【短短一個月內，屋企就死左五個人...】: 第五章 追尋真相

 「張叔！」我誠惶誠恐咁企係門口，準備迎接張天師。 不遠處，一個外表只有五六十歲，有些少地中海既中年阿叔係咁易向我點頭示意。估唔到呢？一個著住件李彩樺小背心，咬住枝牙籤，踢著對藍白色人字拖既人，竟然就係我地寧家後輩尊崇至敬既張天師。梗係啦，真人不露相，露相不真人丫嘛，我地點可以只靠樣黎判斷人既呢。 「張叔入黎坐入黎坐...」我做個請既手勢，先招呼張天師入店坐下。 「屌梗係坐啦，唔通同你條仆街仔企係到傾咩！」張天師不耐煩地揮揮手，打斷我既說話，然後就自己拎左張櫈坐低。 早就對佢既態度習已為常既我見怪不怪，自己都拎左張櫈坐低，開口問道：「張叔，我阿爺同我啲阿叔接左單委託你知唔知架？早幾日有個阿伯搵我個時同我提起過。」 原本一手了緊牙，一手搓緊腳，漫不經心既張叔一聽到我講委託兩個字時，突然就瞪大雙眼，手既動作都嘠然而止。「唔撚係掛？佢地接左單委託！？我咪叫撚左佢地唔好接架囉！」一路講個時仲表現得好激動，雙眼紅筋暴現，雙手都握成拳頭狀。 哦，姐係你知架啦！！我心中一愀，立即就追問落去：「張叔，姐係你都知單野架啦！？你快啲講多啲我知！」 「唔講！成件事根本唔關你事，無謂再扯埋你落水。」張天師照頭就一盤冷水淋落黎。 唔關我事？件事都發展到咁既地步，豈有唔關我事既道理！？一時間唔知邊到黎既怒氣驅使我從衫袋中抽出張委託，指住上邊寫住寧可思呢三個字，氣急敗壞地回駁：「點會唔關我事！張叔你睇下！有我個名呀！有寧可思呢個名架！白紙黑字寫左係到呀，點會有假！？點會唔關我事！？」 張天師聞言，立即從我手中一手搶過張委託，然後面色就沉左落黎，我從來都未見過張天師咁既樣，一時之間我都唔敢出聲再問，生怕一出聲就會刺激到佢。良久，佢先再開口道：「寧木森係咪老到痴撚左線呀？」張天師抬頭，意味深長咁望左我一陣，然後又揮一揮手，自言自語道：「唉，罷了罷了。講就講啦，不過我講左你信唔信就隨得你。」 我點點頭示意。老實講，我連有鬼都信咯，咁仲有咩係唔信丫？ 張天師收起一貫既笑容，正襟危坐，從後褲袋摸出一枝萬寶路，點著左就開口。 「嘿，其實要講呢件事，就要由我同你阿爺點識開始講起...」