[新手][愛情][排球]那天我成為女之後 我的人生不再一樣: 41.脆弱的關係

 
我返到去之後，我就攤左係床上面係度諗我頭先咁椒同Ada講野究竟會唔會太過份，最後都因為過唔到自己既心理關口，我就起身，打算拎起個電話搵Ada傾下，我一拎起身時就見到Ada send黎既whatsapp
 
Ada：呀潔，明明你本身係一個好好既女仔，但之前一直都唔知咩事令到你變成今日既你，但頭先你咁講完，加上你既行為，我發覺我點勸你你都無動於衷，我對你真係好失望，算啦，我明白到每個人想既野，追求既野都各有不同，我地既友誼或者都係到依一個位就算啦。
 
我望完不禁感嘆左一下，原來所謂既友誼，原來我一直希望得到既友誼，都只不過係咁脆弱。即使果時同Carson係最傾得，我係佢心中都唔係最好既朋友，唉，事已至此，見步行步啦。
 
最後我Whatsapp  send左句「對唔住」之後,就放返低電話去沖涼。其實講起，自從做咩女之後，都真係中意乾淨Ｄ，成日都會沖涼，嘻嘻。
 
咁沖完無耐，呀媽就返到黎，佢就面都黑埋又一路都唔出聲，咁我見咁都大概估到發生咩事，應該學校有打比佢啦。


 
咁過多陣食飯既時候，呀媽終於開口
 
「今日搞咩？」
 
「下？」我扮下傻先
 
「你唔好扮傻喇，唔好當我唔知啦，你今日係學校搞咩黎？」呀媽問
 
「下…佢屈我喎……」我無奈咁講


 
「屈？！學校話你帶頭搞事喎，仲要撕左張缺點同鬧呀Sir，有冇咁既事？」呀媽好激動咁問
 
「總之我就冇帶頭搞事，你信就信唔信就算，我都冇咩好講，你成日都幫住學校果邊，人地講咩你就信到十足，你個女我講咩你就唔信，依加你係都要信人地而唔信我既我都冇野好講啦。」我好激動咁講
 
「依加唔係我信唔信你，係人地一定唔會冇啦啦咁屈你，所以你一定係有Ｄ問題人地先會咁。」呀媽講
 
「總之佢地唔知頭唔知路就屈我，你又信人地咁講，我就冇野好講。」我講
 
最後我飯都冇食，就咁就行返入房閂門，就匿左係被窩入面，而呀媽就係度拍門講


 
「都唔知你做咩，你自從中秋入完院返黎之後，就成個人變左咁，變到咁奇怪，都唔知你係唔係係醫院惹左Ｄ咩返黎。」
 
「惹你個頭呀！要你關心時你去左邊？下？惹惹惹，一有事時你就係識怪我點點點，你有冇認真理過我呀？」我喊住大叫
 
「我唔理你？我唔理你既話上次你中秋入院既時候我就唔係度啦！」呀媽講
 
「要我去到入院你先到，會唔會太遲呀？我需要你既時候你去左邊呀？」我喊住問
 
「我要成日理你既我點搵錢養你呀？」呀媽講
 
「你根本咩都唔知，只係識係度怪我做唔到你既要求！」我講
 
「你夠係！你都唔知搵錢有幾辛苦！日日淨係識係度要依樣要果樣，見到你都煩！」呀媽講
 


「係呀係呀，我好煩架！唔好理我囉！」我喊住咁大叫
 
「好呀！你自己講架！死女包！」呀媽講
 
然後我就繼續匿係被窩入面喊，都唔知喊左幾耐，到我唔再喊時，離開被窩落床已經成十二點幾，廳出面已經熜曬燈，咁我就拎衫，再入去廁所沖一次涼，係沖涼既時候，我由細個一直諗返，細細個呀媽就只係顧住搵錢而冇理過我，每日一早出門口，夜一夜先返，而呀爸都係咁，由細個起身已經唔見佢地，到放學返到屋企，做埋功課打陣機，到餓時佢地先會返黎，我對住四面牆同電腦既時間仲多過對住佢地，老實講，我對佢地既了解，真係一Ｄ都唔深。
 
之後到開始大，小學升中學，到拎住張派位表返到去，佢都亦都係好夜先返到，佢地只係望一望我派位表，見派到第一志願，好似只係覺得理所當然咁。到上左中學，一開始唔習慣另一個學習模式，成績唔太好時，佢地又只係不斷咁鬧我點解咁差，點解唔做好佢，但冇諗過我其實盡左力，冇諗過我需要Ｄ咩……
 
到我男女交換左，亦都係咁，呀媽始終都係呀媽，都係冇變過，到我有事時都只係會責怪而唔係慰問….最後搞到關係咁僵，就好似同Ada咁，得來不易既關係，只係一個簡單既行為就可以將其結束。