跟住第二日朝早

成班足球隊就約埋喺m記食早餐

對手係咩級數我就唔知

聽佢地講都係一般

唔係特別勁但又唔係特別水皮



當然啦我就好簡單嘅啫

落到去就係想贏

必要時真係乜野邋遢手段都會用埋

可能你地諗一場波啫,

使唔使咁搏命



咁當然啦我唔會話自己搏命

因為有啲波自己都會縮

例如嗰啲頭鎚呢,

見到成隻腳飛埋嚟一定縮

好明顯我未去到呢種命都唔要心態啦



只係話可能會為咗贏波而出邋遢招咁解啫

食完一輪就入更衣室啦

跟住全部人一齊換波衫,

之前買波衫嗰陣我就揀咗16號

其實原因好低能

只係因為芊靈係3月2號生日,

我就係6月5號生日,

咁將所有數字加埋就係16



當然啦我冇同任何人講

費事啲人當我痴撚線

同埋亦都唔知點開口

男仔問我點解揀16號,

我都係求其鳩噏就算數

咁樣成件事就會完

換完衫出嚟嗰陣



就見到芊靈佢地幾個已經坐咗喺第一排

跟住我同呀宏就會行過去

好明顯呀宏行過去係搵Michelle

我就係搵芊靈啦

行到過去,

Michelle:「我地去第二邊傾啦

費事阻住人地

呀宏:「係囉



芊靈:「依家邊個阻邊個呀

我:「咪係囉

調轉講都有嘅咩

Michelle:「我地識做嘅

跟住佢兩個就行開咗

得返我同芊靈

芊靈:「加油呀16號仔



我:「咁你都見到

芊靈:「你一入嚟嗰陣呀

就喺度唱歌

我嗰陣淨係望到你背脊個number

就已經知係你啦

我:「我諗住落到場都唱喎

芊靈:「痴線會唔會被罰離場架

醒張紅牌益你

我:「你都傻嘅

落到場梗係喺度擾敵

同埋我又冇身體接觸,

冇事嘅

芊靈:「睇你咪又係得個講

我:「其實你都好撚醒

芊靈:「一早就知啦

我:「真係有嚟

以為你唔知醒得個講字

芊靈:「你踢波點會唔嚟呀

加油呀唔好輸呀

我:「痴線

學校要我落場就係因為唔想輸

邊有得輸

傻嘅

芊靈:「喂不如我地give me five

我:「點解無啦啦要咁做

芊靈:「我見好多人都會咁做丫嘛

同埋順便可以過啲運俾你

我:「係咁易就好

拍下手就得

芊靈:「拍啦拍啦

我今日真係有運唔係講笑

我:「咩運

芊靈:「頭先我開一條二寶

知唔知入面好多都係橙色

得一粒係黃色

你知啦我鍾意食橙色架嘛

咁樣重唔係有運

我:「頂你有二寶唔分享

芊靈:「有帶嚟呀

贏咗請你食一粒

我:「孤寒到

得一粒

芊靈:「呢啲係要食少少先好食

你識乜野

快啲拍啦

我:「好啦好啦

跟住我同佢就喺度拍手

拍完之後就返去集合。

踢波嘅場面我就唔點樣詳細講

講真嘅,

唔好話依家隔咗咁多年,

就當你即日問返我記唔記得嗰場波係點樣

我最多都係記到少少

真係一啲好特別嘅野先記得

其他我就真係冇晒印象

係咁咦講啲我記得嘅野啦

話說嗰陣就係我地開紀錄先嘅

大家玩過學界都知

其實運氣主宰一切,

啲波喺個場入面彈嚟彈去

我地開紀錄嗰球就係咁

唔知邊度將個波彈咗俾喺左路漑我

跟住我一個扭兩個,

然之後橫傳俾門前嘅呀宏

唔係講笑我都覺得自己幾撚勁

一個扭兩個嗰下真係型到

不過下半場呢就俾人追返

點樣失就唔講啦

反正都唔係光彩野

正當全部人都以為大家各拎一分嗰陣,

事情就出現咗意想不到嘅局面

話說嗰陣有個角球

佢地攻我地守,

好好彩嘅係我地成功守到

跟住某個隊友就一腳踢去前面,

亦即係交咗俾留喺前場等打反擊嘅我

嗰陣其他隊友全部去晒守角球

前面得我一個

咁我梗係拎住個波

係咁向前衝啦

少不免插下花呀,扭兩下咁

冇計啦嗰陣恃住自己扭得幾下

落到場就係咁扭

喺度預告先

所謂嘅意想不到局面其實正正係關於小弟

不過當然啦唔好諗住好似睇電視咁樣

一個扭幾個跟住入波

我冇咁犀利

更加唔係主角

亦都唔會好似卡通咁無啦啦射世界波

我呢啲蛋散邊會咁有主角命

至於我嗰陣做咗啲乜

咁就下回分解。