,習慣於比賽當天早上才公佈正選陣容。據球圈人仕所言,這樣做是激勵球員為正選席位拚至最後一刻。





星期五晚上,雖然口裡不說,但我和德仔媽媽均看得出德仔內心緊張,畢竟在數萬名球迷面前處子登場,是非比尋常的機會。

終於,來到星期六早上……


「德仔媽媽!早晨!」


我一起床,馬上給打電話給德仔媽媽。


「我岩岩send左d野妳,妳開黎睇下!」我道。
「呢個係……?」德仔媽媽看不懂日語出場陣容。
「德仔入選左七人後備名單,今日有機會出場呀!」我解釋說。