派對時間完結了,收拾好課室的桌椅後,我們在門外排隊,準備到禮堂崇拜。1A班坐在禮堂的左上方,我和清清排頭兩名,坐在靠窗位置,而講者則站在講台的右邊,視線自然不會注意到邊緣,崇拜開始後班主任也會坐到每班最後一行。

因此,每一次早會、崇拜就成了我和清清開心事台的時間。

「芯言,你聖誕節有咩節目啊?」

「我未知喎...睇下大家得唔得閒出黎玩囉。」

「你應該知,我約左允健啊...」



「知你好期待啦,哈哈!」

清清被我說中了心事,表現得十分害羞。

「哎呀,我唔知送咩比佢好啊,又唔敢請教阿媽點樣織頸巾,雖然我都應該學唔識...」

「其實你肯同佢過聖誕,就係最好嘅禮物,唔洗咁苦惱喎。」

當然,我不會告訴她允健也問過我一樣的問題。



「但我都想送啲親手整嘅野比佢...」

「畫張聖誕卡?或者整朱古力、曲奇餅之類?」

「好主意喎!不如你黎我屋企一齊整啦,咪有藉口唔洗驚阿媽懷疑!」

「原來你係搵我過橋!」

「其實我同阿媽講,聖誕節係同你出去...」



「...」

我露出不滿的眼神,卻一邊點頭答應,就讓我為他們這棵幼苗澆最後一次水吧!

崇拜在聊天中渡過,回到課室,同學們拋下一句「2009再見」便各自散去,大家期待已久的聖誕假期正式開始。允健和清清不知在何時悄悄離開了,大概是怕我們約在聖誕節見面吧!

「聖誕我地出黎玩啦!」

謙少興致勃勃,大概想找人陪他到網吧。

「我唔會玩跑online玩一日㗎。」
「我都係。」
「我都係。」

「咁你地提議囉!」



「上星期我表姐同我去影貼紙相,不如我地又去嚕?」

琪姐這個主意不錯,總比待在網吧一整天好。從前很喜歡放學跟朋友去影貼紙相,由$30一張到$60一張,曾經風靡一時後來卻無人問津,貼紙相舖倒閉了,最後只剩下市區幾間分店。

「都得,不過我地得四個人,洗唔洗多啲人?」

「你都係想叫埋Jessie同Paula姐。」

琪姐看穿謙少的想法,他亦不再隱瞞,積極的說服我們。

「聽講呢,Jessie同個師兄散左啊,如果聖誕節多啲人一齊玩,開心啲唔好咩?」

「我無所謂嘅,但你有佢地contact咩?」



我選擇沉默,我不希望製造更多的機會讓卓行跟Paula相見,可惜現實總是事與願違。我說不出反對的理由,就任由他們決定吧。卓行看我一眼,有點疑惑。

「...我同芯言之前拎左佢地msn。」

「拎到我女神msn都唔話我知!一於我負責問Jessie,Paula就益你啦肥仔!我地仲可以玩交換禮物添喎!」

「我無意見嘅,咁你地負責聯絡啦。芯言呢?」

「吓?喔...你地鍾意啦...我返去先喇,再講。」

我逃離現場。

「肥仔,佢唔係同你同路㗎咩,走咁急做乜?」

「係囉可...」