跟住我就喺後面慢慢跟住佢地

直至去到一個分岔口,

佢個朋友就去咗商場嗰邊

而佢就行去巴士站個方向

咁我當然係行去巴士站啦,



係咪好痴線

我都唔否認嘅

不過有時有啲人就係咁,

我唔係將自己呢個舉動合理化

但係當你試過好想見一個人又成日都見唔到嘅話,



就會不自覺喺度諗埋啲非常手段去見

我正正係呢個階段

講返當時先,

果然冇估錯,

佢真係搭返之前嗰架巴士



不過嗰陣架巴士就未嚟,

咁佢就梗係喺度排隊啦

呢個時候我又見唔到有其他人排呢條隊,

咁我就二話不說排佢後面

跟住佢可能feel到後面有人,

就擰轉頭望住我,

跟住就好驚訝咁樣

咁我就扮晒野話「你好」啦



嗰個女仔:「又見到你嘅

我心諗其實冇咩出奇啫

我又唔係啲乜野通緝犯

放學搭巴士根本係平凡到唔平凡

我:「我搭巴士咪見到我囉

嗰個女仔:「喂係喇

快啲開估呀



我:「開估啲乜

嗰個女仔:「上次你條iq題

邊個區成日水浸嗰條呀,

莫非你未諗到哈哈

我:「痴線點會未諗

你都要估先得架

咁快開估邊度好玩

嗰個女仔:「其實我真係有諗



車嚟喇上到去先講你知,

一定啱

講完之後佢重單一單眼,

呢個樣真係冇得頂

真係好少見到一個女仔我係覺得咁靚

同埋亦都好似好平易近人,

你話我ff都係咁講



雖然真係同佢唔算係好熟,

起碼第一印象比我感覺係咁先啦,

你知你啲靚女恃住自己靚啲,

就喺度鬆毛鬆翼

呢個女仔真係清泉

我係主觀架喇,

吹呀


上到去佢坐返之前嗰個位

亦都因為我呢架巴士次次都係唔多人坐,

特別係上層,

所以成日都大把吉位任人揀

之後我梗係順理成章坐佢隔離啦

咁樣證明我放學留喺度踢咗個零鐘波而冇返去打aoe,

係絕對值得

投資正確呀

我:「又話一定啱

講嚟聽下先

我就唔信你諗到

問過咁多人都冇人答到

嗰個女仔:「係真唔係呀

我:「梗係啦我自己諗

搵唔到答案架喇

快啲講嚟聽下

嗰個女仔:「九龍塘

因為狗仔同埋龍成日都去嗰度玩水塘,

咁咪水浸囉

如果係男仔咁同我講,

一定問佢瞓撚醒未

21世紀重喺度講龍

戇鳩仔有樣睇

不過係靚女就梗係話可愛啦

係雙重標準架喇

不過當然我冇當面讚佢可愛,

咁咪成個狗公咁樣

雖然嚴格嚟講我都係

我:「呢個係咩答案

梗係唔啱啦

嗰個女仔:「點會唔啱呀

我:「我嗰個好過你

你搵到條龍出嚟我就信你

放心嗰陣未出巨龍呢個term(應該係),

所以各位唔使諗錯隔離

嗰個女仔:「我知喇

係牛頭角

因為牛唔飲水唔撳得牛頭低

我:「搞錯呀係咩答案嚟

嗰個女仔:「其實我都知好牽強

不過諗住博懵哈哈

咁樣究竟個答案係乜

我:「九龍灣

嗰個女仔:「點解唔係九龍塘呀

水塘啲水點都多過灣啦

我:「梗係唔關事啦

嗰個女仔:「解釋呀

我:「你知唔知九龍灣有啲乜

嗰個女仔:「megabox,德福囉

我:「重有一個商場呢

嗰個女仔:「淘大

我:「你講中咗

嗰個女仔:「關淘大咩事

我:「陶大宇呀,

哈哈哈哈哈

唔好意思我又要扮阮兆祥

請各位體諒

嗰個女仔:「好無聊呀

我:「無聊你又笑

嗰個女仔:「其實原本想忍住唔笑

但係聽你啲聲真係忍唔到

真係太好笑

唔好再笑呀

我:「笑到咁即係服啦

嗰個女仔:「我認輸喇嘻嘻

我:「話說你邊班

梗係乘機問佢邊班啦,

我做咁多無聊野,

無非都係想了解佢多啲啫

嗰個女仔:「唔·話·俾·你·知

除非有多條iq題,

而我又答唔到

咁就考慮下

我:「咁你講定都得

我真係有第二條

嗰個女仔:「唔係呀話你講真架

點解你成日有咁多我未聽過嘅iq題

我:「我個樣似吹水咩

嗰個女仔:「似

我:「搞錯呀你都唔配合劇情嘅

嗰個女仔:「嘻嘻

有條件呀,

如果我估到咁就到你講你咩班

我:「驚都未驚過

因為你一定估唔到

嗰個女仔:「睇下點

我:「打邊爐嗰陣,

有一樣食物唔可以淥落去(各位放心唔係淥死誰手)

知唔知係邊種

嗰個女仔:「簡單啦

我:「下次見到嗰陣開估,

你等住講啦

事關我依家要落車喇

嗰個女仔:「你等住講先真

今次實估到



「唔係呀話你講真架,

點解你成日有咁多我未聽過嘅iq題。」




唔通我同你講

我為咗撩你傾計,

日日喺度諗咩,

的而且確男仔就係咁無聊

為咗氹到自己想氹嘅人哈哈大笑,

再低b嘅方法都會做

好幸運咁樣我係成功嗰個。