[真人真事][校園][純愛]《兩個我加一個妳》: 第一百零五章

我重好記得嗰日係12月頭嘅事

邊一日都記得不過唔講出嚟啦

因為費事講咁多日子出嚟令到大家混亂，

到時唔知邊日打邊日

所有野都好正常，



係直至去到食完飯之後

大家返咗各自嘅班房，

就嚟打鐘之前嗰兩個字

芊靈行咗過嚟我班房叫我出去

我:「話咗你掛住我啦



啱啱先食完飯而家又過嚟搵我 」

其實我都慣咗咁樣講野

況且其他人都知我同佢成日一齊

已經覺得冇乜特別

中學嗰陣係咁架啦，



所謂緋聞都係傳一陣就傳第二對

芊靈:「你出嚟先啦，

有野想同你講呀。」

嗰陣覺得佢好似真係有重要野講

因為語氣好少咁凝重

平時都係講埋嗰啲

「好煩呀邊有人掛住你」呢啲死人野

不過頭先唔係



跟住我就梗係認真返啲啦

拿拿臨就行咗出去班房門口

重特登揀咗比較少人嘅樓層

佢話方便傾喎

去到之後，

我:「做乜咁認真

去少人地方又唔想去返我地嗰層



屌講真喎發生咩事 」

芊靈:「其實呢想同你講好耐

一直都喺度拖，

拖拖拖拖拖拖咗成個幾個月，

頭先食飯都想講

結果又係講唔出口

不過我覺得點都要講，

所以



就依家特登行過嚟搵你同你講。」

嗰陣我心諗

佢條友咁緊張重唔係想同我表白

屌今次真係有機會

做咗咁耐人從來未試過俾女仔主動表白，

今次終於零的突破

你仆街喇



我:「講咩呀快啲講丫 」

當然我都知咁樣會好尷尬啦

所以特登扮戇鳩仔乜都估唔到算

費事佢咁難堪

芊靈:「你聽住，

以下我所講嘅野真係好認真好認真好認真 」

我:「你次次連續講三次同一樣野嗰陣，

都係好認真架啦屌

第一日識你咩

快啲講啦 」

芊靈佢又喺度似笑非笑

芊靈:「原來你知呀 」

我:「咁都唔知我砍頭埋牆算啦

唔係當我真係戇鳩仔呀嘛 」

芊靈:「咁我講架喇。」

我:「洗耳恭聽 」

芊靈:「兩個禮拜之後，

即係今個月19號，

係我嘅last day 」

我:「我梗係知啦

返埋嗰日放聖誕假丫嘛

你真係太天真

諗住講啲咁樣嘅濕鳩大話我就會信 」

芊靈:「唔係呀，

我係講退學

會去外國。」

晴天霹靂

我諗呢一世人都唔會成日有機會經歷返同樣嘅感覺

又唔可以話唔開心，

因為唔開心嘅時候你識去點樣發洩，

呢次就唔係呢一種感覺

總之就係個心冤住冤住咁樣

失望唔緊要呀反正我唔係第一次失望，

只不過今次呢所謂嘅意外真係有啲偏差

偏差到我自己都唔(願)相信。

我:「下

你講咩呀 」

芊靈:「知唔知今年9月發生咩事 」

我:「做咩呀 」

芊靈:「有冇聽過金融海嘯 」

我:「有呀

咁同你走有咩關係 」

芊靈:「我都唔清楚有咩關係

因為daddy媽咪每次講嗰陣，

我都係唔願聽唔想聽

簡單講就係金融海嘯波及到我地，

公司會執笠

佢建議我地一家三口飛過去我姑姐嗰度投靠佢，

姑姐都同意咁樣做係最好，

而過到去之後，

我會喺嗰邊讀書，

詳細真係唔清楚

因為我冇留意佢地講嘅野，

每次一聽到呢個話題我就唔想知

我接受唔到我要離開香港 」

嗰陣嘅我其實唔知乜野係金融海嘯

亦都唔知咩係雷曼

唔好話就算係依家我都真係唔係好清楚，

我呢啲戇鳩仔費事買股票啦屌

冇咁嘅本錢，智慧去玩，

我又唔夠膽信財經台嘅巴打

我:「可唔可以同我講

你依家係咪講緊笑

係咪想報復我成日鳩吹

所以咁樣玩我 」

芊靈:「我都好希望係講緊笑

其實我好早已經知道呢個事實，

不過有時真係唔知點樣講

對住Michelle我好容易就可以講出口，

對住其他兩個姊妹都係，

唔知點解就係對住你嘅時候，

每一次我下定決心擺到喺嘴唇邊，

但係一見到你，

我就冇咗應該有嘅勇氣

不過我知唔可以再拖落去，

點都一定要講 」

我:「即係咩意思 」

芊靈:「你想唔想我走

答我，

想，

定係唔想。」

我:「下

你想我點樣答 」

芊靈:「根據你嘅意願嚟答

想定係唔想就係咁簡單 」

我:「乜我答案有用咩

有效力咩 」

芊靈:「唔使理有冇效力，

我淨係想知你點樣答。」

喺嗰陣，

我覺得個氣氛真係太差太凝重

我好唔鍾意咁樣

所以嗰陣我做咗一個戇鳩仔，

就係諗住等件事輕鬆啲

我:「唔係呀去外國幾好呀

又可以識鬼仔 」

芊靈:「我好認真同你講

我希望你都係好認真咁樣答我 」

跟住我當然轉一轉語氣

我:「講真嘅，

我唔知你屋企有咩問題啦

但係我諗你老豆你老母應該清楚過我掛

既然佢地話走……

咁

咪走囉……」

每一次就係咁樣，

我呢啲死人性格由細到大都改唔到，

總係好怕令人窒息嘅氣氛，

一遇到咁樣就周身唔聚財

所以自己一定要扮到好輕鬆咁樣，

從而令自己舒服啲，

同埋，

喺嗰陣我覺得，

如果佢真係咁重視我意見的話，

我覺得我應該係成全

而唔係挽留

點解

因為嗰陣佢係「通知」我佢要走，

亦即是話已成定局

只係行過嚟同我講咁解啫，

既然我唔可以改變呢個事實的話，

咁我再喺度挽留嘅話只會令到件事更加拖泥帶水

我點樣講，

都講唔服佢唔會走

既然係咁就不如順水推舟

嗰陣我係咁樣諗

芊靈:「你捨得咩？」

我:「捨得啲咩 」

芊靈佢大力吸一吸氣，

芊靈:「你捨得……我咩 」

我嗰陣係咁同自己講

我一定要望實佢隻眼，

同埋要扮到不經意

我唔認為大家喊苦喊忽可以改變到件事，

既然係咁就不如灑脫啲

即使係扮都好

我:「冇話捨唔捨得嘅，

依家科技咁發達呀成日有得傾計啦

你返嚟又可以搵我，

又唔係真係一世都唔返嚟

我捨唔捨得同你要走……

唔係好關事 」

芊靈:「ok，

我……明白喇，

嗯 」

跟住佢就走咗，

嗰陣我重係懵然不知

企定定咁樣望住佢，

喺個我視線入面變得愈嚟愈渺小，

最後消失埋，

從嗰日起，

我同佢就愈走愈遠