[新手][愛情][排球]那天我成為女之後 我的人生不再一樣: 9.男人婆
返到去入門口既時候，呀媽都好驚訝我做咩今日咁早返，咁我都同佢講聲今日因為遲到，唔記得左拎波衫，所以返黎拎。
咁我用返我對我係男既時候，對間屋既認知去搵下，結果輕鬆搵到套波衫。果然，套波衫同我仲係男既時候，學校女排既波衫款都係一樣，的確係依個世界，似乎只係我由男變成女之外，所有人都認為我係女而唔係男咁。
當我搵到套波衫準備塞入背囊時，呀媽係門口話
「呀女，你摺好先啦，就咁塞既成套衫皺曬喇。」
「哦。」咁唯有乖乖地拎返出黎摺好先啦
咁我摺好塞落去時，呀媽又話
「呀女，做咩你係醫院返到黎之後Ｄ野咁求其既？」
「係咩？唔係呀，咁趕嘛。」我沒氣咁答
老實講，如果以女黎講，又好似真係隨便左Ｄ，我指行為上。但其實我諗返，我以前係男既時候，我摺都唔摺就塞左落去，你話我有冇整齊左，真係唔洗問都知啦下話？但至於點解整齊左？我都唔知，可能因為女既本能？
「呀女，我都係有果句講果句架咋。我地話你都係為左你好，你睇下你依加比起之前，成個男仔咁，咩都求求其其，好隨便，做女仔唔可以咁架，知唔知呀？所有野都要整整齊齊，做每樣野都要斯文Ｄ。你琴晚食飯時呀，坐到對腳擘開曬，我見你係屋企就唔話你咋，你留意下呀，知冇？」呀媽好長氣咁講
「知道喇，呀媽。我都出門口喇，再唔返去我又遲架喇。」我邊推呀媽出去邊講
咁我就著返鞋就出門口啦，等等下Lift時候我諗起呀媽岩先果句「坐到對腳擘開曬」……咁咪姐係Ｄ男仔擰轉頭果時，望到曬我裙底囉！呀！！！唔怪得啦，唉，做女仔就真係依樣唔好。
之後落到去等車，搭車返學既時候都冇咩發生。好好彩返到學校時候仲有兩個字先完Lunch，姐係未遲到同埋可以食野啦。咁我就拿拿聲去廁所Whatsapp Ada同Bianca佢地睇下佢地返到未啦。
一打開電話，我就見到今朝個毒撚入既果個電話號碼，因為我成朝都係度專心上堂，加上變左女仔之後我係度諗野多過玩電話，所以部電話到依加先再比我拎出黎睇。跟住我就諗返起，我電話號碼係咩呢。
我就禁落去睇下通訊錄果版，就見到有我電話號碼(當年iPhone唔記得可以咁睇未，有錯唔好插咁大力)，發現連電話號碼都係以前既電話號碼。心諗今次Fit啦，連電話號碼都唔洗記。
再禁入whatsapp group一睇，原來佢地已經買左食物返黎，咁我就返課室搵佢地喇。
返到入去時，佢地就比左個Seven手卷我，佢地就話「拿，你中意食既手卷呀。」
我望望，原來係吉豬手卷，老實講我真係幾中意食，雖然唔脆，但當左D Wasabi同豉油之後，都真係幾好食，咁我就唔客氣喇。
我三兩下手勢就食完個手卷，仲一口氣飲左半枝水，仲「呀」一聲話爽，真係當旁人無道咁。
我抹完嘴準備扔垃圾時，我先發覺Ada同Bianca兩個望到我呆左。
「喂，你地兩個做咩咁既樣呀？」我問
「冇呀，我地都係第一次見到呀潔你食野食得咁爽，成個男仔咁。」Ada同Bianca異口同聲講
「下……Er……冇呀，有Ｄ餓咪食快Ｄ囉，仲要依度課室黎，唔比食野嘛。」我單一單眼伸一伸脷講，老實講，我發覺做左女仔之後細食左勁多，仲係男仔既我，一個咁既手卷邊度夠飽，但做左女仔之後，食個咁既手卷我已經飽飽地
「係唔係架，我地都擔心你…..」Ada講
「其實你地想講咪講囉，你地想講我同Patrick嘛…」我講
「係呀，我地驚你唔開心嘛。」Bianca講
「咁老實講，點都會有小小啦，但都過左去啦，算啦。」我講，好彩有做功課先知發生咩事姐
「呀潔呀……」佢地一齊講
「咁你見我今日有冇唔開心先？」我問
「咁又冇既，但我地覺得你好似變左第二個人咁，我地驚因為Patrick件事令到你咁咋。因為早幾日我地講起佢，你真係面都黑埋不特止，仲會忍唔住係度喊……」Ada講
「……咁其實都好難會開心咁，但過左幾日我諗通架喇。既然咁易離開我既，我根本唔需要為Ｄ咁既人而傷心。」我講
依刻我覺得我真係好彩做定左功課，大概知發生左咩事先可以咁答佢地，唔係真係比佢地問到口啞啞架喇。咁樣答佢地唔單止唔令佢地懷疑，仲可以令佢地放心，加上我又對個男既真係一Ｄ感覺都冇，突然覺得自己真係一個天才！
「你真係變得豪邁左喎呀潔，雖然你行為比起以前係奇怪左Ｄ，但你開心返就好，起碼你唔會因為Patrick條賤人而做傻事。」Bianca講
我心諗，下，原來佢地係唔知我自殺架？咁睇黎我要將依件事收返埋喇。不過諗諗下都正常既，如果佢地知道既仲唔會係Whatsapp炸我咩。
Ｄ同班同學陸陸續續都返到黎，見到Ｄ男同學一返到黎望住我時，我就諗起今朝我既坐法係會比佢地睇蝕曬，所以我就學返Ｄ女仔夾腳坐，咁就可以唔洗走光。突然覺得依個身體既主人又幾醒，一早防走光。定個個女仔都係咁呢，就唔知喇。
之後冇耐就上埋今日最尾果兩堂，上完堂之後我就同左Ada同Bianca兩個落左去更衣室換衫喇。
「咦，Carrie,Antonia你地都咁快既。」Ada問
「係呀，咁準時放學，咪落黎先囉。」Antonia講
「想快Ｄ打波嘛，嘻嘻。」Carrie講
「係呢，呀潔你冇咩啦嗎？」Antonia問
「冇呀，做咩咁問既？」我問
「你知你啦，因為Patrick既事搞到自己咁唔開心，我地都好擔心你架嘛，佢仲要同你個Best Friend一齊左喎。」Antonia講
「So?」我講
「係唔係真係睇得咁開呀？」Antonia再講
「係囉係囉，雙魚女對感情係好真摰架。就算比人飛左既打死都唔願，發曬脾氣都要返個男朋友返黎架，所以我覺得呀潔你真係確確實實係個雙魚女黎。」Carrie講
「係咩？咁我係幾時既雙魚女呀？」我問
「下？！幾時？你2月22生日，咪2月既雙魚女囉，仲要Type 1果隻添，之前我都有咁同你講過架。」Carrie講
「下……哈哈，一時醒唔起嘛。」我單一單眼伸一伸脷講
「算啦Carrie,呀潔佢唔開心，由佢玩下你啦。」Antonia講
有講有笑咁換衫，換完之後佢地話出去先，咁我又想去去個廁所，去緊廁所除底條褲向下望時，我又諗起我個小傑傑消失得無影無蹤，唉。突然我就諗起岩先一齊換衫時，我望到其他女係度除衫換衫，我居然係一Ｄ感覺都冇，而且覺得好正常……點解會咁架？
去完廁所就出返去，去到排球場時就開始做熱身喇，拉拉筋咁，就拎個波開始猜下波打返Ｄ手感。
猜猜下波就發覺，依個身體可以發揮出既力度同我係男既時候比，係細力好多，但同事間我覺得我既步伐同速度比起係男既昤候係有過之而無不及，而且反應仲比男既時候好。唔通男既時候既我，真係咁廢？……
猜猜下波時候，班男排就慢慢黎到，當我見到一個男排既球員黎到，明明我對佢冇咩感覺，但心入面就會有好強烈既抽痛感傳出，仲有一股痛恨既感覺傳出……冇耐之後有個女仔就拎住枝水行去果個男既身邊，仲扭開枝水比佢，有邁有笑。明明對佢兩個冇感覺，但我見到依個畫面，我就唔知點解好似控制唔到自己咁，一個波掟去牆邊。
其他隊員見到咁，都行黎話叫我唔好咁嬲。係，唔知點解我突然無名火起，好想打佢地兩個。
「喂呀，呀潔，你做咩今日成個男仔咁架，你既行為好似一個男人婆呀。」Ada既一句話令我諗起依幾日既行為，真係咁似一個男仔？咁似男人婆？