[真人真事][校園][純愛]《兩個我加一個妳》: 第三十五章

其實嗰陣我以為佢都係講下笑

可能一時之間講出口啫

所以我都冇放喺心上面

係直至到第二日放學，

當我諗住出班房門口嗰陣，



就見到芊靈企咗喺度

我:「鬼鬼崇崇喺度做乜 」

芊靈:「你就鬼鬼崇崇

放學呀 」

我:「原來你係講真架 」



芊靈:「梗係啦你以為我講笑呀 」

呢個時候喺我隔離嘅Cyrus插嘴

Cyrus:「唔阻你喇老友

慢慢啦拜拜

小心啲喎 」



我:「夜晚打機搵你啦 」

佢嗰陣個樣真係好衰，

典型花生友嘅醜態

芊靈:「帶齊啲野未

手冊功課筆袋銀包水樽 」

我:「帶齊喇 」

芊靈:「書包呢 」

跟住我就指住我背脊



我:「頂你呢個咩嚟架 」

芊靈:「都係以防萬一啫嘻嘻 」

我:「咁走啦 」

出到去門口，

芊靈:「係喎你好似下個禮拜生日 」

我:「話咗你掛住我啦

咁你都記得 」



芊靈:「師兄你啲幻想力太好

咁我冇理由淨係偏心呀bi，

唔理埋另一隻狗仔架嘛 」

我:「如果我係狗仔我要拖手喎 」

芊靈:「狗仔隻手冇咁長呵呵 」

我:「幾招積喎

唔好俾我拖到你 」

芊靈:「你就想 」



跟住我地喺度追逐

當然唔係真係跑啦，

都係快步啫

始終驚撞到人

好死唔死俾同學見到

依家我都唔記得係邊q個，

求其作個名算數啦



同學a:「估唔到你兩個發展得咁快喎 」

我:「你想發展我都可以同你發展架 」

同學a:「唔阻住你兩個喇

拜拜 」

同學b:「壹仔唔聲唔聲原來睇上咗芊靈 」

我:「你兩個都一齊喎

重喺度話人，

屌 」

同學b:「冇事發生過

拜拜 」

嗰兩條蛋散走咗之後我地就上巴士啦，

原本我以為佢會好尷尬

可能嗰陣我對女仔認識唔係好多(其實依家都係)

直覺女仔聽到頭先嗰啲話題應該會面紅呀，口窒窒咁樣，

但係佢又好似冇

我:「你好似冇野咁嘅 」

芊靈:「點解要有野 」

我:「唔係好多女仔都唔鍾意傳緋聞嘅咩 」

芊靈:「我覺得有啲野我地知咪得囉

使乜理其他人點睇 」

我:「你唔止重有天使嘅外貌

重充滿睿智 」

芊靈:「講真喎，

如果因為其他人嘅睇法令到我地關係變差

你唔覺得好唔值得嘅咩 」

我:「你放心

我同你只會愈嚟愈升溫

唔會變差 」

芊靈:「認真野呀死人頭 」

我:「咁又唔係喎

以前小學坐我隔離嗰個同我幾啱傾，

你知架啦，

小學雞一見到人啱傾就話人地有路

所以嗰陣我同嗰個女同學就傳出緋聞

跟住佢怕尷尬就好少搵我傾計喇 」

芊靈:「小學同中學我諗唔同嘅 」

我:「重要嗰個係豬西

傳緋聞嗰班人個腦應該要拉去驗 」

芊靈:「唔好咁話人啦 」

我:「唔係呀同你傳我唔拘呀

簡直係我福氣 」

芊靈:「你點樣講我都唔會信你

死咗條心啦哈哈 」

我:「天使面孔，菩薩心腸

外在內在兼備

不過咁，

唔係魔鬼身材囉哈哈哈 」

芊靈:「死人頭又想講咩呀 」

我:「我好誠實咁樣讚你

唔開心咩 」

芊靈:「唔開心喎

有啲咩咁值得開心 」

我:「扮晒野你真係唔誠實 」

芊靈:「你先唔誠實呀 」

我:「知唔知世界上得一種動物係唔會同人講自己開心，

但係明明自己就爽緊 」

芊靈:「係咩呀 」

我:「麥兜 」

芊靈:「死啦你話我係豬

原來頭先係想講說話俾我聽嘅，

死人頭死人頭死人頭 」

我:「玩下啫 」

芊靈:「唔睬你呀 」

我:「真係唔睬 」

芊靈:「唔睬呀 」

我:「玩唔玩iq題 」

芊靈:「你有咩 」

我:「問得你我梗係有，

同你講定係我自己諗唔使上網搵 」

芊靈:「請出招 」

我:「兩個我加一個你，

估一個數字。」