[新手][愛情][排球]那天我成為女之後 我的人生不再一樣: 13.飯聚

我地約左Bianca係屯市中間個大電視等，咁我地去到之後，就已經見Bianca係度玩住手機咁等，我地行埋去叫一叫佢。
 
「喂！」Ada一掌拍落Bianca手臂
 
「嘩！好痛呀！」Bianca講
 
「哈哈，鬼叫你睇手機睇到咁入神咩。」Ada笑住講
 
「你地又會咁早既？」Bianca問
 


「咁岩出門口撞到既，可？」Ada用手肘撞撞我問
 
「係呀，都差唔多喇，行啦。」我講
 
咁我地一齊行，我地食東城，所以要行去置樂果頭。行左兩個字左右就去到。我地望望好似人影都唔多隻。係我地三個驚緊既時候，Aaron向我地揮手叫我地。我地行埋去既時候，我望望，都見到大部份既人都到齊，然後Aaron就叫我地等多陣，話就快有位，過左冇耐就叫我地入。
 
因為太多人既關係，東城比左間房仔我地，仲分開左兩枱，咁我地就一於撈亂坐啦。咁撈得亂坐，Aaron，Ben，Joe同Carson見我同Ada，Bianca同Carrie
一齊時，就即刻狗衝左過黎坐同一張枱，仲要坐過去我隔離，加多一兩個男排同女排既人都坐左埋黎我地依枱。而Antonia同其餘既男女排球員，同Eva，Patrick坐同一張。
 
之後我地就開始畫野叫野食，等緊野食黎既時候，Aaron同Joe又獻曬殷勤咁我飲咩呀，豉油辣唔辣咁，我居然唔覺煩，仲會覺得好享受，但同時都有Ｄ尷尬既，冇啦啦好似殘廢咁要佢地幫我拎依樣拎果樣，但佢地又好想咁，咪由佢地囉。


 
無耐野食就黎喇，Aaron同Joe就都唔會執輸，又係咁問我食唔食依樣，食唔食果樣，老實講，有時Ｄ野真係想自己做返，所以今次我都係拒絕算，可能毒撚唔慣比人服侍。但有時佢兩個又會夾Ｄ野埋黎，因為佢地坐我左邊，夾埋黎時都好唔就手，又阻住我食野，最後我就同左Ada調位，等佢兩個冇得夾比我，我再望下佢兩個失望樣，又幾搞笑喎，嘻嘻。
 
其實食左唔係好多，我已經飽飽地，咁之後我就同Ada同Bianca吹水，傾左一陣之後Antonia就走左埋黎
 
「做咩琴晚突然甩底既？」
 
「冇呀，屋企人話煮左我飯嘛。」我講
 
「又話有Ｄ事既？」


 
「咪就係遲左講，佢地煮左我飯囉，哈哈。」我笑住講
 
「好啦好啦，唔問你喇。我地一陣打算去食糖水，你會唔會一齊？」Antonia問
 
「糖水？」我問，無錯，作為毒撚既我以前街都小出，更唔好講話一大班人打邊爐啦。你地可能會好奇問，既然你係排球隊隊員，Ｄ人都會搵你問你食唔食架咩？前文都提過，佢地有佢地既圍威喂，又點會有我份？
 
「係呀，扮唔知咩叫糖水？咪玩啦！」Antonia笑住講
 
咁我因為真係唔知咩事，我望左望Ada，見佢點一點頭，我先話好。
 
咁一大班打邊爐，點會小得玩Game呢？咁會玩下啤牌，以茶代酒咁猜下枚咁，咁雖則我毒，但岩先講既果兩樣都會識玩下。咁都有同下佢地玩左陣，但因為我小玩，所以係咁輸，係咁飲茶，好快都成肚水，本身Aaron同Joe都話幫我頂，我就話唔洗咁走開左，去左廁所。
 
去完廁所返到去，都已經差唔多夠鐘走，職員都拎左張單入黎叫我地埋左佢。當我打算幫Antonia埋埋佢果份時，Antonia就話請佢食糖水得喇，係依刻我就覺得佢又未至於去到Ada講到咁衰。最後埋完單就落左去樓下，Ｄ人就已經開始話依加去食糖水，但唔知點解係好似冇人反對咁，個個有左共識咁係打完邊爐就食埋糖水咁既？
 


最後我地決定左去屯門碼頭果邊食，咁就係置樂行過去，行緊既時候，Ada都有問我以前冇食過糖水咁，我都老實答佢同講點解。之後Antonia就走埋黎八卦下我地傾咩，然後又開始係度講佢套「學說」，但因為Ada係度，所以Antonia先講唔到。
 
行左唔知幾耐，終於行到去間糖水鋪，但間鋪好多人，佢地傾傾下，最後決定買酒去海邊飲。買完我地一大班人就行左去海邊，我地就挨住個欄，Ｄ男仔就係度似，然後Aaron同Joe就係咁拎枝酒黎比我問我飲唔飲？我當然拒絕啦，一黎唔識飲，二黎我覺得唔好飲。
 
咁係Ｄ男仔係度飲既時候，Antonia就拉左我去一邊係度傾計。