除了清清要留在運動場跟啦啦隊一起吃飯盒,我們一行五人決定到附近的小商場覓食。因為四社相距甚遠,足足等了十五分鐘才找到大家。正當我們準備離去的時候,我卻聽到命運的呼喚。

「喂!你地去邊食啊?」

Jessie在不遠處向我們揮手,而我只看到她身旁的Paula,像正午的陽光般刺眼。

有些緣份,不能輕易切斷。

「我地諗住去xxx商場二樓掃街啊,嗰到好多小店㗎,一唔一齊?」





謙少看到女生,馬上邀約,Jessie爽快答應,我不禁嘆氣。卓行似乎注意到我的表情,悄悄地走到我身邊,我們越走越慢,落後了一段距離。

「唔想一齊食?」

「我有咩理由唔想?」

「我都唔知,但你一見到Jessie,好似唔太高興咁。」

「你信唔信命運,或者緣份㗎?」





「姐係點?」

「人與人之間嘅相遇都係必然,因為一啲目的,某啲人先會走到你身邊,可能係陪你,可能令你成長,可能令你經歷痛苦,時間或長或短,最後都會離開,你信唔信?」

「所以...你同Jessie咩事?」

「無,無野喇。」

卓行低頭不語,樹葉被微風吹得沙沙作響,小鳥的叫聲,人群的笑聲、腳步聲,汽車的引擎聲,世界的聲音胡亂地交織着,只餘下二人沉重的呼吸聲,各懷心事。





「或者相遇係必然,但故事只可以自己編寫,人生又無劇本,我覺得有啲野係可以努力,所謂目的都係人自己賦予。」
「就好似我地做左同班同學,已經係事實,但係我地可唔可以變熟,係取決於我地,我係咁樣理解。」

我有些吃驚,想不到他在認真思考我的問題。其實我不需要答案,或者說我一早知道答案,只是懊惱着怎樣走完過程。

我正在努力改寫允健和清清的劇本,卻無法改變卓行和Paula相遇的必然。

「你又知你努力緊嘅唔係既定嘅劇本?」

「唔知㗎,但如果我努力左,得到我想要嘅野,本來係點仲重要咩?」

「咁所以你覺得,命運並唔存在?」

「命運都只係人賦予意義,唔重要。」





我陷入沉思。