我行到去輕鐵站坐低,係等緊車時係度諗返起以男既角度睇Antonia,同以女既角度去睇Antonia,再比較返,發覺都幾大出入,唔通依D就真係做男既時候,睇唔到D女既真面目?
 
但同時我又諗起,依加Antonia手上手機……同佢既身世好似唔係好夾,但一諗起佢D兵……睇黎係香港做女,似乎真係好過做男。
 
突然電話震左一震
 
+852 6xxx xxxx:Hi,我叫Dick,頭先係糖水鋪果個呢
 
原來係頭先果個,好啦當練習下
 


我:Hello,唔好意思呀,我小睇電話呀,之前冇覆到你
 
+852 6xxx xxxx:唔緊要,係呢,我頭先見你個Friend叫你呀潔,咁我應該點叫你呀?
 
我:你中意啦,學佢地叫我呀潔又得,叫我Katrina都可以
 
+852 6xxx xxxx:好啦,佢地都叫你呀潔,咁我就Set返你做呀潔先
 
係喎,Set返低先,我諗都要知道邊個打邊個既。
 


Dick:係呢,你做咩咁小睇電話既?
 
我:咁我小人搵嘛
 
Dick:點會呀,你個樣似都多人搵喎
 
我:係咩?咩叫個樣都似多人搵呀?(單眼Emoji)
 
跟住我就見到Dick輸入中…,之後又Dick在線上,又再Dick輸入中…咁樣loop左幾分鐘。
 


Dick:善良樣,平易近人,所以多人搵囉
 
我見到佢咁講真係當堂笑左出聲,咩叫善良樣。
 
我:下話,咁咩係唔善良樣?
 
就係咁就同左佢Whatsapp到落車返到去,咁同左佢講左聲返到去之後,就放低電話去沖涼。
 
沖緊涼時諗返起同Dick既對話,雖然無咩營養,但就叫做開開心心咁笑下,都無不可呀,如果同其他人都係咁,生活應該都幾易過。
 
沖完涼返出去我就攤左係床度,之後就拎起部電話睇,開Whatsapp一望,都好多人搵我但我係冇理到佢地,有D直頭唔知係邊個黎,算啦,理左D知係邊個黎先。唔…… 理左Joe同Aaron先。
 
Joe:Katrina,想問下你呀。
 
Aaron:瑤瑤,你黎緊星期六得唔得閒呀?


 
望完都心諗你Aaron都幾狼死,直接約,反正都玩,而且星期六都冇咩做,就同下佢出街啦,咁覆左佢先。
 
我:星期六得閒呀,做咩呀?
 
Aaron:打算搵你睇戲呀
 
我:睇咩戲呀?
 
Aaron:那些年,你想唔想睇?
 
我:可以呀,仲有邊個去睇呀?(老實講,比著以前仲係仔既我,睇那些年依D戲真係唔會幾條仔去睇,但依加變左女之後,反而覺得同女同仔睇都冇所謂,因為我真係對依類既戲都好有興趣,唔知係唔係因為變左女既關係啦。)
 
Aaron:叫緊人架喇,咁我過幾日買定飛啦。
 


我:好呀,麻煩你喇。(我心諗…下,咁快過幾日肯定有幾多個睇?你都未知有幾多個就去買飛?姐係你預左得我同你啦。點解我會咁覺得?好簡單,做緊仔既都知好小一早約,而且一早約都係臨到去做果樣野既前一刻先會答實你。)
 
Aaron:唔洗客氣(加個笑既Emoji)
 
好喇,咁我再睇下Joe既Whatsapp先。
 
我:做咩呀Joe?
 
Joe:我想問下你呢,你星期六會唔會有時間?
 
我:星期六未必得呀。
 
Joe:咁……星期日呢?
 
我:可以呀


 
Joe:咁我約你星期日你會唔會出黎?
 
我:你想做咩呀?
 
Joe:想約你睇戲呀,你想唔想睇?
 
我:你想睇咩呀?
 
Joe:那些年
 
我:下,我同朋友睇呀,不如睇第二套?
 
Joe:不如睇多次?最多請你睇?
 


我:咁又好似唔係咁好既
 
Joe:唔緊要啦,你肯睇就可以
 
我:咁……好啦,咁星期日再同你睇啦(其實我心諗,同一套戲睇兩次,有咩好睇,你話隔返一兩年再睇就話姐。但佢好似好想我出咁,就出返次啦,諗起果時約Antonia,期待你出既心情我都好明白既。)
 
Joe:好啦,咁約實你架喇!
 
我:好啦,到時見啦,時間你再講我知?
 
Joe:好呀,過幾日買左飛再講你知。
 
我:好啦,麻煩曬
 
Joe:洗咩咁客氣呀,咁到時見啦(又係笑既Emoji)
 
咁之後我就攤多陣,係度諗今日好似發生左好多事咁,諗左無耐就訓著左。
 
訓訓下我個電話係咁震,震到我都醒埋,咁我就聽啦
 
我:喂
 
Antonia:喂SIS,今日猜唔猜下波咁呀?
 
我:Antonia?(我問完再望望來電)
 
Antonia:玩野呀衰妹,我把聲都認唔到!
 
我:唔係呀。呀嗚~(打喊露)岩岩先訓醒咋
 
Antonia:咁點呀你?打既一陣老地方等。
 
我:好呀,咁一陣見啦,食埋野先。
 
Antonia:咁一陣見喇。
 
我:嗯,Bye
 
咁收左線之後就起身刷牙啦,刷完就返入房換返件衫,由於懶既關係,我搵左件衫,著件簿褸,一條短褲仔踢住拖咁落去食算。落左去樓下之後先諗食咩野,但樓下黎黎去去都係果幾味,男既時候都食到我唔想食。心諗M記早餐?都唔知食咩好,熱香餅又唔熱又唔香又唔餅,其他又唔好食,扭扭粉又小….咦,講起身黎變左女都好冇食過M記扭扭粉,話唔定夠飽,咁最後就走左去食M記。
 
咁叫完,等完打算拎去搵位食,但邊行時,D男既都會不時望下我,我心諗真係咁好望咩?我仲見到佢地係望我心口,再望樣,再掃視我對腳同腳指……洗唔洗咁狼死……
 
咁我都一於小理,係度邊食邊睇下電話,覆下Whatsapp,發覺如果要全部都覆曬都幾浪費時間,同埋同之後諗既一樣,個個都覆曬會唔記得,所以其他就得閒覆兩句,重點人物就當然……你們懂的。
 
食食下,我果枱就有三個後生男既就坐低,我望望佢地,佢地又望望我,望落都係大我兩三年咁,我都一於小理,繼續食我既野。差唔多食完時,佢地係度擾攘左陣,我心諗佢地係度做咩,之後抹完個嘴想起身時,坐我右邊果個男就將張凳移埋黎問
 
「係呢,想問下你係唔係讀XX中學?」
 
「下?」我好奇問
 
「冇,因為我地係第二間中學男排舊生,琴日我地都有睇到你地女排打果場,我地都諗緊係唔係你。」個男講
 
「呀……有打呀,所以…?」我問
 
「冇,見你咁好波,諗住睇下你會唔會同下我地打下波咁姐。」個男講,唔知係唔係心理作用,佢講好波個波字好似拉長左咁。
 
「或者有機會先,我趕時間,我走先喇。」我點點頭就走
 
「喂喂,我地未知點叫你呀。」
 
「喂」
 
「喂」
 
佢地係度叫,咁我當然快快腳咁走啦,睇個款佢地都係狗公一堆,都係走先,又唔識佢地,都係費事同佢地咁多野講算。

 
已有 0 人追稿