就算我再冇記性

我都記得佢講過會喺學校放聖誕假之前嗰日正式退學,

嗰日係佢喺呢間學校嘅最後一日

以後都唔會返嚟

喺嗰個禮拜入面



我喺度諗,

雖然唔想同佢糾纏啫

佢話就話避開緊我

不過如果臨走前同佢講一兩句我諗應該ok掛

當然啦返到學校都係得個講字



因為真係唔知講咩好

我又唔想行過去淨係講一句一路順風喎

不過咁,

去到最後我都係下定決心要行過去搵佢

即使係一句毫無意義嘅祝頌語都好



唔理咁多喇講就講啦,

因為真係最後一日

今日都唔見嘅話有排都唔使見

悲觀啲睇都唔知會唔會再見返添

所以我就諗住,

一陣放學聖誕聯歡會嗰陣就行過去同佢講

諗住嗰陣少人啲(因為好多都掛住玩)

同埋根據慣例全部人都會留低喺學校



即是話芊靈唔會好似之前咁樣一放學就走咗去啦

當然啦我呢條撚樣成日都計錯數

唔知點解真係冇次計得啱

點解咁講呢

話說我地lunch出咗去食飯

因為今日聖誕聯歡會樓下有人book咗場

同埋我地老師又放遲咗



學校冇位就不如出去啦

咁樣冇問題丫

好正常啦係咪先

返到嚟嗰陣重坐咗喺班房喺度睇人捉鬥獸棋

突然之間聽到有條友嗌我

我擰轉頭望原來係呀宏

佢好緊張咁樣叫我出去

我心諗咩事呢咁樣



咁自然就跟咗佢出去啦,

一出到去,

呀宏:「你去咗邊呀搵咗你咁耐

我:「出去食飯囉做咩呀

呀宏:「芊靈頭先退學呀你知唔知呀

係喎原來佢冇公開

好多人都應該未知



我自己估Michelle一定知啦咁friend

原來Michelle都收得幾密

連自己男朋友都冇講

不過依家唔係講呢啲野住

我:「佢依家呢

呀宏:「唔知佢呀你又咁遲返

平時見你喺學校食點解今日唔見你

我:「今日咁撚多人

樓下又搞聖誕嗰啲野

唔好講住咁佢喺邊度

呀宏:「我淨係知頭先Michelle同佢落咗去校務處

成半個鐘之前

我:「好

聽完之後梗係跑落去地下啦

由未識佢去到依家臨別,

都係離不開同佢玩捉迷藏

求神拜佛今次真係唔好再錯過

好記得嗰陣我重誇張過就嚟遲到嘅時候

落場追波都冇咁肉緊,

缺點唔怕記多一個

俾人入咗咪下一球囉

不過今次係最後一日

佢最後一次著住呢套校服而出現喺呢間學校,

唔會再有續集又或者係下一次

所以真係跑落去地下,

明知就嚟打鐘要上堂

都冇理到

留堂就留堂啦

所有野都要分輕重

不過唔知係咪真係我唔好彩,

定還是真係冇緣

我落到校務處,

係見佢唔到

唔好話佢,

就連佢好姊妹Michelle我都見唔到

跟住當然係發晒狂咁樣搵啦

特別喺地下嗰層,

乜野小食店呀操場呀我都有去

甚至乎我同佢以前喺嗰度食飯嘅園林休憩處都去埋

都係搵唔到

我估你地會諗,

唔係嘅肯定係好似電視咁啦

心灰意冷嗰陣,

無啦啦芊靈會喺唔知邊度行返出嚟

大家對望重要攬住

深情對話

滿口山盟海誓嘅承諾

係咁樣諗嘅話,

好明顯就真係睇得電視太多

現實點會咁好彩呢

我可以講係冇以上嘅情節出現嘅

跟住上堂嘅鐘聲已經響起咗,

好記得嗰陣我迫自己快啲諗,

搏唔搏多一鋪

唔好返上去住

試下搵晒每一層

除咗第二層因為係教員室

明知山有虎重偏向虎山行

唔好意思我真係冇咁大膽

亦都有晒藉口,

一陣課堂入面嗰個老師問我頭先喺邊度嗰陣,

應該要點樣答

如果真係要罰咁冇計啦

都要架喇

嗰陣繼續周圍喺度跑

睇下見唔見到芊靈,

一路跑一路望,

個口重要一路噏住未走未走

從來都未試過咁貪心,

希望真係有夢想成真

不過嗰陣可能真係冇乜理性

即使係冇科學根據嘅野都好想佢會出現,

搵下一層搵下又一層,

真係搵唔到

可以講time's up

跟住都見到已經過咗三個字,

既然搵唔到,

唉咁樣就算數啦

返去班房啦咁唔係點啫

正當我行緊樓梯落返去自己班嗰陣時,

我地條樓梯係可以望出去街外面嘅環境

就見到一個好熟悉嘅藍色書包

一個近幾年幾乎每日都可以見到嘅書包,

不過最近過嚟禮拜同佢冇乜聯絡,

突然間又出現返喺我眼前

我好想大聲叫,

不過距離真係有啲遠,

同埋點講都好都係喺學校,

依家重要係上堂時間

我可以做嘅,

就只係一路望住佢離開自己視線

見到佢依家身處嘅呢個位

應該係啱啱先出去學校門口,

即是話頭先我搵緊嗰陣,

佢應該重喺學校

有時唔係話你想點就如你所願

邊個話付出就一定有收穫,

細個好多人咁同我講,

我嗰陣真係唔明

今次可以第一身體驗

咁先至刻骨銘心,

永遠都記得嗰日係2008年12月19日。