跟住行行下

芊靈就見到呀bi行得愈嚟愈慢

跟住佢就踎低摸呀bi個頭

芊靈:「佢應該想返屋企喇

我:「真係



跟住我都踎低,

一路摸一路望住佢

佢個樣又真係好鬼懶

得閒就行過嚟聞我隻手同埋隻腳

好鬼得意



芊靈:「咁我送佢返屋企啦

我:「好啦咁我都走喇

芊靈:「一場嚟到唔好咁快走住

我:「你想點

芊靈:「話說呢度個商場有間豆腐花好好食



食返碗先走啦

我:「好

芊靈:「不過依家要先將呀bi帶返屋企

因為嗰度冇話俾寵物入去

我:「咁我喺邊度等你

芊靈:「樓下啦

費事你唔識路

我:「好



跟住我就聽佢講,

喺佢屋企樓下等佢

送呀bi返屋企嗰陣,

佢條死仔成日行過嚟搵我

芊靈:「呀bi好似好鍾意你喎

成日行過嚟搵你

我:「狗仔係咁架啦



邊個同佢玩咪鍾意邊個

芊靈:「咁又係,

佢都係好鍾意michelle

成日撩佢玩

但係我有幾個朋友都係成日同佢玩

不過就唔係好黐佢地

我:「靚仔係咪好鍾意我同你散步呀

跟住呀bi又真係好搞笑咁樣望住我



同埋行過嚟嗲我

芊靈:「佢應該好鍾意喎

我:「咁好啦,

我勉為其難陪你地啦

芊靈:「講到咁真係辛苦你喎

咁辛苦唔使你嚟喇

我:「唔係呀我好鍾意陪你地呀



簡直係每一個禮拜嘅夢想

咁樣講好唔好

芊靈:「假到死

我:「搞錯呀成日講真心說話你都唔信

芊靈:「講埋啲咁嘅野我好難信喎

我:「心都噏埋

重話係朋友

就連最簡單嘅互信都做唔到

芊靈:「冇話所有野都唔信呀

只不過呢啲實在係太假,

我係唔會上當架哈哈

我:「算數

芊靈:「咁你喺度等啦

我好快就落返嚟

我:「嗯。」

果然佢好快落返嚟

芊靈:「食得

我:「你好肚餓咩

芊靈:「少少啦哈哈

我:「係咪真係好食

芊靈:「信我啦好食架

不過要食熱喎,

因為我未食過凍

所以唔知好唔好食

我:「咁你就搵啱人喇

話說我食豆腐花從來都係食熱嘅

芊靈:「夏天都係

我:「梗係啦

從來都唔會食凍嘅豆腐花

芊靈:「好難想像一個人喺三十幾度嘅環境之下,

都重係食緊熱嘅豆腐花

唔得呀好辛苦呀

我:「有次咪俾同學撞到囉

佢見到我食到面紅耳赤,

大汗疊細汗

第二日返到去就俾人唱

芊靈:「哈哈哈哈

唔得呀我想像到個畫面

好好笑呀

我:「乜真係好離譜咩

講堅真心話

芊靈:「如果係我嘅話,

我諗個反應會同唱你嗰個人一樣

你諗下三十幾度有條友食豆腐花食到成身汗

重要講到係面紅耳赤喎,

你諗下幾好笑

哈哈唔得,

淨係諗都好好笑

我:「你都傻傻地

明明咁有男人味

竟然冇人識欣賞

芊靈:「係喇好有男人味喇

就係呢度呀入去啦

我:「好

之後入到去我同佢就叫咗兩碗熱豆腐花

事關我就食得好甜嘅

又落糖水又落黃糖

芊靈淨係落糖水啫

我:「頂你又幾好食喎

芊靈:「冇講錯呢

我:「今次真係要讚你

重以為係伏

芊靈:「似你咁衰咩成日伏人

嘩你食得好甜喎

我:「甜先好食

芊靈:「咁你慢慢啦

係喎咁你依家重有冇同舊學校嘅人聯絡呀

我:「做乜無啦啦問呢啲

芊靈:「咁食緊野冇野傾丫嘛

乜都講下啦

我:「冇呀做咩呀

芊靈:「一個人都冇留戀咩

我:「其實所謂朋友都係hi-bye friend啫

點會咁易識到一啲真係朋友

芊靈:「咁又係

呢啲人一冇聯絡就好易散,

女仔都冇咩

我:「芊靈姐你真係潤我啫

毒撚點會有女

芊靈:「我點都唔會信你毒

唔好扮野快啲從實招來

我:「真係冇喎

其實我諗以前鍾意嗰啲都唔係真係鍾意

最多都叫做有好感啫

芊靈:「我以為你好似學校啲男仔咁添

成日都話好鍾意好鍾意邊個邊個

我:「我最鍾意梗係你啦

人靚聲甜性格又好

芊靈:「好假囉

擺明有囉係你唔講咋嘛

我:「我咪講咗俾你聽囉

話咗嗰個女仔係叫做x芊靈

你又唔信

芊靈:「唔信呀

成日講埋呢啲野煩到死

都話佢唔信架啦

其實我係講真,

無論幾時問我,

我都係咁講

至少喺呢十幾年入面。