「短篇」「小小傻瓜，大大幸福」: 朋友
突如其來既熱吻，唔只係佢，就連旁邊既學生家長都嚇左一跳，個個都用個「What the fuck?」既眼光黎望住我地。
邊有人諗到會有人突然係個學校校慶上面打茄輪吖，有咁既反應都係正常既。
佢慢慢從我身邊退開，成塊臉紅到好似蕃茄咁怕怕醜醜繼續食手中既棉花糖。
都真係好耐無見佢咁既樣了。
Cherry：「好衰架你…好多人望住架嘛…
」我：「哈哈…你咁靚一時之間忍唔住吖，都係你唔好~
」Cherry：「衰人…食唔食呀，好好食架…
」佢一邊講一邊緩緩遞上粉紅色既棉花糖，我當然唔會拒絕佢既好意啦，一啖就咬左落去。
我講個棉花糖，唔好誤會~
我仲順手拖住佢隻手，等佢唔會再有機會逃出我既視綫之外，佢都配合我，成個人挨埋我身上，撟到我實一實。
工作什麼的全都比我拋諸腦後，而家既我只係一心諗住同佢係呢度好好咁拍下拖，享受下二人世界。
反正我有一班咁做得野既同事，稍微偷一下懶都無問題既。
同埋我都係校友之一黎架嘛，係應該參與下校慶既，好！理由充分！
諗好理由既同時，我個人都開始比佢拉住周圍去，睇呢樣玩個樣同埋買個樣。
同我係屋企個陣諗既一樣，大家見到一個大美人著住校服都顯得十分錯愕，因為一睇就睇得出佢無可能係學生。
不過我地都無理，正確D黎講應該話唔得閒理先岩，我地忙於沉溺係自己既世界入面，仲邊有空閒理人地既目光。
佢一句「想玩」，我地就去左撈金魚。
一句「想食」，就買左一大碗好多年無食過既小食部咖哩魚蛋。
一句「想影」，就幫趁班師弟師妹影左一張又一張即影即有。
佢想做乜我仲奉陪，但我一D被逼既感覺都無，反而覺得好開心。
好似以前中學同佢拍拖個陣咁。
行下行下，我地居然行左去以前既班房。
Cherry：「仲記唔記得以前上英文堂啊？」
我：「英文堂既咩先~英文堂好多好笑野架喎~
」Cherry：「調位個次呢~~
」哦，梗係記得啦，個次俾班仆街玩得透啦，人生第一次咁瘀點會唔記得。
我：「記得，成村人夾定計，逼我同你坐埋一齊吖嘛。
」Cherry：「係啊，個時不知幾尷尬，而家諗返就覺得好好笑。
」我：「啊，我都係咁話，有D野事後諗返就會得啖笑。唔知佢地而家點呢？」
Cherry：「唔知呢，過幾日搵佢地食飯囉~
」「lulu呀…我呢幾日呢，唔知做乜成日諗返起以前中五個陣D野啊。」
我：「咁岩既，我又係喎哈哈，我地真係心有靈犀架啫~
」Cherry：「又係度口花花
，我係度諗呢，第時我地個BB呢，唔知到時會有點既人生呢，會唔會可以好似我同你咁遇到咁好既對象呢？」我：「你係度讃緊自己同我呀？
」Cherry：「妖，唔好玩啦，我認真架。
」我：「嘛，BB都未出世你就諗到咁遠呀，會唔會太快呀？
」「而且，第時佢同咩人相遇都唔到我地控制，隨得佢啦~我地又唔係咩怪獸家長~」
Cherry：「講到尾你都係怕麻煩咋嘛，我有無講錯？
」我：「哈哈...
唔係既，我覺得應該要比小朋友相當既自由，等佢自己選擇，發展自己既人生先係。
」Cherry：「咁都比你兜到，係幾好野喎。
」我：「哈哈…ok啦…好喇唔好諗咁多啦，點呀之後仲想去邊玩呀。」
我開始諗辦法轉移佢既注意力，因為我意識到呢個話題再發酵落去可以好嚴重。
唔知點解我有唔係幾好既預感。
Cherry：「唔…不如去…」
「校慶盃籃球比賽即將開始，請選手們儘快集合。」
Cherry都未講出佢想去既目的地，學校既廣播突然就插係我地之間。
不過，我地聽到呢個廣播之後都一齊笑左一笑，我估我地都諗緊同一樣野。
係我地個年講起籃球，所有人都會諗起佢地，特別係佢。
我，Cherry：「你係咪諗起晨哥？
」我地同一時間講出呢句說話，亦同時笑左出黎。
講起籃球一定會諗起呢個痴線佬呀。
晨：「叫我呀你兩個？
」晨哥！？
聽到佢把聲之後，我地兩個都即刻望過去發現無錯的確係佢，佢係另一邊慢慢咁行緊過黎搵我地。
日頭真係唔好亂講人壞話。
佢仲係好似以前一樣咁瀟灑，自帶氣場。
估唔到佢都返左黎，仲以為佢一定忙到唔會有時間返黎添。
晨：「唷，兩位，呢排幾好嘛？」
我：「晨哥…
」晨哥：「喂喂喂，做乜咁既面口呀，十足十撞鬼咁，話時話芷晴你做乜會著成咁既？魯路修你唔通…
」晨哥一下子又令到氣氛變到十分尷尬，Cherry仲dup低頭唔敢望我地。
身為一個愛妻愛到不得了既老公，我當然要即刻解決呢個困境啦。
我即刻企係Cherry前面，將佢保護係我身後，然後就係分散晨哥既注意力，問佢點解會係度之類。
佢俾出既答案亦十分簡單直接，為左個校友盃而返黎玩下，順便趁未開波上黎懷緬下舊日子。
果然係為左籃球而返黎呀…D師弟同老師今次慘啦…
之後我地就繼續寒暄，傾下大家呢幾年忙緊乜之類。
佢就威啦，搞緊大生意，完全唔係我呢D小生意既level，真係你說有錢多麼好。
佢都有「禮尚往來」，問我呢排公司有乜野搞，我苦笑左一下，指一指地下。
聰明既佢一點就明，笑住咁話原來今次搵既crew就係我地既人，仲講左幾次辛苦哂。
晨：「啊係差D唔記得左要恭喜你地兩個添，要做人父母啦恭喜哂~
」咦咦？點解晨哥會知架？我頭先應該無提起呢件事先係架。
Cherry：「點解晨哥你會知既…？」
一直係我身後既Cherry搶先我一步問出呢個問題，晨哥聽到之後又笑左一餐，話唔好咁在意呢D小事。
聽到佢咁奇怪既發言，我同Cherry都唔知點追問落去先好，大家相望左一下，鬆一鬆膊就算。
晨：「啊，係吖如果有乜要幫手既話記得搵我又或者阿欣呀，咩醫生醫院我都可以安排到。大家咁多年朋友唔洗唔好意思。」
「好喇我都差唔多要落去喇，十四同阿偉佢地等緊我，你地兩個點呀？落唔落黎睇？」
我：「唔洗啦，我地仲有地方要去，等睇你一陣表現啦。
」我即刻回絕左晨哥，因為我係見到佢之後記起左有一個地方我應該要同Cherry去。
晨哥都無再多講咩，而係講低一句「遲D約你食飯」就笑住咁走左，留低我地兩個。
我：「好喇無謂人終於走左，我地去下一站拍拖啦。
」Cherry：「下一站係指…
」我：「去到咪知囉~
」講到懶神秘咁，其實目的地近在咫尺，上多兩層樓就已經係。
無錯，就係天台既空中花園。
雖然未到黃昏，但我都係帶左佢黎。
空中花園已經同當年既大不相同，比起以前更靚，多左好多唔同既盆栽，甚至多左條小河。
Cherry：「嘩…呢度靚左好多…直頭好似一個秘密花園咁…
」的確，而家呢度靚到超出我想象，係一個意料之外既驚喜。
我：「係咩，我覺得仲係同以前一樣喎，麻麻咋喎。
」Cherry：「點會麻麻呀，你係咪盲架，你睇下…」
我：「我又點會盲呢，最靚既一直都係我身邊，其他野比較之下都顯得失色啦係咪先。
」佢一時間get唔到我既意思，先係呆左一呆，到終於明白我既意思個陣，臉一瞬間變得通紅。
令到佢變得更可愛既係佢居然鼓起泡腮，叉住腰，擺出一個似係嬲又唔似係真係嬲既樣對住我。
Cherry：「成日都咁口花花，呢排你真係好衰吖！
」我：「吓？氹你開心都衰呀？咁我…乞痴！
」說話講到一就突然有陣怪風吹埋黎，凍到我當堂打左個乞痴。
Cherry：「抵啦，呢D咪口花花既後果，好啦我地返落去，凍親既話就麻煩啦。
」我：「吓岩岩上黎咋喎…起碼都行左圈坐一陣先啦…
」Cherry：「唉無你收，咁大個人仲成個細路咁，坐一陣就要走架啦知唔知。
」佢一邊講一邊拖住我去一邊既長櫈坐低，明明講到好唔願意好唔高興，但臉上面就係一副開心到不得了咁既樣。
女人呢，真係口不對心呢~~
就係咁，我地兩個人獨佔住整個秘密花園，仲有涼風作伴，真係寫意。
佢坐坐下就成個人挨左落黎，同我一齊仰望呢片藍天。
如果時間可以停留呢一刻，你話幾好呢。
啊唔得，如果停留左係呢一刻既話BB就無得出世，唔得唔得。
Cherry：「lulu呀，如果第時BB出世，你會錫我多D定錫BB多D？」
嘩，突然間出D咁有地雷性既問題比我，真係稍一不留神都會踩中地雷炸死。
我：「梗係你啦，作為一個爸爸之前我係你既老公呀，梗係應該錫你多D啦~
」Cherry：「係啊~？係我既話我就會錫BB多D喎~
」吓！？我咁答你你居然俾個完全相反既答案我都有既！？好難捉摸呀！！
我好想即刻企起身，不過佢挨住我我根本唔敢企起身，怕整親佢，只好屈住道氣，「哼」左一聲。
而佢既反應就係哈哈大笑，同我完全相反。
Cherry：「玩你咋傻佬，你睇下你個樣幾搞笑。
」「我永遠最錫既人都只會係你吖，知唔知？
」真係吖…都唔知無邊個收啦…