[真人真事][校園][純愛]《兩個我加一個妳》: 第二十八章

跟住我同佢就去咗七仔買雪芳蛋糕

講到底我點會想咁寒酸

不過你知一個蛋糕幾貴架啦

呢個都唔係重點，

最緊要係嗰陣冇一個地方可以俾我地兩個坐喺度慢慢食



同埋嗰陣我同佢都唔係話好肚餓

兩條友點樣食一個蛋糕呀

亦都好好彩芊靈冇拆我台

原本重驚佢唔鍾意

你知啲女仔架啦



乜都鍾意華麗名牌貴野，

慶幸佢唔係咁樣

我:「蠟燭就冇喇

俾面我食咗佢啦 」

芊靈:「有免費野食點會唔食呀哈哈 」



我:「幾驚你唔鍾意呀

你知啦你啲女仔最鍾意就係貴同埋靚 」

芊靈:「我唔係咁囉

又想喺度醜化我 」

我:「好彩你唔係咁咋

如果唔係我真係柒到飛起 」

芊靈:「講真嘅我真係估唔到你記得 」

我:「你真係太睇小我嘅記性 」



芊靈:「係喇係喇

今次你最叻仔喇 」

日後我先發現，

原來唔止佢睇少咗我記性，

自己一樣自視過低

我:「芊靈姐我要索取香吻一個 」

芊靈:「痴線無啦啦做咩要咁樣 」



我:「我咁好心幫你慶祝生日

你唔係唔做丫嘛

講明先錫面可以 」

芊靈:「你條友真係諗大咗

喺度講埋啲唔知咩野

又話幫我慶祝生日，

原來係想拎獎勵

咁鍾意獎勵就俾你 」



跟住佢又扭我耳仔

我:「喂，

痛呀痛呀 」

芊靈:「又係你話要獎勵嘅

咪俾咗你囉又唔鍾意 」

我:「呢啲係咩獎勵呀 」

芊靈:「我成日都係咁樣摸呀bi



佢次次都好享受喎 」

我:「係佢唔係我囉 」

芊靈:「我重以為你地一樣添 」

我:「不如試下我扭你丫

睇你享唔享受 」

芊靈:「喺度恰女人

識錯你呀 」

我:「又係你話呢啲係獎勵嘅 」

芊靈:「我做就係啫，

你估你唔係想報仇咩 」

我:「我又點會係咁呀

謙謙君子點會同一個女仔計 」

芊靈:「um

謙謙君子 」

我:「做咩咁嘅反應呀

你覺得唔係咩 」

芊靈:「唔係呀

我覺得係喎

唔使咁敏感 」

我:「講咗唔係自己讚自己 」

芊靈:「係喇係喇

不過有句野真心同你講嘅 」

我:「咩呀 」

芊靈:「多謝你呀 」

我:「屌我以為講咩添

都係一個咁嘅蛋糕仔啫

多咩謝丫 」

芊靈:「送禮物有時唔係淨係睇嗰樣野嘅

估唔到你會記得

更加估唔到你會幫我買個蛋糕 」

我:「濕濕碎啦

要講多謝就下年啦

到時真係買個生日蛋糕俾你

你等住食啦，

如果有下年的話 」

芊靈:「咩叫做如果有下年 」

我:「做人咁多變數，

點可以一口講定呢

萬一到時我走數，

都起碼有藉口嘛 」

芊靈:「嚇死我重以為你唔知講咩添

咁我等住食架喇 」

我:「慢慢等啦重有成年呀哈哈 」

芊靈:「又係喎 」

到佢正日生日嗰日，

嗰日我地要返學嘅

不過喺學校就撞唔到

我又費事咁揚特登走去佢班房嗰度

所以都係sms同佢講生日就算

諗嚟諗去都唔知幾點講好，

跟住我就好無聊咁樣諗到應該邊個時間講

15:02分

純粹係將佢生日嗰日期變做時間分鐘

我:「生日快樂 」

點知佢竟然好快覆，

芊靈:「上堂玩電話

曳曳呀你 」

我:「你一定係冇玩啦 」

芊靈:「梗係冇啦我呢啲乖學生 」

我:「明明你就秒覆

扮野 」

芊靈:「睇下邊個講先囉好冇 」

我:「依家啲人真係好串

同你講生日快樂多謝都冇句

重要唔認上堂玩電話 」

芊靈:「多謝多謝多謝

係咪開心返呢 」

我:「嘩真係好開心呀 」

芊靈:「唔使睇你個樣都知你假到死 」

我:「明明我就咁真誠 」

芊靈:「唔講咁多住喇，

驚俾人收電話 」

我:「我都係呀哈哈 」

就係咁，

呢啲就係我第一次同佢過生日

嗰陣我好希望有一年可以同佢過正日生日

明明就唔知有啲乜野咁值得期待

不過都係嗰句，

自己知自己事，

佢正日生日點會留俾我

所以我都係自己ff啫。