27)「太空翼沉底傳中,松山接應一射,中國門將僅僅拍出……」
「早有準備既太空翼門前輕鬆執雞,又入一球!」
「3-0!作客既日本隊大勝一仗!」


兩小時後,港隊大軍於卡塔爾酒店大堂電視機前看著中國隊以0-3大敗給日本隊,瞬即吁一口氣。拜日本所賜,我們不致被中國隊拋離。


日本17
中國12




香港10
卡塔爾8
黎巴嫩5
阿曼5


日本贏波後一枝獨秀,次席之爭卻陷入亂局。除了中國外,擊敗我們的卡塔爾在背後亦步亦趨,不可不防。

回香港前一晚,積甸拿克召集了我﹑李翰林及高尼路三名老臣子密議,同場還有隨隊出發的足總總監。






會議開始,積甸拿克率先開口:

「最近既社會流言影響球隊士氣,係無可爭議既事實。」
「冇錯,我怕年輕一代招架唔住政治風波帶來既壓力。」總監說。


在場無人不同意,我們賽前本希望以激將法挽回球隊信心,卻低估了事件的影響力,畢竟家園命運危在旦夕,球員有前路茫茫的感覺實屬正常。






「有冇最新消息?」我問道。
「有。」總監道。
「據聞特區政府已經同中國體委磋商,中超未來或會效法美國MLS聯賽分區域進行。屆時,香港球會勢必被納入大灣區聯賽。」
「唉……」眾人齊聲嘆氣。
「立法會個邊有咩動靜?」
「仲可以有咩動靜?計埋可能會被DQ既幾個自決派議席,建制派手執立法會三分二既力量,泛民主派又無能,議案若被提上立法會,一定會獲得通過。」
「實話實說吧,香港足球會變成點?」


總監想了半晌,開口說出事實:
「如果『五十年不變』提前結束,法理上中國係有權將香港列為廣東省城市之一。到時侯,唔單止港超聯會被除名,香港足球代表隊亦有可能同廣東隊睇齊,『被消失』於FIFA成員名單。」


總監有點哽咽,畢竟他在香港足球界工作了二十年,實在不忍心看著香港足球被中國吞併。






「換言之,未來將唔會出現香港隊了?」事實難以令人接受,的確需要時間消化。



總監掩面苦笑,彷彿已給予眾人答案:
「大家放心,係『五十年不變』風波結束之前,港隊依然享有國際地位,FIFA斷估唔會DQ一支外圍賽未出局既球隊。呢場仗,我地好歹都要打埋落去。」



他的意思明白不過,就是說港隊命運難料,今次可能是最後一次以「香港」名義參戰世盃外圍賽。

會議氣氛凝重,消息使人憂心忡忡,連一向想法正面的我,當想到這些年的青訓工作有可能因為政治理由付諸流水,怎不教人心灰意冷?

當此情景,第一個開聲說話的,是效力港隊十二年的高尼路。







「各位,我雖然唔喺呢個城市長大,但十幾年既港隊生涯,我已經同香港融為一體……」他祖藉巴西,二十歲來到香港踢球,七年後獲得代表港隊資格,如今已說得一口流利的廣東話。
「作為運動員,我地無法左右政治大局……」他繼續說。
「但係,等左足足一個世紀,香港終於有機會打入世界盃,只有仲有一口氣,我地都唔應該氣餒。」
「講得冇錯!」我放聲說。
「他朝一日,如果『香港』兩個字唔再出現喺國際球壇,我地都要讓世人記得,一個只有一千平方公里既小城市,最後一次參加世界盃既結局,係打入決賽週!」
「Gary講得岩。」隊長翰林亦加入說話。
「無論將來發生咩事,我地都要令香港人有尊嚴地活下去,咁樣先係香港運動員精神。」
「講得好!」
「冇錯!」







總監眼角泛淚,站起身說:
「多謝你地……我代表香港足球多謝大家。」
「領隊,依家非常時期,我地唔可以俾班後生仔知道呢d消息,免得進一步打擊士氣。」我道。
「岩,」積甸拿克點頭。
「鑑於球隊表現不穩,星期三場波,我會將幾名小將放喺後備席,以免自亂陣腳。大家點睇?」



眾人點頭表示同意。要年輕人背著沉重壓力出戰實在過於冒險。將他們收起無疑是少了活力,卻能穩住球隊的軍心,待事情冷卻後再行打算。

當此形勢,唯有見步行步。
 
星期三,新敗的港隊回到主場新香港大球場迎戰黎巴嫩。

受政治風波影響,更多香港人走出來支持我們,全場六萬座位的門票兩小時內迅速售清,對上一次出現這個情況,要數到十八年前巴塞隆拿訪港的大盛會。





我在球員通道望出去,十八年前以球迷身份進入香港大球場;十八年後,我的角色是香港隊領袖,在這危急存亡之秋,準備拚盡最後一口氣。


「Gary,領隊要開始講話……」翰林從更衣室走出來。
「嗯。」