火花不等人: 緋聞男友

「喂！」就如當日乘她開Locker時嚇了她一跳一樣，她轉身過來便一掌打在我胸口，比上次更痛。
 
她睜大雙眼看著我，呼吸變得急變得重。
 
「Do I have your attention now？」直望她雙眼的我不失霸氣。
 
袁頌婷失笑，輕嘆口氣，呼吸不再喘亦變輕，淺笑下帶出梨渦。
 
「點呀又？無懶！」
「嬲完未？」我一臉認真。


「頭先個下？未嬲完喎！」
「如果係因為頭先個下，你似未驚完多啲喎。」
又一掌，不過比較輕力。
「點解消失咗咁耐？」
袁頌婷想了半刻提出要求﹕「想知，唱首歌嚟聽下。」
「無難度！要唔要點唱？」
「你自己決定喇，小心揀歌喎不過。」
「哈，其實你望下個場，仲邊輪到我地揀歌呀，拎到支咪都偷笑喇。」
「陳政，到你喇，快啲快啲﹗」極具老闆風範的Alex相當適時的配會我，有幸得蒙其寵召，我跟袁頌婷相視而笑。
「其實佢有時都幾得意呀。」聽到袁頌婷這句根本不是讚美的讚美我還是有點不悅。


「仲好幫得手添。」這句我是真心的。
 
雖然房裡少說都有四十人，但絕大部分都沒有理會唱歌的是誰，所以我也不必理會他們，自顧自的唱。





「點呀？滿意未？」
「OK喎，不過人地慘情歌嚟咖，你唱得咁輕佻。」
「我剩係想表達第一句之嘛，唱完第一句其實首歌可以Cut咖喇，其他個啲可以不理。」
袁頌婷想一想﹕「低B。」

袁頌婷望著我，突然，她捉著我的手，一聲「跟我嚟」便拖著我在人堆中跌跌碰碰的離開沙發。被她嚇一跳的我在倉卒之間最後關頭一手抓住了她留在沙發上的一件大褸。眾目睽睽之下離開K房，其他人見到會以為差人查牌我倆因為無證要散水。
 
步出K房，她仍然捉著我的手腕，但經過長長的走廊去到大堂後，我倆的手已經互相牽著。
 
抓著我手腕時，因為只有她單方面使勁，我是完全被動的，所以她要用力抓緊以防脫手，但當接洽點變成掌心對掌心時，她便不必再太過用力，因為已經不用擔心兩隻手會鬆開，力度放輕後，我才感受到袁頌婷掌心的溫柔。