[新手][愛情][排球]那天我成為女之後 我的人生不再一樣: 31. Antonia的慫恿

到食完時，我地都散左，今次Ada話佢有下場，我地都報以一個恥笑就放左佢走，咁Antonia就走左埋黎問我一唔一齊行陣，咁我就當然冇理由拒絕佢，之後我地一班人去左車站，送別其他人之後，我地就沿住單車徑向元朗方向行。
 
「係呢，你真係冇野？」Antonia問
 
「係呀，做咩咁問我？」我問
 
「冇呀，我好好奇，當初其實你係好傷心咁，但事隔……一個月？差唔多啦，你又可以好似完全咩事都冇咁，我頭先見到你個樣，好似係好期待Eva佢講返件事出黎咁，仲要係一Ｄ既唔開心都冇。我之前都諗緊你會唔會扮冇野，但今日見到，我諗係啦，但我又好好奇點解你係唔係真係冇事咪問下。」Antonia講
 
「係呀，其實換個身份，換個角度睇一件事，又會有另一番既體會。當初好傷心既呀潔已經唔再傷心，依加係度既，係另一個呀潔喇。」我抬頭望住個天講
 


「做咩你今日講既野咁玄既，又一個角度又另一個人，講到你好似看透世事咁。」Antonia講
 
「又唔係看透世事既，只係覺得唔值得為一個咁既人而唔開心姐。」我望住Antonia講
 
「咁你聽完Eva咁講，你打算點？」Antonia問
 
「打算點？」我問
 
「姐係唔再搵仔？搵過個？認真定拍住散拖？定玩殘班仔？」Antonia問
 


「反而我依加係『鄧』Eva唔抵姐，如果可以好好咁玩謝Patrick個賤人一次，就好。」我講
 
「點解係『鄧』Eva唔抵既？Patrick出左軌喇咩？」Antonia
 
「唔係既，只係我覺得，一次不忠百次不用姐。既然佢當日可以背住追其他女，今日都可以背住Eva追其他女啦。」我講
 
「你都有你既道理既，但依樣野我地都幫佢唔到架喇。但至於玩謝Patrick個賤人好簡單姐，你變再靚Ｄ咁勾引下佢咪得。」Antonia講
 
「咁Eva咪會嬲我。」我問
 


「比佢認清Patrick條賤人既真面目都好呀，順便懲治下其他狗公都好呀！」Antonia講
 
「姐係…..點？」我問
 
「其實唔知你覺得點啦，我自己就覺得男人好嘔心，成腦都係黃野都算，仲要強人所難，霸王……」Antonia講到依度都好似講唔到野咁，之後我就拍拍佢背脊
 
「算啦，我明既，大家都係女，我都知咩事既。但其實都有好既男仔，如果咁樣既，唔會令到一個好男仔傷心咩？」我講
 
「你係善良既呀潔。不過咁，如果佢係唔係狗公，你好快就會分到，咁狗公既，咪玩下佢利用下佢，拎下著數都唔過份！」Antonia愈講，拳頭都握得愈緊
 
「明白既，但可以點做？」我問
 
「拿！都話你有興趣啦！問你一樣野丫，你覺得點樣先會覺得唔抵？」Antonia問
 
「唔明。」我講


 
「姐係咁，當你覺得某個人好正，最後可能你地曖昧過，到最後都冇咁既機會。可能過多排，你就覺得佢做咩好似正左咁多咁，早知…..」Antonia講
 
「早知果時拎出勇氣，依加蝕曬喇咁？」我問
 
「Exactly！就係咁，或者你要比佢感覺到你比佢活得更好，咁樣都可以好成功。」Antonia講
 
「咁依個係長遠目標姐，短期目標呢？可以點做？買衫？定點好？」我問
 
「唔洗心急，你等你可以花枝招展既一日，再係佢面對出現，咁樣就可以比佢感覺到你有幾好，咁樣就等同狠狠咁係佢心中劃一刀。」Antonia講
 
「唔……咁攻心計架咩？」我問
 
「攻？唔攻呀，老實講，我識人好多係Grad左之後，好多都學化妝。老實講香港地，其實我覺得港女本身個樣係生得唔差，稍為化小小妝都已經係女神，有幾多吉列豬扒丫老實…」Antonia講
 


「你又有你既道理既……」我講
 
「所以你要係依個時候就好好裝備自己喇！」Antonia講
 
「咁講起，Antonia你識唔識化妝？」我問
 
「識識地啦，又唔可以話好好既。」Antonia講
 
「係呢，食唔食糖水？邊食邊講？」我問
 
「好呀，食邊間呀？」Antonia問
 
「反正都行到黎洪水橋，不如去果間……」我都未講完
 
「ＸＸＸ！」Antonia講（間野個名，費事開名喇，住屯元天既人應該會知我講邊間，唔知既Google都搵到）


 
「去喇去喇！」我地一齊咁講
 
一坐低，咁我地就叫左野食之後又係度傾，係度傾下點樣令自己改變，變得更好。咁Antonia又叫我可以既，將我講野個Tone拉一拉高，一黎聽落有Ｄ生氣，二黎比到男既感覺係你對佢有興趣。仲話有人對你講野既語氣係死老母咁既，你都唔想理佢啦係唔係？所以都幾認同，加上曾經係男既我，都覺得如果個女用高音小小黎同你講野，係唔知點解有小小high，覺得佢對你係與眾不同咁。
 
而且Ａ仲話，要識講野講到令男覺得有機咁，咁就贏喇。佢仲舉左個例比我，講我聲可以咁做。令我諗起Antonia以前既野……
 
咁我係度諗一諗野，我地order既野就到左，同時係依個時候就有個男既行左埋黎我地隔離。