「短篇」「小小傻瓜，大大幸福」: 愛你

「你只需要做返你自己，做你想做既野，好似以前咁就可以。」

「我都會一樣，做我自己，邊個話有左小朋友就一定要改變生活方式啫係咪先？」

「我地一定可以一齊搵到屬於我地既方法好好照顧Nicole既，仲一定會好幸福好幸福。」

呢幾句係佢尋晚最後同我講既野，而我就無比出任何答覆，因為我當下真係諗唔到。

無用鬼始終都係無用鬼，過左咁多年依然一樣。



最後我都係無返入房訓，自己係廳度坐，坐到訓著左都無為意。

直至受到一下當頭棒喝，係真係物理上既「當頭棒喝」，我先醒返。

醒左之後發現頭先仲陪住我既月亮已經悄悄離去，取而代之既係提醒人們新一天又開始左既太陽伯伯伯。

我再望望到底係邊個毆鳩我，發現原來係美星，佢仲企係我旁邊拎住個電視遙控，似係想睇情況準備再打多下咁。

我：「做乜鬼呀你…」



美星：「你就真係做乜鬼呀，咁大個人係度閙情緒，起身啦你老婆煮左早餐你食啦。」

早餐…？老婆…？

我一load到到底係咩事之後即刻係梳化上彈起，衝去廚房搵佢。

但係當我去到廚房門口既時候，佢已經捧住一份早餐行左出黎。

我：「呃…」



一諗起尋晚佢同我講既野，我就無言以對。

Cherry：「醒左嗱？我煮好左早餐喇，紅茶都沖左，一陣會拎埋出黎，你過去坐低等陣啦。」

我：「哦…」

我傻下傻下咁跟住佢既說話去做，坐係餐檯睇住佢上菜。

好快兩份精美既英式早餐就放左係我面前。

比起我整既更靚，更令人食指大動，一份完全唔會滿足。

佢拎埋兩杯荼出黎之後就解開圍裙，坐係我對面，托住臉望住我笑。

Cherry：「黎吖快d食啦~凍左唔好食架。」



我：「好…不過得兩份既…？美星呢？定係佢已經食左嗱？」

Cherry：「無啊，今日我淨煮比我最愛既老公食咋~~」

哇你講到咁，好難唔令人心動喎…

一大朝早就搞到人地心跳加速，真係百厭…美星仲係度架…

美星：「開心就笑出黎啦低能仔，收收埋埋有寶咩。」

一講曹操曹操就到，美星走左埋黎猛咁捽我個頭，捽到我頭髮都甩左幾條。

但神奇既係，我就好似一個扭蛋機咁，俾佢咁捽兩捽居然真係捽出個笑容，仲笑得好開心，好開懷。



美星：「咁先係架嘛，個老婆對你咁好你執到啦，啊啊我落街食早餐先啦唔阻你地恩愛，一陣幫我沖咖啡呀魯路修。」

佢一邊講一邊著鞋，連人地既回答都唔等就出左門口，留低我地兩個，啊應該係三個人係度先岩。

我：「咁…我食架啦。」

搞左咁耐終於可以開始食，美星真係麻煩…

不過…都係要多謝佢既。

Cherry：「點呀好唔好食，我今次轉左整法，想聽下你意見呀。」

屌你整乜都好好食架啦…仲洗問既。

對我呢個傻仔無微不至，真係愛死你啦。



就係咁，我地兩口子互相望住咁樣共進早餐，你餵我一口我又餵返你一啖咁樣，真係唔洗落糖都已經甜到爆炸。

笑容同笑聲一直都收唔返埋，好似想用上一年，應該係十年既笑容份量咁。

唔係，笑容呢家野應該無限量先係，至少係佢身邊的話，我既笑容就唔會有用完既一日。

我：「我…」

就係我想講出心聲既時候，忽然傳出Nicole既喊聲，我地即刻好似消防員聽到廣播咁放低手上既餐具，馬上出動。

去到現場，佢第一時間抱起Nicole，而我就係旁邊傍住。

突然間，我又諗起佢尋晚講過既野。



而佢似乎真係同我有心靈感應，居然講出我心中既說話。

Cherry：「我都話左我會一直係你身邊同你一齊照顧Nicole架啦，你睇下話咁快就有機會俾我證明喇哈哈。」

真係吖，湊BB湊得咁得戚既人我都係第一次見…

我：「我愛你。」

雖然唔知時機岩唔岩，但我終於將呢句說話講左出黎。

佢並無特別既反應，只係微微一笑，但之後佢既回覆卻令人為震奮。

Cherry：「我都愛你啊，魯路修。」

我諗我應該真係呢個世界上最幸福既人。