消防員一向給予公眾一個好英勇既形象,因為佢地要入火場,要搵命搏。
 
但我曾經聽某啲前輩講,其實救護員都可以好型。
 
試想一下,當有人跳樓,跌到粉身碎骨,正常人都會嚇到雞飛狗走,但救護員反而要衝上前睇吓發生咩事,分分鐘仲要落手處理。
 
雖然呢種「型」唔似消防員犠牲性命嗰種英勇,但絕對可以稱得上為非一般既勇敢。
 
我印象最深刻既一次跳樓case,係傷者面向天咁掛咗喺地面個欄杆上面,粉身碎骨,但由於唔附合明顯死亡準則,所以要進行搶救。當我將對方抬落黎既時候,就好似執起一個斷線木偶咁,感覺都幾震撼。
 




「燈凳燉鄧~」
 
「特別服務,懷疑有人從高處墮下,秋名山去123號救護車…
 
聽到係跳樓call,就算嗰個人係幾勇敢都好,相信心裡面都會驚,因為場面可以係非一般既恐怖…
 
可能係斷手斷腳,可能係肢體變形,可能係無咗個頭…
 
跳樓,一係跳咗,一係未跳。
 




未跳都好啲,起碼有機會勸返對方落黎。最好就睇開啲,唔好自尋短見啦,無人會希望見到有人死,救護員亦唔希望自己要做嘢。
 
企圖跳樓,呢種情況通常會有兩架救護車到場,一架去樓上既現場,一架喺樓下Stand by…
 
大家估吓,邊架救護車既救護員內心會驚啲?
 
當然係樓下Stand by嗰架,因為假如事主真係跳咗落黎,落手處理既會係佢地。
 
於某單企圖跳樓call裡面,我嗰架救護車負責喺樓下Stand by,所有救緩裝備準備好哂,以防萬一當事人真係跳咗落黎,我地要即刻衝過去做嘢。雖然消防經已喺地面打開咗吹氣救生墊,但一個人由咁高跳落黎,係有機會跌唔中救生墊。
 




多事八掛既途人當然紛紛圍觀,有啲甚至拎埋部手機出黎影。
 
有啲仲過分,竟然向上面大聲嗌:「快啲跳落黎啦!」
 
「坐咁耐都未跳,係咪跳架!?」
 
估唔到呢個世界真係有啲人想見到人地死。
 
當時真係好想衝埋去打鑊講嘢嗰條友,講埋啲咁無人性既說話,同啲救護主任一樣咁刻薄。
 
加上佢就講得輕鬆,因為陣間要處理既人唔係佢,而係我地。
 
如果唔係著住套制服,我一定會行埋去爆粗。
 
細華依舊表現得好淡定:「無事既,唔會跳落黎,我相信自己既氣場…但如果係拍黑哥就唔敢講喇,哈哈!」




 
黑哥既黑洞氣場,的確係萬夫莫敵。
 
細華又講:「況且決心要跳既人一早就跳咗,拖得越耐,跳既機會越低。」
 
過咗無幾耐,談判專家到場,並立即趕赴樓上與當事人進行談判。
 
聽講當事人係一名年約三十歲既男性,前幾日女朋友話要同佢分手,佢一時睇唔開於是想跳樓。
 
我唔會批評嗰啲失去理智繼而想自尋死既人,因為有時諗唔開就係諗唔開,我自己都試過因為太傷心而諗唔開,嗰種對人生感到絕望既感覺真係好難頂,好容易會認為死亡或者真係可以解決到問題,但我最後當然係諗通咗,否則今日就唔能夠著上呢套制服。
 
去到最後,好彩個男人無選擇跳落黎,但整個過程前後擾攘咗差唔多兩個鐘,當時我地係連飯都未食。
 
無人受傷,收隊返局食飯。
 




食緊飯途中,老總遞咗張通告俾我睇,上面寫住:
 
「於xxxx年x月x日,以下屬員於緊急救護服務的召喚現場,利用心肺復甦法及自動心臟去顫器,成功搶救一名心臟停頓及停止呼吸的病人。該名病人被送達xx醫院,及後康復出院。由於屬員於事件中表現出專業技巧及盡忠職守精神,現謹透過此通告,作出表揚:
 
 職級編號姓名所屬單位救護隊目13xxx曾樂文秋名山救護局救護員15xxx李寶明秋名山救護局救護員17xxx梁家輝秋名山救護局 
                                                                                                                                                                  」
幾個月前,我同樂文師兄同輝仔曾經做過一宗DBA,對象係男性長者,當時只係好似平時咁跟正常程序做嘢。
 
成日話十個裡面,有九個都救唔返,當有一個救得返既時候,嗰種感受真係好難形容,大概可以話係興奮,或者係感到安慰。
 
因為自己既付出,換返一條活生生既人命。
 
當然,於事件當中醫生同護士都有好大功勞,但作為救護員既我地都有一定程度既功勞。
 
食完飯之後,休息途中忽然有兩個著住便服既人走咗入黎救護站,係一名女士同一個細路。




 
嗰位女士有啲熟口面,但唔記得係幾時同邊度見過,可能係病人家屬,又可能只係自己記錯。
畢竟救護員每日遇到咁多人,好難會認得每一個。
 
傾談過程中,我發現佢地原來係啱啱事件中嗰位出咗院既老伯既家屬,而我亦同對方講咗自己係事件入面其中一位救緩人員。佢地今次專程黎到,主要係想同一班救護人員講聲多謝。
 
「我買咗盒蛋撻,諗住黎慰勞吓你地,順便當係報答你地救返我老爺。」女士一臉感激。
 
呢個時候,女士身旁個細路向我遞上一幅似係佢自己親手畫既畫…
 
畫裡面,係幾個身穿白色制服既人,佢地頭上戴住一頂畫上紅色「十」字既帽…
 
我估佢係想畫救護員。
 
「護士哥哥,呢幅畫送俾你地!」




 
「佢係我個仔,即我老爺個孫。」
 
嗰一刻,我心裡面哼起一首操班時經常聽既歌…
 
 
 
遇上風眼未紅 用我心做英雄
 
難關有我共你手與心 在抱擁
 
能得你認同 才知我是英雄
 
 
 
 
雖然個細路叫錯咗我做護士哥哥,但我無諗住去糾正啲咩,只係講咗一聲:「多謝。」
 
所有既救緩工作,一定都係屬於偉大。
 
救護員日日都要面對生死,死亡呢兩個字,對我地黎講已經變成麻木。
 
我地唔會因為救返一條人命而感到沾沾自喜,因為呢啲係職責。
 
但我地會因為救返一條人命,見到當事人或者家屬重現笑容而感到安慰…
 
因為呢啲笑容,令我覺得一直以來既付出原來係有價值,而呢種價值並唔能夠用錢去衡量。
 
 
 
在我心中是期盼 每張真心笑容 用力量和愛 衝擊每種痛
 
那管天黑是傍晚 看到七色彩虹 未絕望仍要 爭取每分鐘
 
 
 
如果可以既話,我會想十個裡面,十個都救得返。
 
救護員一直都係默默付出,佢地並唔出名,因為喺大眾眼中,佢地做既嘢只係屬於手作仔,唔係搵命搏既英雄。
 
 
 
 
遇上風眼未紅 用我心做英雄
 
難關有我為你闖晚空 在雨中
 
能得你認同 令我格外輕鬆
 
流乾我熱血心未凍
 
 
 
不過唔緊要啦,因為都已經習慣哂。
 
突然受到重視,突然將我捧上天反而仲唔慣,就好似當日望住畫入面既自己咁…
 
呢幅畫,至今我仍然珍藏喺屋企個櫥櫃裡面。