火花不等人: Miss Yuen Chung Ting

「無嘢嘅話我走喇喎。」
「嗯。」我突然啞火，就此目送袁頌婷離開。
從Canteen經扶手電梯到四樓，電梯口便是Cut Price，無意識的步進店內。
「Miss Yuen Chung Ting」就有放滿了3M Memo的貨架上，我Send了個SMS給袁頌婷。

離開Cut Price在人流又開始回升的Podium浪蕩，從Lecture 1走到Lecture 18，橫渡了整個Podium，才收到了她的回覆：「What? Mr Chan Ching.」

男女之間其中一個不能平等之處，就在於Mr及Miss兩個字，Mr只能用作稱呼一位男仕，相當狹義，而Miss則除了可用作稱呼一位未婚女仕之外，也可以有其他的含意，所以說，女人真比男人複雜。

袁頌婷沒有明白我的意思，但收到了她的SMS已經足夠讓我感覺良好，對上一個收到的訊息已經是八日之前，那一晚收到她睡前跟我道晚安，然後我繼續看英超馬西塞特郡打吡。



「幾天無收到你SMS，唔慣」
「八日喇喎，唔慣又唔一早講？」原來她也知道有足足八日。
「好似好耐無見你」
「係咩？唔係啱啱散會無幾耐咩？」
「除此之外」
「除此之外就係上次係恒生囉」
SHIT！
「個日同Peggy溫完書本來想一齊去食TEA，點知就撞到你。」
「係囉，我出現得唔係時候囉。」SHIT！


「做乜頭先走得咁快？」轉話題﹗要馬上轉話題﹗
「咪轉話題呀你！」突然間變得聰明。
「唔係呀！真心問，係邊呀你依家？」
「你望下你後面」
我馬上回頭，熙來攘往的人群都看不見袁頌婷的身影。
「有咩望呀？」
「望唔望到你自己個樣有幾低B呀？哈，我係圖書館呀。」老掉了牙的小把戲由一個在我眼中有點「蠢蠢地」的小女人所使出而我仍然會中計，大事不妙。
「過嚟搵你」我有猶豫過要不要在這訊息結尾加個問號，結果沒有。
「我同人溫緊書喎」
「邊個呀？我識唔識架？多個人一齊溫囉。」


「我同Alex一齊，仲有，呢度無晒位喇，你嚟都無用。」
「坐你附近都得卦」
「Alex話佢介意喎，哈哈」
「佢憑咩介意？佢老豆係邵逸夫呀？」
正當我無名火起正想直奔圖書館之際，收到Peggy的SMS﹕「Chloe is with me, and Vicky, haha」
收到Peggy通風報訊我馬上來個急停轉身，冷不防後面的同學收制不及撞上我，我馬上道歉，幸好對方亦和善。
「Thanks Peggy!」給Peggy致謝。
「下次搵過個好啲嘛，Alex真係毫無威脅囉！」向袁頌婷示威。
「收皮喇你！」
「我返房瞓喇」
「早抖喇你！」只要袁頌婷的訊息中有感嘆號，她的生氣都是裝出來的。

我180度轉向打算返回宿舍，又再一次途經Cut Price附近時碰見了如假包換的Alex，我還一副洋洋得意的咀臉跟他打個招呼，讓他有多少驚訝，在他眼中我的笑容可能比鄭子誠更有陰謀。