哈哈有時真係好諷刺

大家唔好睇劇睇上腦

唔係每一個男仔都會衝去機場送自己鍾意嘅女仔機,

跟住喺個女仔入閘最後一刻趕到

深情對望,



用擁抱甚至係一個吻代替說話

我呢條戇鳩仔就係一個反例

可能真係冥冥中有主宰,

如果唔係今日喺學校撞板多過食飯,

我諗我未必會咁鬱躁



未必會咁鬱躁我就未必落去射籠,

唔落去射籠

或者未必錯過佢呢個訊息

可能頭先已經喺機場講晒我想講嘅野

甚至有可能承諾好多野等等等等,



依家所謂嘅心聲真係已經變咗歷史

好記得嗰陣心情好奇怪

因為冇諗過咁快會走,

嗰陣點樣蠢點樣鈍都會明佢對我係點啦

都寫晒出嚟

問心嘅,

對比起拍唔拍拖,

其實我覺得後悔佢臨走之前嗰陣



講真拍唔拍拖又如何,

起碼我同佢中間發生嘅事唔係假

對佢嚟講我就唔知,

不過如果你問我,

嗰啲係實實在在,有血有淚嘅回憶,

縱使唔圓滿都好

起碼可以確實係有發生過



反而去到最後一次都冇行過去搵佢,

成日都驚呢樣驚嗰樣,

結果一日推一日

周而復始,

邊個叫最後先至醒覺

根本從頭到尾就大把時間

只係自己唔識去珍惜

冇去爭取,



我依家咁樣講得,

即係代表由始至終我都冇怪過天

亦都冇怪過所謂嘅際遇,

唔係金融風暴令到我今時今日落得咁嘅下場

根本就係自己處理手法有問題

就係因為咁,

我連嚎啕大哭嘅資格都冇,



又或者調返轉講,

可能真係冇緣分啦

其實我好憎咁樣去解釋

因為我覺得緣分係好虛無飄渺,

自己亦都搵唔到當中有咩科學根據

我唔係話冇呀我只係話自己唔識咋

不過喺呢件事上面,

我搵唔到第二個更加貼切嘅解釋

依家可以肯定嘅,

就係從來都唔係唔好彩,

只不過係冇緣

跟住醒起芊靈嗰段msn留言,

入面有提到張生日咭,

重話咩五點鐘

幾經辛苦終於搵到出嚟,

搵到之後係咁喺度睇,

起碼睇咗五次,

都見唔到五點鐘呢三個字

究竟佢講乜呀

我真係唔明,

原來一直蠢鈍愚昧嘅,

始終都係我。

太陽都係照常升起

日子都總係要過,

芊靈走咗之後,

其實我生活模式都冇乜點變

咪又係毒撚一條

喺搭巴士嗰陣隔離冇人囉

食飯嘅時候唔會再有女仔喺隔離

有時上堂發緊夢嗰陣,

會諗起以前啲野咁囉

有冇唔習慣

冇就呃你啦持續咗幾年

當然Cyrus都知呢件事係點

佢冇講啲乜,

不過feel到佢驚我唔開心,

盡量少提芊靈呢個人

嗰陣喺學校,

其實好想行過去問Michelle

究竟芊靈佢依家點

不過再細心諗,

如果我真係咁樣做嘅話,

Michelle之後九成九都會同佢講返啦

而佢喺封信都講埋點解佢之前要避開我,

依家真係避到去一個我見唔到嘅地方,

無謂再特登打探佢嘅消息

都係嗰句,

當時我嘅心態係成全,

佢講咗咁多野我當然會識做,

事實上依家我唔可能好似以前咁樣,

成日為佢做野

咁難得仍然有任務喺身,

我應該好似以前咁樣,

遵從佢意思去做亦唔係根據自己意願

所以嗰陣我從來都冇問過Michelle,

芊靈佢嘅近況係點,

當然啦有時夜闌人靜,

特別係用緊電腦嘅時候,

當然會偷望佢facebook同埋msn啦

佢都係冇再上線,

唔知係封鎖咗我定係用咗新ac啦

總之當時情況就係咁,

佢要搵我嘅話自己會搵我架啦

其實我真係我好想問佢,

即使係最簡單最低能嘅一句,

「近況如何?」

我都好想對住佢講

就算佢覆我「好。」

就咁一個字我都真係心滿意足,

唔會再強求

不過最後都係冇做,

我唯有自我安慰,

說服自己咁樣係大家嘅默契

唔應該去破壞

最好嘅做法,

就係唔再打擾大家。

而既然分開了 問好亦不必要