[真人真事][校園][純愛]《兩個我加一個妳》: 第三十二章

芊靈:「你肚餓未

使唔使依家去食野 」

我:「你話事啦我冇所謂 」

今次真係唔係特登就佢

而係幾點食野對我嚟講真係冇乜分別



咁多年都係咁樣

芊靈:「咁呀

好似上次咁樣，

帶完呀bi散步先食好唔好 」

我:「實好架 」



芊靈:「咩意思呀你

又係你話冇所謂嘅 」

我:「做咩啫

都冇話唔好

你太敏感喇 」



跟住就照例啦，

都係我喺樓下等佢

因為佢要上去屋企接呀bi，

冇幾耐佢就落咗嚟

佢冇換衫，

著返校服咁樣落嚟

我:「做咩唔換衫呀 」

芊靈:「接完佢拿拿臨就落嚟啦 」



我:「原來你想同我著情侶裝 」

芊靈:「有冇人話過你好厚面皮 」

我:「唔厚面皮就唔會企你隔離啦 」

芊靈:「咩意思呀 」

我:「根本你就係天使

正常稍為有啲自知之明嘅，

都唔敢喺你隔離啦啱唔啱先



我地呢啲凡夫俗子點可以拍住你行 」

芊靈:「誇張到死

冇句真呀 」

呀bi個死仔一見到我就想撲埋嚟

搞到芊靈都拉得幾辛苦

芊靈:「佢真係好鍾意你喎 」

我:「冇計啦靚仔丫嘛 」

芊靈:「好彩未食野啫



如果唔係真係嘔 」

我:「你自己問呀bi我靚唔靚仔喇 」

跟住呀bi就好似平時咁樣

戇居居咁樣望住我

我:「你睇下

佢都話我靚仔 」

芊靈:「邊有講野呀佢



唔好喺度醜化呀bi嘅taste 」

我:「證明你呢個主人完全唔盡責

連呀bi嘅眼神你都解讀唔到 」

跟住佢又喺度扭我耳仔

我:「做咩呀 」

芊靈:「壹仔呀壹仔

唔好成日幻想啦

對自己唔好呀 」

我地三個都踎咗喺度

佢一隻手就扭我耳仔，

另一隻手就摸住呀bi隻耳仔，

好明顯扭我嗰隻手用力好多

我:「喂大佬唔公平呀

有咩理由摸佢就咁細力

扭我就咁大力 」

芊靈:「鬼叫你發緊夢咩

咁咪大力少少令你重返現實 」

我:「痴線你唔信就話我發夢 」

芊靈:「哈哈唔玩住喇

帶佢散咗步先啦 」



跟住就好似之前咁樣，

兩日一狗咁樣散步

其實一路行嗰陣我就一路諗，

依家我雖然同佢算熟，

但係我對佢嘅了解，

其實唔算好多

淨係知道佢有隻狗，

住邊度，

但係佢平時鍾意啲咩就完全唔知

我諗各位巴打都會有共鳴，

就係對住某個人嘅時候，

求知慾就會變得特別旺盛

好想去了解佢，接觸佢，

任何野只要係關於佢，

都好想去知道

依家我對住芊靈，

正正係呢一個情況

我:「係喎話說你鍾意食咩架 」

芊靈:「話題轉得咁快嘅 」

我:「你知芊靈姐姐你幾吸引

我好想窺探你嘅內心世界 」

芊靈:「變態佬

肯定又唔知諗埋啲咩 」

我:「講真嘅

一齊行嗰陣係講呢啲架啦 」

芊靈:「你講幾時食咩先 」

我:「下

乜有分幾時嘅咩 」

芊靈:「梗係啦

早餐我就鍾意食雪菜肉絲米

因為我樓下嗰間餐廳整得真係好好食

晏晝我就冇所謂嘅

有時得閒嗰陣會自己整三文治

夜晚媽咪煮咩我就食咩

但如果你話鍾食邊個國家啲野，

咁我都係答你日本

早幾年試過去日本食魚生

真係好正 」

跟住我就梗係喺度自己記低啦

我:「喺日本野食你都啱 」

芊靈:「係呀 」

我:「黃金你啱唔啱 」

芊靈:「咩係黃金 」

我:「你冇聽過黃金傳說咩 」

芊靈:「唔知喎

快啲講啦 」

我:「你今晚自己查啦

都係日本野嚟 」

芊靈:「古古怪怪咁樣

肯定唔係好野啦 」

我:「查咗先啦

咁樣平時喺屋企做咩 」

芊靈:「女仔嚟嚟去去都係嗰幾樣

煲劇，shopping

我就多一樣，

就係帶呀bi散步

有時michelle同佢男朋友會約我打羽毛球

另外每日會抽一個鐘溫書 」

我:「三條友打乜撚野羽毛球 」

芊靈:「多數係我同michelle打哈哈

呀宏，

即係michelle男朋友，

其實都係陪michelle多啲 」

我:「你就唔得啦做電燈膽 」

芊靈:「係呀所以有時我都冇去

比佢地二人世界 」

我:「我重以為佢地屌柒你添 」

芊靈:「似你咩咁爛口 」

我:「咁先顯得我對住你真誠丫嘛

係咪咁講先 」

芊靈:「唔好咁樣望住我

你個樣太狡猾

你想唔想嚟打丫

反正我地都差一個 」

我:「你地會唔會嫌我渣

利申完全唔識打羽毛球 」

芊靈:「其實大家都係海軍鬥水兵

我都差一個人同我一齊雙打 」

我:「簡直係天作之合

就連命運都想我同你一齊雙打 」

芊靈:「又喺度亂咁噏 」