[真人真事][校園][純愛]《兩個我加一個妳》: 後記
大家好，
我就係故事入面嘅男主角，
亦即係你地成日屌嘅壹仔，
首先我要好多謝咁多位先，
竟然會對一位陌生人嘅故事咁有興趣，
睇得咁投入，
事前我係完全冇諗過嘅，
當然亦都要多謝樓主啦，
日日都有出文，
我係佢都未必做到日日出，
對佢嘅感覺我唔講咁多啦，
睇開故應該都知，
講真嘅，
我同佢以前嗰段關係，
與其話好似情人曖昧咁樣，
倒不如話係一對母子，
我玩啲無聊野，
做錯某啲事情，
甚至行路仆街嗰類大頭蝦野，
佢永遠都係扮演一個慈母嘅角色，
有一件事我叫樓主唔好打出嚟，
其實係好無聊嘅野，
分分鐘佢都唔記得，
係得一個戇鳩仔記咗咁耐，
就係有一次放學，
成班喺度打排球，
唔係打比賽只係玩嗰種，
突然之間踢波嗰邊啲人將個波踢咗過嚟排球場，
咁我梗係諗住懶醒一腳踢返過去啦，
好死唔死我助跑嗰陣左腳kick右腳，
跟住梗係成個仆街，
唔係講笑跌落去嗰下好撚痛，
你知啦嗰陣係為咗要型，
打死都話冇事，
不過就坐咗喺隔離嗰邊抖緊，
正當我坐喺度冥想嗰陣，
佢就無啦啦坐咗喺隔離，
我以為佢梗係笑鳩我啦，
又或者鬧我做乜咁論盡，
點知原來唔係，
問我有冇事痛唔痛頭先嚇親佢，
跟住唔知喺邊度拎張膠布出嚟，
重講笑話以後每次我上pe堂嗰陣都要帶膠布，
因為佢知我邊日上pe堂，
事隔幾個月有一次我又整到，
跟住佢真係可以即刻拎返膠布出嚟，
重同我講知道今日我上pe堂先特登帶返學，
果然有用，
當然啦嗰陣我以為佢想認叻啫，
所以就冇諗到咁多，
我有親口多謝佢嘅細心不過佢都係例牌話我亂噏喎，
其實重有好多嘅，
大家都知我好冇記性架啦，
以前學校有啲乜野特別事佢一定會提我，
重有佢基本上日日放學都會過嚟提我執齊啲野先返屋企，
呢點大家都知啦，
從來都冇認真鬧過我一句，
我喺球場插水咁冇品嘅行為，
個個見到都唔會鍾意，支持，
佢一樣都冇話過我半句，
對住我，
佢從來都係百般體諒，
有巴打講得啱，
呢世人我差佢嘅野實在係太多，
責任從來都唔喺佢度。
我同佢對上一次聯絡應該就係喺今年張敬軒六月嘅演唱會，
嗰陣我有擺上ig，
其實冇特別諗多純粹想分享啫，
過幾日就見到佢搵我，
都係講幾句冇乜特別，
佢話佢同michelle一齊睇尾場，
跟住我就多口問句佢老公呢，
佢話佢老公唔係聽香港歌，
話如果佢開到口叫佢老公陪就一定肯，
不過佢唔想咁樣，
所以就話唔使佢陪喇，
佢重因為聽到追風箏的孩子所以好開心，
事關佢原來好鍾意呢首歌，
閒談幾句跟住就冇喇，
結果喺嗰一晚，
我就係咁聽呢首歌，
大家都知佢幾有心思架啦，
好似我呢啲咁遲鈍嘅人真係好難發覺，
不過最緊要係自己知自己咩事，
我唔知佢有冇訊息想借勢帶俾我啦，
於是我就係咁咀嚼份歌詞，
咀嚼完之後上到床自己喺度諗，
已經冇理到自己係咪ff，
好唔好試下俾我本陳年日期佢，
當然事前我要影咗相save低啲內容先啦，
唔係咁嘅話樓主就唔可以喺度講故仔，
最起碼想俾佢知道咁多年佢都唔係單戀，
只係錯愛啫。
之後好明顯我就係諗咗幾個禮拜啦，
大家都了解我嘅效率真係好撚差，
結果最後我都係私自去搵佢，
唉死就死啦，
特登去佢公司嗰邊俾佢，
俾完之後即刻走，
唔奢求係一個回禮，
因為一本咁樣嘅爛鬼日記係冇可能媲美佢一直以嚟送俾我嘅野，
記得我去到就係話送俾佢希望佢肯睇啦，
我見佢都係成個人o嘴，
跟住我就講拜拜好快就擰轉頭走人，
幾個鐘之後就收到佢嘅whatsapp，
一嚟就話好叻，
等我扮樓主打啲對話出嚟啦，
芊靈:「估唔到你一直有寫日記，
好叻仔呀，
呢句係真心嘅，
你知你架啦唔鍾意寫咁多野又唔鍾意睇咁多野，
估唔到去到最後原來你寫嘅野係多過我好多好多好多，
我知係你寫嘅因為我見到個『我』字下邊冇剔返上去，
當我睇到呢個字就知係你親自寫。」
喺度講下先，
事關小弟個『我』字成日都唔記得剔返上去，
即係左手邊嗰度呀，
成日都係一棟就棟到落最抵，
唔記得勾返上去，
佢同我唔同班點解會知?
因為之前有同佢講過我咁樣俾人扣分搞到要謄文，
同埋佢有睇過我本手冊知道『我』呢個字係咁寫，
真係估唔到佢重記得，
我:「好多野唔可以當面講，
又或者係唔敢當面講，
衷心講一句對唔住。」
芊靈:「傻嘅唔使講對唔住，
我可以同你講我從來冇後悔過鍾意你，
邊個都唔可以否定呢樣野，
今日問我依然係咁講，
冇錯你以前真係好遲鈍好遲鈍好遲鈍，
太嚴重喇真係要講三次，
不過今日俾我知道我以前唔係單戀已經好足夠，
係真架冇呃你，
可能好似你咁講啦，
大家時間唔啱，
或者真係冇緣份，
呢一點我同你都控制唔到。」
我:「我今日搵返你冇特別意思，
千祈唔好誤會唔係想破壞你婚姻，
只係一直以嚟都唔敢面對自己，
冇同你講我點諗，
講完之後就已經完成任務。」
芊靈:「你都啱嘅身分唔同咗，
好多野唔係兩個人可以控制。」
總算俾佢知道咗我一直以嚟嘅諗法，
係就係遲咗啲，
亦都改變唔到啲乜，
純粹係正面去面對佢咁解啫，
而我同佢，
下一次見面或者要等到michelle同呀宏結婚嗰陣，
睇下人地會唔會請我啦哈哈，
好喇今日鳩噏完畢。