「短篇」「小小傻瓜，大大幸福」: 寶物
無論係媽媽定係個女既復原速度都非常快，唔洗兩日醫生就已經話母子都可以出院。
接左佢地兩個返屋企之後，我既工作就正式開始啦。
作為一個老公，一個爸爸既工作，亦即係可以話一個奴隸既工作。
唔…用「奴隸」呢個字岩唔岩呢，有邊個人做奴隸係會覺得開心架呢？
我要做既野其實就好簡單，就係全部野。
屋企上下所有事務，除左幫佢同BB沖涼，同埋餵奶(我邊有可能餵到)之外，不論大小都係由我負責。
嘛，雖然係多左好多野做，但係我係呢兩星期居然一D攰既感覺都無。
真係奇怪，明明我地平時做多小小野都會覺得攰，成個人散哂，但今次真係完全無呢d感覺。
我又真係唔明點解睇電視D新手爸爸會覺得湊BB係惡夢，唔係吖真係好開心喎。
起碼我半夜聽到Nicole喊我係會自動自覺落床去睇佢發生咩事，而唔係一身怨氣去。
「愛意」原來真係咁重要。
唔知Nicole要幾耐先識叫爸爸媽媽呢，真係令人期待。
啊啊，又係時候去睇下佢啦，唔知個衰豬係醒左定又訓緊呢？
我走去書房，而家既BB房睇我同Cherry既Nicole豬。
點知一行到門口望入去就見到Cherry餵緊奶，尷尬到我即刻想走人，但一轉身就比佢發現，仲叫停左我。
Cherry：「做乜要避呀傻仔lulu，有乜好怕喎。
」俾佢咁講法仲邊有得走…唯有面對啦。
我掛住一副尷尬既表情，再一次轉身望入房，呢個時候佢仲餵緊奶，仲發現原來美星都係度。
我：「哈哈…阻唔阻住你地呀…無呀我諗住入黎睇下Nicole係咪醒左咋嘛~無野啦我返出廳先啦…」
美星：「你白痴呀有乜好尷尬呀，餵人奶咋嘛，更何況你地係兩公婆，仲有得小朋友即刻代表你地…
」我：「喂喂喂喂喂！！
」我嘗試係佢令到氣氛變得更奇怪之前喝止佢，而佢條仆街就只係「嘻嘻」左兩聲同伸一伸脷就算，真不負責任。
但我無諗過咁既舉動會引發出另一個問題，一個好大既問題。
我嚇親Nicole，佢喊到九彩，奶都唔再飲。
Cherry：「喂呀！你嚇親個女啦！
」自知罪孽深重既我唔理三十廿一走埋去，打算氹返個女，點知佢都仲係哇哇大哭，喊到我心好酸。
呀做左人爸爸之後真係要連脾氣態度語氣都要改下先得，呢樣先係最麻煩…
之後Cherry氹左佢成三四個字Nicole先慢慢平靜返，仲係佢溫柔之極既媽媽既懷內訓著左。
而我呢個罪大惡極既爸爸呢，就只係可以企係一邊反省。
到Cherry放返好Nicole落床之後，佢先再同我講返野。
Cherry：「點呀傻佬~~做乜咁意志消沉呀~
」咦…？我以為佢仲嬲緊添？
我：「我以為你…對唔住啊。
」Cherry：「傻啦我又點會因為咁小事嬲你吖，只係頭先要氹返個女先唔俾佢嘈所以無理你啫~
」「BB係敏感D架啦，唔好咁上心，俾咁多壓力自己。
」啊…佢果然係天使呀。
Cherry：「啊係呀一陣會有人黎探我地，你可唔可以陪我做D準備呀？
」有人要黎？
我：「可以係可以…但係邊個要黎呀？你阿爸阿媽？」
Cherry：「唔係呀，佢地去左台灣玩邊黎到啫，前兩日咪比過你睇佢地係台北d相，咁快唔記得左嗱？」
啊啊…佢咁講一講我又醒起有件咁既事，最近太專心照顧佢兩個，其他野都唔係好記得住了。
Cherry：「唉睇你個樣都係真係唔記得左架啦，無你個傻仔收呀。
」我：「唔係呢，咁其實係邊個要黎啫，你都唔講埋佢既。
」Cherry：「呀！
最衰都係你呀搞到人分左心，咪子琪佢地囉，話探下我地，睇下BB咁。
」OK，又係我衰，唔緊要又唔洗坐監既，認下衰仔氹佢開心囉。
不過係子琪啊…？點解佢會知道我地生左女既？唔會係晨哥話佢知架？
講開又講如果子琪黎的話，唔知朱雀會唔會黎呢？小學最friend既兩個朋友都想見下…
嘛，唔黎的話都無乜所謂啦，約出黎食飯咪得囉我係咪傻架。
係佢既指揮之下，我開始同佢係廚房一齊整曲奇，至於點解係曲奇？我都唔知，我都係收order做野。
但係都好似好耐無同佢一齊整野食…自從知道佢有左之後大部分時間都係我用廚房既。
感覺真係好呀咁樣兩口子一齊整野食，十足十拍緊台劇咁。
都未整好d曲奇，個心就已經被甜蜜填滿了。
唔知佢一陣會唔會餵我食岩岩出爐既曲奇呢，哇淨係諗都心跳加速臉紅耳赤呀真係。
Cherry：「喂傻仔lulu，望過黎吖。
」喂喂喂，我岩岩先諗完佢就即刻做？我地未免太心有靈犀一點通啦掛？
唔正當我滿心歡喜擰過去，準備迎接我既曲奇既時候我先記起小小野。
D曲奇根本就連焗爐未入過，又邊可能可以用黎餵我！！
但可惜既係一切都太遲，黎唔切收掣了。
我最後都係面向住佢，不過好彩既係佢唔係將一件生既曲奇放入我口。
佢只係調皮咁hi左一pat朱古力醬係我嘴唇，之後笑笑口咁望住我。
Cherry：「幫我試下夠唔夠甜吖~
」唔…呢D咁主觀既問題呢…我諗每個人既答案都可能會唔同，所以…
我：「不如你自己都試下？」
Cherry：「嗯？你話咩…」
我無學佢咁係碗度撩起一pat朱古力醬hi落佢嘴上，我選擇左自己既方法。
就係帶住呢pat朱古力醬錫落去佢度，而且仲要係以迅雷不及掩耳既速度。
我都幾佩服自己可以係咁快既速度下錫得中，精準度滿分。
確保自己嘴上既朱古力醬成功到送達佢嘴上，簽哂收確認收貨之後我先退開，細心睇佢既反應。
我起初會以為佢會表現得好怕羞，但結果大失我所料，佢居然好平靜，仲好仔細咁品味緊我傳比佢既朱古力。
Cherry：「唔…鹹鹹地既，係咪我落錯左鹽呢？
試多次先~」佢講完之後又撩多一pat朱古力醬直接放入自己口慢慢品嘗，完全無視我頭先既浪漫舉動。
哎…有無搞錯呀…哇！！！
正當我為自己既失敗而失意之際，佢忽然同我黎個突襲，錫左埋黎，將朱古力醬傳到我口中。
明明係同一個動作，佢可以冷靜應對，而我，就被徹底打敗了。
我差D就直接跪左係地下。
Cherry：「嘻嘻，今次d朱古力甜唔甜呀？老~公~
」佢擺出一副勝利者既姿態，居高臨下咁宣告自己既勝利。
我：「甜…甜到糖尿添…
」屌，呢d野有時真係唔夠佢鬥…
係一輪耍花槍之後，曲奇終於都焗好，我，佢同美星三個開始品嚐，唔，果然好好食。
門鐘亦係呢個時候響起，未開門已經聽幾把嘈到癲既女聲。
其中兩把齋聽都已經知道係邊個，一定係弱智同阿欣。
打開門，果然見到佢地加子琪。
子琪：「喂好耐無見啦魯路修！巴閉啦做左人老豆~
」咁多年無見，呢幾條友都係無變，嘈喧巴閉。
若睛：「喂喂喂！BB呢！BB係邊度呀？快D開門俾我地入去睇下啦！！」
呀呀呀，好嘈呀！！嘈到我頭都痛埋。
可以的話我真係想唔開門，但有朋自遠方來，係應該招呼下既。
所以我最後都係開左門，請佢地入黎。
若睛：「做咩呀魯路修，老朋友黎探你你居然咁既面口都有既？開心D吖嘛~」
嘖…真麻煩，我又唔係餐廳侍應點解一定要笑臉迎人喎…
我：「說話講清楚d好喎師兄，老係你老啫，我地係普通朋友黎咋。」
Cherry：「哎唔好理佢啦，佢快d入黎啦我岩岩焗起左D曲奇呀！」
未等我再開聲串呢個弱智，Cherry就已經走左埋黎分開我地，仲拎住一盤曲奇。
子琪：「哇係曲奇呀！係啦咪鬼理個低能仔啦，佢由以前開始就成日西口西面對人架啦，大家都知架。」
屌，唔好講到好了解我咁啦好嘛。
之後屋內呢五個女人就開始係我屋企談天說地，仲抱埋仍然熟睡中既Nicole出黎一齊「觀賞」。
見到我呢個咁得意既女，佢地幾個當然係為之瘋狂啦，係咁同Nicole玩，又瘋狂影相咁。
特別係阿欣，佢好似真係好鐘意小朋友咁，見到佢不停撩Nicole玩，仲問Cherry好多有關生仔，BB既事，可以睇得出佢真係好想做媽媽。
嘛，希望佢同晨哥可以儘快生返個小朋友啦。
講起晨哥…
我：「喂，點解你地兩個會知道我地生左個女既？我記得我地應該無post上fb ig之類既social media架。」
「晨哥話你地知架？」
聽到我咁問，佢地三個互相望望，之後就搖搖頭否認。
子琪：「你唔知你老婆幫你地個女開左個page咩？我同若睛都係睇到先知道，之後再問阿晨佢先同我講既。」
聽到「FB Page」我馬上就將目光轉到去抱住Nicole既Cherry身上。
明明我肯定自己既眼神並無任何責怪既意思，但同我四目交投既Cherry仍然伸脷扮可愛黎謝罪。
雖然真係好可愛。
「跟住問佢有無興趣黎睇，條友又話唔得閒，叫我地同佢女朋友阿欣姐一齊黎喎，真係識駛人。」
「啊仲有呀，佢話遲d會送份禮物比BB咁話喎。」
吓又禮物…？佢當自己聖誕老人呀？日日都派禮物？
就算我地係度高談闊佢同晨哥，阿欣佢好似都係聽唔到咁，只係繼續係Cherry身邊同Nicole玩。
真係傷腦筋呢…嘛人地既事都係唔好理咁多啦，家家有本難念的經呀。
而且，我而家都應該無餘力去理人地既事，眼前就已經有兩個最大既寶物係度。
佢地既份量大到佔據哂我既視線，眼裏再容不下其他野啦。
而家想做既野真係好少，再唔係咩賺錢買玩具，而只係好好守護佢地。
可以的話，要一世照顧住佢地呢。
之後我都無做d乜，野食又唔洗我整，Nicole又唔洗我幫手換尿片，我只好坐係bar台，望住呢幾個女人，飲自己既紅茶。
但係，唔知幾時子琪走左埋黎。
子琪：「搞乜呀你，無乜精神咁既，湊BB真係咁攰咩？」
我：「攰係因為你班友係度嘈喧巴閉啫，唉真係麻煩，你地玩還玩唔好整到我個女呀，我既寶物黎架。」
子琪：「無見咁耐你真係唔同左喎，係因為人大左吖，定係因為做左人老豆呢？你以前唔會點明顯照顧人架。」
我：「啊啊，點都無所謂啦，大家生活過得好咪得囉，反而你又無乜點變喎。」
子琪：「嘛，本小姐我保養得好吖嘛~」
啊…我唔係想話你個樣無變..不過算啦。
我：「講開又講，你有無話俾朱雀知？」
子琪：「嗯，有呀，不過佢咁岩出左trip所以黎唔到啫，佢有話過如果你擺滿月或者百日宴的話佢一定會黎。」
啊…我又真係無諗過呢d野喎，呢d傳統野我真係唔太熟悉…
我：「個隻野睇黎都無變呢，成日唔係香港。」
子琪：「無變唔係幾好咩？好似以前小學咁。」
我：「可惜我已經變左lu，我而家有必須要守護既寶物，雖然係有d麻煩但我一定要保護好佢兩母子。」
子琪：「唔~~但係而家我開始覺得你仲係以前個個低能仔喎哈哈，成日話咩守護，咩力量咁。
」無辦法啦，鬼叫佢鐘意既係呢個低能既我咩？